Sirac 28 - Cebuano Meaning-Based Bible

1Ang Ginoo nagtimaan sa imong mga sala ug kon manimalos ikaw sa usa ka tawo, ang Ginoo manimalos usab kanimo.

2ApanMat. 6:14; Mar. 11:25. kon pasayloon mo ang usa ka tawo nga nakasala kanimo, ang imong mga sala pasayloon kon mag-ampo ikaw.

3Dili ikaw makapaabot nga ang Ginoo magpasaylo kanimo samtang nagbaton ikaw ug kaligutgot batok sa imong isigkatawo.

4Ikaw mismo usa ka makasasala ug kon dili ikaw mopasaylo sa uban, ikaw walay katungod sa pag-ampo nga ang Ginoo mopasaylo kanimo sa imong mga sala.

5Kon dili ikaw makawagtang sa imong kasuko, dili ikaw makalaom nga pasayloon—ikaw tawo lamang.

6Hunahunaa kini! Moabot ang adlaw nga mamatay ikaw ug ang imong lawas madunot. Busa hunong na sa pagdumot ug pagpuyo na subay sa mga sugo sa Ginoo

7kay ang mga sugo anaa sa kasabotan sa Labing Halangdon. Inay maguol ka tungod sa mga kasaypanan sa imong isigkatawo, ayaw na lang kini pagtagda.

Panaglalis

8Kon maglikay ikaw sa mga lalis, dili ikaw makasala pag-ayo tungod kay ang kainit sa buot mao man ang nagsugod niini.

9Usa ka sala ang pagputol sa usa ka panaghigalaay pinaagi sa pagpaaway sa mga managhigalaay.

10Sa magkadaghan ang sugnod, mosamot kainit ang kalayo. Sa magdugang ang kagahi sa ulo, magkainit ang panaglalis. Ug sa magkakusganon ug magkadato ang tawo, labaw siyang makahimo sa pagkasuko.

11Ang usa ka panaglalis nga mosilaob lang dayon mahimong mosangko sa pagpinatyanay.

12Makahuyop ikaw sa usa ka baga aron kini mosilaob o makaluwa ikaw niini aron kini mapalong. Sa bisan unsang paagi makahimo ikaw niini sa imong baba.

Ang Daotang Panagsulti

13AngSir. 51:2-6; San. 3:5-12. mga manglibak ug ang mamakak angay nga tunglohon tungod kay sila mao ang makalaglag sa daghang mga tawo nga nagkinabuhi nga malinawon sa uban.

14Daghang kinabuhi ang naungkag ug nahinginlan sa ilang mga panimalay tungod kay adunay mga tawo nga nanghilabot sa ilang pagpuyo. Ang pagpanghilabot sa uban maoy hinungdan sa pagkagun-ob sa malig-ong mga siyudad ug sa mga panimalay sa tinahod nga mga tawo.

15Ang mga hilabtanon maoy hinungdan nga ang mga buotan nga mga asawa gipamulagan ug nasakmitan sa tanang mga butang nga ilang gihagoan.

16Bisan kinsa nga magtagad sa bakak nga pasangil dili gayod makakitag kalinaw sa hunahuna.

17Ang usa ka latigo makahimog usa ka labod apan ang dila nga magpatakag sulti makabali sa mga bukog.

18Mas daghan ang mga tawo nga nangamatay tungod sa mapasagarong mga sulti kay sa nangamatay pinaagi sa espada.

19-20Isipa ang imong kaugalingon nga palaran kon wala ka makasinati sa walay hinungdang mga tabi nga gitumong batok kanimo kay kini sama ra nga nagsul-ob ikaw nianang puthaw nga yugo sa imong liog o niadtong mabug-at nga mga kadena diha sa imong mga bitiis.

21Ang bakak nga mga pasangil mosangko ngadto sa usa ka alaot nga kamatayon; apan sa tinuoray, mas maayo pa nga mamatay ka.

22Hinuon ang diosnon nga mga tawo dili madaog sa bakak nga mga pasangil; dili sila mapaso sa kalayo niini.

23Ang mabiktima niini mao ang mga mibiya sa Ginoo; human kadusliti ang kalayo sa bakak nga mga pasangil diha kanila, dili kini mapalong. Ang bakak nga pasangil motukob kanila sama sa usa ka liyon ug mokuniskunis kanila sama sa usa ka liyopardo.

24Dili ba koralon man nimo ang imong yuta? Dili ba kandadohan man nimo ang sudlanan sa imong salapi?

25Busa sa samang pagmatngon, pagbantay sa imong isulti. Timbangtimbanga ang matag pulong ug pag-andam ug usa ka kandado alang sa imong baba.

26Tingali adunay usa ka tawo nga naghulat kanus-a ikaw masayop ug kon dili ikaw magbantay, masukamod ikaw sa kaugalingon nimong mga pulong ug malukapa diha sa atubangan niya.