Tobit 3 - Cebuano Meaning-Based Bible

Ang Pag-ampo ni Tobit

1Nasubo ako pag-ayo ug naulaw ug sa ingon nag-ampo ako sa pag-ingon:

2“Matarong ikaw, O Ginoo!

Maluluy-on ikaw sa tanan nga imong gibuhat,

matinumanon sa imong mga paagi.

Ikaw ang maghuhukom niining kalibotana.

3-4Nangamuyo ako kanimo, kaluy-i ako.

Ayaw ako siloti tungod sa akong mga kasal-anan,

bisan gani tungod sa mga sala nga wala nako hisayri.

Ang akong mga katigulangan

misukol ug misupak sa imong mga sugo.

Apan ayaw ako siloti

tungod sa ilang kasal-anan.

Gitugot mo nga ang imong katawhan

masakmitan sa ilang mga butang,

nga sila mabihag ug mapatay.

Gihimo mo kami nga sanglitanan

nga kami tamayon ug yam-iran sa tanan nga mga nasod

diin imo kaming gipatibulaag.

5Gihukman mo ang akong mga katigulangan tungod sa ilang kasal-anan,

ug gisilotan mo ako tungod sa akong mga sala.

Nagbudhi kami ug nagsalikway sa imong kasugoan,

busa ang silot mo kanamo matarong gayod.

6“Karon himoa kanako ang imong gusto.

Kuhaa ang akong kinabuhi,

ug palingkawasa ako niining kalibotana;

pabalika ang akong lawas ngadto sa yuta.

Maayo pa nga mamatay ako.

Nag-antos ako sa mga insulto nga dili angay kanako,

ug nawad-an na ako sa paglaom.

Ginoo, itugot nga matapos na ang tanan kong mga kaguol

ug dad-a ako nganha sa dayong puloy-anan.

Ayaw isalikway ang akong pag-ampo.

Palabihon ko ang kamatayon

kay sa magpabiling buhi apan mag-antos sa pait nga mga insulto.”

Mga Kaguol ni Sara

7Niadtong adlawa usab, sa siyudad sa Ecbatana sa Media, nahitabo nga si Sara, ang anak sa usa ka tawo nga ginganlag Raguel, giinsulto sa usa sa mga sulugoong babaye sa iyang amahan.

8Si Sara naminyo sa makapito apan ang daotang demonyo nga si Asmodeus mipatay sa tagsatagsa niya ka bana sa wala pa mabug-os ang kaminyoon. Ang sulugoong babaye miingon kang Sara, “Tigpatay ka ug bana! Tan-awa ra ang imong kaugalingon. Pito nay imong bana apan walay usa kanila nga nakapuyo ug igong gidugayon aron makapanganak ka.

9Nganong paantuson man kami nimo? Nganong dili ka man molayas ug motipon sa nangamatay nimong mga bana? Hinaot unta nga dili gayod kami makakita ug bisan usa sa imong kaliwat.”

10Hilabihan ang kaguol ni Sara. Mihilak siya ug misaka sa ilang taas ug buot gayod unta siyang maghikog. Apan sa pagpamalandong niya, miingon siya sa iyang kaugalingon, “Dili, dili ako magbuhat niini! Ang akong amahan insultohon sa mga tawo ug moingon sila, ‘Aduna kay bugtong anak nga babaye nga imong gihigugma pag-ayo apan naghikog siya tungod kay mibati siya sa hilabihang kaalaot.’ Ang maong kaguol magdala sa akong tigulang na nga amahan ngadto sa iyang lubnganan ug akoy basolon niini. Busa dili ako maghikog. Mangamuyo lamang ako sa Ginoo nga iya akong tugotan nga mamatay aron dili na ako makabati ug mga insulto.”

Ang Pag-ampo ni Sara

11Busa nag-ampo si Sara duol sa bintana:

“O Dios nga maluluy-on,

angay ka sa among pagdayeg.

Pasidunggan unta kanunay ang imong ngalan;

hinaot unta nga ang imong mga binuhat

magdayeg kanimo sa kanunay.

12Ginoo, nagpaabot ako sa hinabang gikan kanimo.

13Isulti lamang

ug makalingkawas ako niining kinabuhia

aron dili na ako makabati niining mga insulto.

14Nasayod ikaw, O Ginoo,

nga ako ulay hangtod karon;

wala gayod ako kahilabtig lalaki.

15Wala gayod ako magpakaulaw sa akong kaugalingon

o sa ngalan sa akong amahan

samtang nagpuyo kami niining yuta diin kami gibihag.

Ang akong amahan walay laing anak

nga nahimong manununod niya

ug walay paryenti nga akong kapakaslan.

Namatyan na ako ug pito ka bana.

Busa nganong magpakabuhi pa man ako?

Apan kon dili mo kabubut-on nga kuhaon ang akong kinabuhi,

kaluy-i lamang ako.

Ayaw itugot nga makadungog ako pag-usab ug mga insulto.”

Gipatalinghogan sa Dios ang mga Pag-ampo ni Tobit ug ni Sara

16Samtang si Tobit ug si Sara nag-ampo sa nagkalainlaing dapit, ang Dios didto sa langit nagpatalinghog sa ilang mga pag-ampo

17ugNum. 36:6-9; Tob. 6:10-12. nagpadala sa iyang anghel nga si Rafael aron pagtabang kanila. Gipadala siya aron pagkuha sa puti nga habolhabol nga mitabon sa mga mata ni Tobit aron makakita siya pag-usab ug aron paghikay sa kaminyoon ni Sara ug sa anak ni Tobit nga si Tobias, nga sa iyang pagka ig-agaw ni Sara may katungod sa pagpangasawa kaniya. Si Rafael gisugo usab sa paghingilin sa yawa nga si Asmodeus gikan kang Sara. Sa untop nga gutlo nga si Tobit mibalik pagsulod sa ilang balay gikan sa gawas, si Sara nga didto sa iyang balay sa Ecbatana, nanaog gikan sa ilang taas.