Sirac 27 - Cebuano Meaning-Based Bible

1Daghang mga tawo nakasala samtang nangitag ganansya; kon buot kang madato kinahanglang tabonan mo ang imong mga mata.

2Lisod ang pag-ibot sa usa ka ugsok nga nahitarok taliwala sa duha ka bato diha sa usa ka balay ug sama usab kalisod ang pagkuha sa pagpanglimbong diha sa pinalitay ug pagbaligyaay.

3Gawas kon hugot ang imong kahadlok sa Ginoo, ang imong panimalay dali rang mapukan.

Ang Pagpanulti Nagpakita sa Matuod nga mga Gibati

4Ang pagpanulti sa usa ka tawo magpakita sa iyang mga apan; sama kini sa usa ka salaan nga maglain sa hugaw.

5Ang imong paagi sa pagpanghunahuna magpakita sa imong kinaiya sama nga ang usa ka pagbahan magpakita sa mga depekto diha sa mga kulon nga gipagba.

6MakailaMat. 7:17; 12:33; Luc. 6:44. ikaw unsa kaayo ang usa ka kahoy nga gigalam pinaagi sa bunga nga ihatag niini ug makaila ikaw sa mga gibati sa usa ka tawo pinaagi sa iyang pagpadayag sa iyang kaugalingong panghunahuna.

7Ayaw gayod dayga si bisan kinsang tawo sa dili pa nimo hidunggan siya nga mosulti kay mao kana ang matuod nga prueba.

Ang Pagkadili Limbongan

8Kon maninguha ka aron mahimong dili limbongan, mahimo kang dili limbongan. Makadugang kini sa imong kinaiya sama nga ang usa ka anindot nga sapot makadugang sa imong katahom.

9Ang mga langgam mobatog uban sa mga langgam nga sama kanilag matang ug ang batasan sa pagkamatinud-anon moabot kanila nga naninguha sa pagkamatinud-anon.

10Ang sala naghulat kanila nga nangitag higayon sa pagpakasala, sama nga ang usa ka liyon nagahulat sa iyang tukbonon.

Ang Binuang nga Sulti

11Ang pulong sa tawo nga diosnon puno sa kaalam apan ang buangbuang nagasupak sa iyang kaugalingon.

12Kon mahitipon ikaw sa mga tawo nga kuwanggol, pangita ug paagi aron makabiya ka kanila. Apan kon mahitipon ikaw sa mga tawo nga but-an pabilin uban kanila.

13Ang mga sugilanon nga isaysay sa mga buangbuang nga mga tawo makadaot ug himoon nilang komedya ang labing mangil-ad nga sala.

14Kon ang maong mga tawo manunglo, igo na kini nga makapanglimbawot sa imong balhibo ug kon mosugod na sila sa panaglalis, ang imo rang mahimo mao ang pagpanampong sa imong mga dalunggan.

15Sakit ang pagpamati kanila nga manag-insultohay ug ang maong daotang mga pulong mosangko ngadto sa paggamit sa kusog.

Ang Pagbutyag sa mga Tinagoan

16KonPan. 20:19; 25:9. imong ibutyag ang mga tinagoan nga gisugilon kanimo, ang mga tawo mawad-ag pagsalig kanimo ug dili gayod ikaw makabaton ug usa ka suod nga higala.

17Tahora ang imong mga higala ug salig kanila. Kon magbudhi ikaw sa usa ka higala, maayo pa nga kalimtan nimo nga ikaw adunay higala.

18Sa ingon, gipatay nimo ang maong panaghigalaay sama sa pagpatay ug usa ka kaaway.

19Ang imong higala nawala na. Dili na ikaw makapabalik kaniya sama nga dili ikaw makapabalik sa usa ka langgam nganha sa imong kamot human nimo kini buhii.

20Ayaw na lamang paghago sa pagpangita kaniya. Ulahi na kaayo kini. Nawala na siya ingon sa usa ka lagsaw nga nakalingkawas gikan sa lit-ag.

21Ang mga samad mahimo nga bugkosan ug ang mga insulto mahimo nga pasayloon apan kon imong budhian ang usa ka pagsalig, kini wala nay paglaom.

Ang Pagminaot

22Kon ang usa ka tawo magsugod sa pagpangidhat kanimo, aduna siyay daotan nga gihunahuna ug walay makapugong kaniya sa pagpadayon pagbuhat niini.

23Kon uban siya kanimo, ang iyang mga pulong maanindot kaayo! Ulog-ulogan ikaw niya sa tanang mga pulong nga iyang isulti. Apan sa imong luyo lain na ang sugilanon; iyang gamiton ang imong gisulti ug isumbalik kini batok kanimo.

24Wala nay laing butang dinhi sa kalibotan nga gikontrahan ko ingon sa usa ka tawo nga sama niini—ug gikontrahan usab siya sa Ginoo.

25Pag-itsa ug bato tungod gayod sa imong ulo ug ikaw ra usab ang maigo niini. Panumbag ug ikaw mismo ang masamad.

26Ang mga tawo nga maghimo ug mga lit-ag mao hinuoy mahulog niini.

27Ang mga tawo nga managmal sa uban maalaot ra usab sa ilang kaugalingong binuhatan ug dili sila mahibalo ngano kini.

28Ang garboso nga mga tawo manginsulto ug magbinuang sa uban apan ang panimalos sama sa usa ka liyon nga naghulat ug higayon.

29Sila nga malipay pagsaksi sa pagkapukan sa mga tawo nga diosnon mahulog ngadto sa usa ka lit-ag ug mamatay sa usa ka sakit nga kamatayon.

Ang Pagdumot

30Ang kasuko ug ang mainitong kapungot maoy mga makalilisang nga butang ug ang mga makasasala naghupot niining duha.