Sirac 10 - Cebuano Meaning-Based Bible

1Ang usa ka maalam nga pangulo mag-edukar sa iyang katawhan ug ang iyang kagamhanan mahimong mahusay.

2Ang tanan nga mga opisyal ug ang tanan nga mga lungsoranon mahisama sa ilang pangulo.

3Ang usa ka hari nga walay disiplina magbanlod sa iyang katawhan ngadto sa kadaotan. Apan ang usa ka kagamhanan mahimong lig-on kon ang mga tawo nga namunoan makinaadmanon.

4Ang Ginoo nag-atiman sa kagamhanan sa kalibotan ug diha niini iyang himoong pangulo ang husto nga tawo sa hustong panahon.

5Ang kalamposan nianang tawhana anaa sa mga kamot sa Ginoo. Ang Ginoo mao ang tinubdan sa dungog nga ihatag ngadto kang bisan kinsa nga opisyal.

Garbo

6Ayaw kasuko sa usa ka tawo tungod sa matag gamay niyang sayop. Ayaw pagbuhat sa bisan unsa tungod sa bul-og sa imong pagbati.

7Ang garbo ug ang pagpanglupig gikontrahan sa Ginoo ug sa tawo.

8Ang pagpanglupig, garbo ug ang bahandi nakapukan sa mga nasod gikan sa gahom ug unya mitunga ang laing mga nasod aron mopuli sa ilang dapit.

9Kita mga abog ug agiw lamang busa unsa may ania kanato nga angay natong ipasigarbo? Ang atong lawas nagkadunot bisan gani buhi pa kita.

10Ang dugay na nga sakit makalibog sa mananambal. Bisan ang usa ka hari mahimo nga buhi karon ug ugma patay na.

11Inigkamatay sa usa ka tawo, ang tanan nga iyaha mao lamang ang mga wati, mga lagong ug mga ulod.

12Ang garbo magsugod sa diha nga ang usa ka tawo mobiya sa Ginoo nga iyang magbubuhat.

13Ang garbo sama ug tubod nga nagbubo ug sala ug bisan kinsa ang magpabilin mapuno sa pagkadaotan. Maoy hinungdan nga ang Ginoo nagdalag makalilisang nga silot ngadto sa pipila ka mga tawo ug gilaglag sila sa hingpit.

14Gipapahawa

22Ang mga dato, mga bantogan ug mga kabos nga mga tawo—ang ilang himaya mao ang ilang kahadlok sa Ginoo.

23Dili maayo nga tamayon ang usa ka tawong kabos nga maalamon ug dili usab maayo nga pasidunggan ang usa ka makasasala.

24Ang mga tawo nga anaa sa gahom, ang mga pangulo ug ang mga maghuhukom pasidunggan apan walay usa kanila nga molabaw sa usa ka tawo nga mahadlokon sa Ginoo.

25Ang usa ka ulipon nga maalamon alagaran sa mga tawo nga gawasnon ug ang tawong maayog panabot dili magbagulbol.

Pagpaubos ug Pagtahod sa Kaugalingon

26Sa diha nga mohimo ka sa imong buluhaton, ayaw ipasigarbo ang imong katakos ug ayaw pagpakaaron-ingnon kon anaa ka sa kasamok.

27Mas maayo pa nga motrabaho ug makabaton ug sobra sa imong gikinahanglan kay sa magsuroysuroy ug manghambog apan gutom.

28Anak, hatagig pagtamod ang imong kaugalingon apan pagpabilin nga mapaubsanon. Hatagi ang imong kaugalingon sa imong tinuod nga bili.

29Dili maayo nga tamayon sa usa ka tawo ang iyang kaugalingon. Walay motahod sa usa ka tawo nga dili makamaong motahod sa iyang kaugalingon.

30Ang mga kabos pasidunggan tungod sa maayong paggamit sa ilang panghunahuna ug ang mga dato pasidunggan tungod sa ilang bahandi.

31Kon ang tawo pasidunggan samtang kabos siya, unsa pa kaha kon madato siya! Kon ang usa ka tawo tamayon samtang dato siya, unsa pa kaha kon mapobre siya!