Judit 2 - Cebuano Meaning-Based Bible

Ang Gubat batok sa Kanasoran sa Kasadpan

1Sa ika-18 nga tuig sa paghari ni Nabucodonosor, sa ika-22 nga adlaw sa unang bulan niadtong tuiga, siya ug ang iyang mga magtatambag mihukom sa pagtuman sa iyang hulga sa pagpanimalos sa tanang mga nasod nga mibalibad sa pagtabang kaniya.

2-3Gipatawag sa hari ang mga pangulo sa iyang kasundalohan ug ang iyang mga pangabaga ug mitaho siya kanila sa unsang paagiha nga gibudhian siya niadtong mga nasora. Siya ug ang iyang mga pangabaga nagkauyon nga ang tanan nga nagdumili sa pagtabang kaniya sa gubat kinahanglang patyon. Unya iyang gisaysay kanila ang laraw sa ilang pagsulong.

4Sa pagkatapos sa tigom, mihatag si Nabucodonosor niining mosunod nga sugo ngadto kang Holofernes nga mao ang heneral nga nangulo sa iyang kasundalohan ug luyoluyo sa hari:

5“Ako, si Nabucodonosor, ang gamhanang hari ug magmamando sa tibuok kalibotan, nagsugo kanimo sa pagpili ug mga batid nga sundalo: 120,000 ka sundalong maglakaw ug 12,000 nga magkabayo.

6Unya atakiha ang mga yuta sa kasadpan tungod kay nagdumili sila sa pagtubag sa akong hangyo sa panabang.

7Pasidan-i sila nga kinahanglan andamon nila ang ilang mga halad sa yuta ug sa tubig aron pagpakita nga sila miampo sa hingpit gayod. Ipabati ko kanila ang kabangis sa akong kapungot ug laglagon ko sila sa hingpit. Ang akong kasundalohan mosulong sa tibuok yuta ug sakiton nila kini ug tulisan nila kini sa ilang pag-agi.

8Pun-on ko ang mga walog sa mga patayng lawas ug dan-ukan ko ang tanang sapa o suba sa daghan kaayong mga patay aron kini silang tanan moawas.

9Bihagon ko ang tanan nga mahabilin nga buhi ug dad-on sila ngadto sa kinasuokang bahin sa kalibotan.

10“Ikaw, Holofernes, gisugo ko sa pag-una kanako ug iloga dayon ang tanan nilang mga kayutaan. Kon moampo sila kanimo, pahulata sila hangtod moabot ako aron pagsilot kanila.

11Apan kon mosukol sila, ayaw silag kaluy-i. Patya sila ug sakmita ang tanang butang niadtong dapita ubos sa imong mando.

12Nakahimo ako ug matinud-anon nga panumpa ug bisan mamiligro ang akong kinabuhi ug ang akong harianong gahom hugot ang akong hukom sa pagbuhat sa akong gipanumpa nga buhaton.

13Ayaw pagsupak kanako sa bisan unsang paagi. Ako mao ang imong hari. Hinumdomi ug tumana sa walay langan ang tanan kong mando kanimo.”

Ang Pagpakiggubat ni Holofernes

14Busa si Holofernes mitalikod sa hari ug gipatawag niya ang tanang mga komandante, mga heneral ug opisyales sa kasundalohan sa Asiria.

15Sumala sa gisugo sa hari, nagpili siya ug 120,000 sa labing maayong sundalong maglakaw ug 12,000 sa labing maayong mamamana nga nagkabayo

16ug giandam sila alang sa gubat.

17Nagdala usab siya ug daghan kaayong mga kamelyo, asno ug mula aron pagdala sa iyang kahimanan ingon man sa daghang karnero, baka ug kanding nga sud-anon.

18Ang mga sundalo nakadawat ug daghang rasyon ug suhol nga bulawan ug plata gikan sa panudlanan sa hari.

19Si Holofernes ug ang tibuok nga kasundalohan nanggula nga nag-una kang Hari Nabucodonosor. Ang mga nagsakay ug karwahi, ang mga nagkabayo ug ang mga naglakaw misulong aron paglukop sa tibuok dapit sa kasadpan.

20Ang unya gisakmitan niya sa mga butang ang tanang katawhan sa Rasis ug ang mga Ismaelita nga nagpuyo didto sa ngilit sa diserto sa habagatan sa Queleon.

24Unya mitabok si Holofernes sa Suba sa Eufrates ug mipadayon latas sa kayutaan sa Mesopotamia, ug gihurot niyag laglag ang tanang pinarilan nga mga lungsod nga nagsubay sa Suba sa Abron hangtod sa dagat.

25Gisulong niya ang kayutaan sa Cilicia, gipatay niya ang tanang misukol kaniya ug miabot siya hangtod sa habagatan, sa utlanan sa yuta sa Japet duol sa Arabia.

26Gilibotan niya ang mga taga-Media ug gisunog niya ang ilang mga tolda ug gipangihaw ang ilang mga karnero.

27Midulhog si Holofernes ngadto sa kapatagan libot sa Damasco sa panahon sa ting-ani sa trigo ug gisunog niya ang tanang kaumahan, gipangihaw ang mga panon sa kahayopan, gitulis ang mga kalungsoran, giguba ang kabalangayan ug gipamatay ang tanang batan-ong lalaki.

28Nagkaguliyang ang tanang mga tawo nga nagpuyo sa kabaybayonan sa Dagat sa Mediteraneo ug nagkurog silang tanan sa kalisang. Ang tanang tawo sa mga lungsod sa Tiro, Sidon, Sur, Ocina, Jamnia, Asdod ug Ascalon nangahadlok pag-ayo.