Judit 4 - Cebuano Meaning-Based Bible

Ang mga Israelita Naglaraw sa Pagpanalipod

1Ang mga tawo sa Juda nakabalita sa gihimo ni Holofernes, ang heneral nga nagmando sa kasundalohan ni Hari Nabucodonosor, ngadto sa ubang mga nasod. Nakabalita sila giunsa niya pagtulis ug paglaglag ang tanan nilang mga templo.

2Nangalisang sila kaniya ug nahadlok unsa unyay iyang buhaton sa Jerusalem ug sa Templo sa Ginoo nga ilang Dios.

3Bag-o lang silang nahibalik sa ilang puloy-anan sa Juda gikan sa pagkabihag, ug bag-o lang nilang gihalad ang Templo ug ang mga kahimanan ug ang altar niini human kini kapasipad-i.

4Busa nagpadala sila ug usa ka pasidaan ngadto sa tibuok kayutaan sa Samaria ug sa mga lungsod sa Kona, Bet Horon, Belmain, Jerico, Coba ug sa Aesora ug sa Walog sa Salem.

5Ila dayon nga gibutangan ug mga sundalo ang mga tumoy sa mga bukid, gilig-on ang mga balangay didto sa kabukiran ug nagtigom sila ug pagkaon pangandam sa gubat. Maayo gani kay bag-o lamang silang nakaani sa ilang kaumahan.

6Ang Pangulong Pari nga si Joaquim nga didto sa Jerusalem niadtong panahona nagsulat ngadto sa mga tawo sa kalungsoran sa Betulia ug Betomestaim nga nag-atubang sa Walog sa Jezreel duol sa Dotan.

7Gimandoan niya sila nga ilang ukupahon ang mga agianan sa bukid nga padulong sa yuta sa Juda, diin sayon ra ang pagsukol sa usa ka sulong, tungod kay ang agianan may gilapdon nga igo lamang kaagian sa duha ka tawo.

8Gituman sa mga Israelita ang sugo nga gihatag kanila sa Pangulong Pari nga si Joaquim ug sa Konseho nga nagtigom didto sa Jerusalem.

Ang Pag-ampo sa Wala pa ang Gubat

9Ang mga lalaki sa Israel nag-ampo nga mainiton ngadto sa Dios ug nagpuasa.

10Nagsul-obJon. 3:7-8; Est. 4:1-3. sila ug bisti nga sako—sila ug ang ilang mga asawa, ang ilang mga anak, ang ilang mga hayop ug ang tanang mga langyaw nga nagpuyo didto, ang tanang mga ulipon ug sinuholan nga mga mamumuo.

11-12Ila usab nga gitabonan ang ilang altar ug sako. Unya ang tanang mga lalaki, mga babaye ug kabataan sa Jerusalem mihapa sa yuta atubangan sa Templo. Nanghapa sila didto sa presensya sa Ginoo, ang tanan nagsul-ob ug sako ug nagbolibod ug abo sa ilang mga ulo. Naghiusa sila sa mainitong pag-ampo ngadto sa Dios sa Israel, nangamuyo kaniya nga dili unta niya itugot nga madakpan ang ilang mga anak ug mabihag ang ilang mga asawa ug nga dili malaglag ang ilang mga lungsod. Nangaliya sila kaniya nga dili unta hatagan ang mga dili Judio sa kalipay sa pagguba sa Templo ug pagpasipala niini.

13AngEst. 4:16. Ginoo nagpatalinghog sa ilang mga pag-ampo ug nakakita sa ilang mga kasakit. Sulod sa daghang mga adlaw ang mga tawo sa Juda ug sa Jerusalem nagpadayon sa ilang pagpuasa atubangan sa Templo sa Ginoo nga Labing Gamhanan.

14AngJoel 2:17. Pangulong Pari nga si Joaquim, ang mga pari ug ang tanang nag-alagad sa Templo sa Ginoo nagsul-ob ug sako sa ilang paghalad sa adlaw-adlaw sa halad nga sinunog, sa kinabubut-ong mga halad sa mga tawo ug sa mga halad nga gihimo aron pagtuman sa usa ka panaad.

15Giboliboran nilag abo ang ilang mga purong ug nagsinggit sila sa pag-ampo ngadto sa Ginoo, nangamuyo kaniya nga kaluy-an unta niya ang tibuok nasod.