Sirac 4 - Cebuano Meaning-Based Bible

1Anak, ayaw hikawi ang kabos sa pagpanginabuhi ug pahulathulata ang nanginahanglan.

2Ayawg hasola ang tawong gigutom o palagota ang tawong nanginahanglan.

3Ayaw dugangi ang mga kaguol sa usa ka tawo nga nawad-an na sa paglaom. Kon anaa siya sa panginahanglan ayaw pag-ugma-ugmaa ang pagtabang kaniya.

4-5Ayaw pagbalibad sa pagtabang sa usa ka makililimos nga anaa sa dakong panginahanglan. Ayaw talikdi ang usa ka tawong kabos ug ayaw siya hatagi ug bisan unsang hinungdan sa pagtunglo kanimo.

6Kon mapungot siya sa hilabihan, tunglohon ka niya ug ang iyang Magbubuhat mopatalinghog sa iyang pag-ampo.

7Himoa nga mainila ikaw diha sa sinagoga. Tahora ang mga tawo nga anaa sa awtoridad.

8Pamatia ang isulti sa kabos ug tubaga sila nga matinahuron.

9Panalipdi ang mga tawo gikan niadtong buot modaugdaog kanila ug pagmalig-on sa imong mga hukom.

10Pagpakaamahan ngadto sa mga ilo ug sangkapi ang mga biyuda sa mga panabang nga dili na ikahatag kanila sa ilang bana. Unya mahisama ikaw sa usa ka anak sa Labing Gamhanan ug higugmaon ikaw niya labaw sa paghigugma sa imong kaugalingong inahan.

Ang Kaalam Sama sa Usa ka Magtutudlo

11Ang Kaalam moatiman sa mga mangita kaniya; siya magbayaw kanila ngadto sa kabantog.

12Ang nahigugma sa Kaalam nahigugma sa kinabuhi mismo; ang nangadlawon sa pagpangita kaniya mapuno sa kalipay.

13Bisan kinsa nga makakab-ot sa Kaalam pasidunggan pag-ayo. Bisan asa siya moadto, ang Ginoo magpanalangin.

14Ang mga sulugoon sa Kaalam mga sulugoon usab sa Dios nga Balaan ug ang Ginoo mahigugma sa tanan nga nahigugma sa Kaalam.

15Sila nga nagtahod sa Kaalam maghatag sa matarong nga mga hukom; sila nga mamati kaniya makabaton sa matuod nga seguridad.

16Ibutang ang imong pagsalig diha sa Kaalam ug mabatonan nimo siya ug mapanunod siya sa imong mga kaliwat.

17Sa sinugdan, ang Kaalam magdala kanimo ngadto sa malisod nga mga agianan. Himoon ka niya nga mahadlok sa hilabihan busa maghunahuna ka nga dili ka na mopadayon. Ang disiplina nga iyang pangayoon makasakit ug sulayan ikaw niya sa iyang pangayoon hangtod mosalig siya kanimo sa hingpit.

18Unya moabot siya nganha kanimo sa walay langan, magpadayag kanimo sa iyang mga tinagoan ug lipayon ka niya.

19Apan kon motipas ikaw, biyaan ikaw niya ug pasagdan ka nga mahulog ngadto sa imong kaugalingong kalaglagan.

Pagsalig sa Kaugalingon

20Buhata ang tanan sa hustong panahon ug pagbantay batok sa daotan. Ayaw tamaya ang imong kaugalingon.

21Ang pagkamapaubsanon angay sa pasidungog ug pagtahod apan ang usa ka ubos nga pag-ila sa imong kaugalingon magdala kanimo ngadto sa sala.

22Ayaw itugot nga lupigan ka lamang sa uban; ayaw itugot nga madaot ka tungod lamang kay wala nimo barogi ang imong katungod.

23Ayaw pag-ukon-ukon sa pagsulti kon ang higayon mangayo niini. Ayaw tagoa ang imong kaalam.

24Ang imong kaalam ug edukasyon mahibaloan pinaagi sa imong isulti.

25Apan ayaw pagsupak sa kamatuoran ug hinumdomi nga wala ka mahibalo sa tanang butang.

26Ayaw kaulaw sa pagkompisal sa imong mga sala; kawang lamang ang pagsulay sa pagpahunong sa dagayday sa usa ka suba.

27Ayaw pagtugot nga gawongan ka sa usa ka tawo nga kuwanggol ug ayaw pagdapig sa gamhanang mga tawo.

28Barogi ang matarong bisan kon bayran mo kini sa imong kinabuhi; ang Ginoong Dios makig-away dapig kanimo.

29Ayaw pagpatakag tabi, ayaw pagtapol ug ayaw pagdanghag sa imong buhat.

30Ayaw pagpakaliyon diha sa inyo ug ayaw pagsigig pangitag sayop sa imong mga sulugoon.

31AyawBuh. 20:35. pagpangayo kon dalo ka sa pagbalos.