Sirac 30 - Cebuano Meaning-Based Bible

Pagmatuto sa mga Kabataan

1Ang usa ka amahan nga nahigugma sa iyang anak molatos gayod kaniya aron sa kaulahian makapasigarbo siya kaniya.

2Kon pantonon ang usa ka anak, magmapuslanon unya siya ug ang iyang amahan makapasigarbo kaniya ngadto sa iyang mga higala.

3Ang usa ka tawo nga mag-agak pag-ayo sa iyang anak mobati ug garbo kaniya taliwala sa iyang mga higala ug ang iyang mga kaaway masina kaniya.

4-5Samtang buhi, ang amahan malipay nga magsud-ong sa iyang anak. Inigkamatay na niya, dili siya magbasol. Sa pagkatinuod buhi siya kay nagbilin man siya ug anak nga sama kaniya.

6May gibilin siya nga maoy manimalos sa iyang mga kaaway ug maoy mobayad sa mga kaayohan nga iyang nautang sa iyang mga higala.

7Apan ang usa ka tawo nga magpalabig pangga sa iyang anak masamdan lamang. Makulbaan siya sa matag panahon nga makadungog siya ug usa ka singgit.

8Ang usa ka kabayo nga wala mapanton mosuki ug ang usa ka anak nga lalaki nga wala pantona walay kailanan niini.

9Kon pasobrahan mo pagpangga ang imong anak ug makigdula ka kaniya, makapaguol siya kanimo ug mahimo siyang tinubdan sa kasakit.

10Katawa uban kaniya karon ug may adlaw ra nga maghilak ka tungod kaniya. Mokagot ang imong mga ngipon sa pagbasol.

11Ayaw siya hatagi ug kagawasan samtang bata pa siya ug ayaw pasagdi ang sayop nga iyang nahimo.

12Latosa siya samtang bata pa ug himoa nga motahod siya sa imong awtoridad. Kon dili, mahimo siyang gahig ulo ug dili motahod ug mahimo lamang siyang hinungdan sa kaguol.

13Busa pantona ang imong anak ug hatagi siyag buhat aron dili siya mahimong makauulaw kanimo.

Maayong Panglawas

14Mas maayo pa nga kabos apan baskog ug maayog lawas kay sa dato apan masakiton.

15Ang usa ka maayo ug walay sakit nga lawas ug ang usa ka malipayon nga kinaiya labaw kabililhon kay sa bulawan ug sa mga alahas.

16Wala nay makahimo kanimo nga mas adunahan ug makahatag kanimog mas dako nga kalipay kay sa niining duha ka butang.

17Mas maayo pang mamatay ug mopahulay sa dayon kay sa masakit nga wala nay kaayohan.

18Ang labing maayong pagkaon walay bili kon masakiton ka kaayo ug dili makakaon niini; maayo pag ihalad na lang kini ngadto sa usa ka diosdios.

19Apan walay katarongan ang paghalad ug pagkaon ngadto sa usa ka diosdios; dili kini makakaon o makapanimaho niini. Mao usab ang usa ka tawo nga gipahamtangag sakit sa Ginoo.

20Motan-aw siya sa iyang kalan-on ug manghupaw sama sa usa ka lalaki nga gikapon unya makiggakos-gakos sa usa ka dalaga.

Ang Kasadya ug ang Kasubo

21AyawgEcc. 11:9-10. sakita pagtuyo ang imong kaugalingon pinaagi sa pagkaguol.

22Ang kalipay maghatag ug kadasig sa tawo ug maoy hinungdan sa usa ka taas nga kinabuhi.

23Pagpahimulos sa imong kaugalingon ug paglipay; ayaw kaguol. Ang kaguol wala gayoy kaayohan nga mahimo kang bisan kinsa ug kini nakadaot sa daghang mga tawo.

24Kini makapatigulang kanimo. Ang kasina ug ang kasuko makapamubo sa imong kinabuhi.

25Ang usa ka masadya nga tawo nga adunay maayong panan-aw sa mga butang adunay maayong gana sa pagkaon.