Sirac 21 - Cebuano Meaning-Based Bible

Ang Sala

1Anak, nakasala ka ba? Ayaw kini buhata pag-usab ug pag-ampo nga pasayloon ka tungod sa imong nabuhat.

2Likayi ang sala sama nga molikay ka sa usa ka bitin. Kon magpalabi ka pagduol niini, sama kini sa usa ka liyon nga mopaak sa imong kalag ug malaglag ka.

3Ang tanang buhat nga supak sa balaod magbilin ug usa ka dili mamaayo nga samad, sama sa samad gikan sa usa ka espada nga duhay sulab.

4Ang usa ka tawo nga bangis ug mapahitas-on, mawad-an sa tanan nga iyaha.

5Ang

9Ang usa ka pundok sa mga tawo nga walay pagtahod sa Balaod sama sa usa ka bugkos nga sugnod; matapos sila sa usa ka nagdilaab nga kalayo.

10Ang dalan nga laktan sa mga makasasala hamis ug binakbakan apan magdala kini kanila ngadto sa kalibotan sa mga patay.

Ang Kaalam ug ang Kabuang

11Ang magtuman sa Balaod makapugong sa iyang kaugalingon. Kon nahadlok ikaw sa Ginoo sa tinuoray gayod, makabaton ikaw ug kaalam.

12Kinahanglan nga hait ka ug salabotan aron makakat-on bisan unsa; apan usahay adunay nagpakaaron-ingnon lamang nga hait ug salabotan ug makapalagot kini sa mga tawo.

13Ang kahibalo sa usa ka tawo nga maalam sama sa usa ka suba nga dili gayod mauga, sama sa sapa sa maayong tambag nga kanunayng nagdagayday.

14Sa laing bahin, ang usa ka buang adunay panghunahuna nga sama sa usa ka tadyaw nga buak; ang iyang makat-onan mawala lang dayon.

15Kon ang usa ka tawo nga edukado makadungog ug usa ka maalamong panultihon, magdasig kini sa iyang hunahuna ug magdala kaniya ngadto sa laing mga panghunahuna. Apan kon tawo nga ignorante ang makadungog niini, iya kining isalikway ug kalimtan dayon.

16Ang pagpamati sa usa ka tawo nga buangbuang sama sa pagpanaw nga magpas-an ug usa ka bug-at nga palas-anon. Apan usa ka butang nga makalipay ang pagpamati sa isulti sa usa ka tawo nga maalamon.

17Ang mga tawo mahinangop sa pagpamati sa usa ka tawo nga makinaadmanon ug matinud-anon sila nga modawat sa iyang mga panghunahuna.

18Alang sa usa ka tawo nga ignorante, ang kaalam walay kapuslanan sama sa usa ka balay nga naguba. Wala gani siya makasabot sa mga butang nga iyang nahibaloan.

19Alang sa usa ka tawo nga walay buot, ang edukasyon sama lamang sa usa ka posas,

20-21apan alang sa usa ka tawo nga but-an, sama kini sa mga pulseras nga bulawan. Ang usa ka tawo nga maalamon magpahiyom sa hilom samtang ang usa ka buang mokagiki sa pagkatawa.

22-23Ang usa ka tawo nga kuwanggol molili diha sa pultahan sa balay sa laing tawo ug unya mosulod lang dayon. Apan ang usa ka tawo nga may kasinatian ug may maayong pamatasan, magbaton ug igong pagtahod sa pagpaabot didto sa gawas.

24Ang pagpangukoy diha sa mga pultahan maoy daotan nga pamatasan ug bisan kinsa nga may diyutayng kaligdong maulaw sa paghimo niini.

25Ang tabian nga mga tawo magsulti mahitungod sa mga butang nga wala silay labot apan ang maalam maghunahuna sa sangpotanan sa ilang isulti.

26Ang mga buangbuang magsulti bisan unsay moabot sa ilang hunahuna; ang mga tawo nga maalamon maghunahuna sa dili pa sila mosulti.

27Kon ang usa ka tawong daotan magtunglo sa iyang kaaway, nagtunglo siya sa iyang kaugalingon.

28Ang tigpanglibak nagdaot sa iyang kaugalingon ug ang tanan niyang silingan mokontra kaniya.