1Samtang si Hari Antioco IV milabay sa Mesopotamia, nakadungog siya mahitungod sa usa ka siyudad didto sa Persia nga ginganlan ug Elymais nga gibantog sa iyang kadato sa plata ug bulawan.
2Ang templo bahandianon kaayo ug may mga taming nga bulawan, salipod sa dughan ug mga hinagiban nga gibilin didto ni Alejandro, anak sa hari nga si Felipe sa Macedonia nga mao ang unang naghari sa emperyong Grego.
3Miabot si Antioco ug misulay sa pag-ilog sa siyudad ug sa pagpanakmit sa mga butang niini apan wala siya molampos tungod kay ang mga lungsoranon nasayod man sa gilaraw niya
4busa gitigom nila ang ilang mga kasundalohan aron pagsukol kaniya. Unya uban sa dakong kapakyasan misibog siya aron pagbalik ngadto sa Babilonia.
5Didto sa Persia, usa ka sinugo ang miabot kaniya nga nagdala sa balita nga ang mga kasundalohan nga iyang gipadala ngadto sa Judea naparot.
6Si Lisias ug ang iyang dakong panon sa kasundalohan napugos sa pagsibog gikan sa mga Judio nga nalig-on na tungod sa dugang nga mga hinagiban, kahimanan ug mga sinakmit nga ilang nakuha gikan sa kasundalohan nga ilang nabuntog.
7Giguba
17Sa pagkasayod ni Lisias nga namatay na ang hari, gihimo niya ang batan-on nga si Antioco nga hari puli sa iyang amahan. Gimatuto niya si Antioco sukad sa pagkabata niini ug karon gihatagan niya kini sa ngalan nga Eupator.
Ang Pagpakiggubat ni Antioco V ug ni Lisias(2 Mac. 13:1-26; 11:22-26)18Niining tungora, ang mga kaaway didto sa kota sa Jerusalem mibabag sa katawhan sa Israel didto sa dapit nga naglibot sa Templo ug sa walay puas naghatag sila ug kagubot ug nagpaluyo sa mga dili Judio.
19Busa mihukom si Judas sa pagpuo kanila, ug gitawag niya ug gitigom ang tanan nga mga tawo aron paglibot sa kota.
20Ang mga tawo nagtigom ug gilibotan nila ang kota sa tuig 150. Nagtukod sila ug mga plataporma nga iglilibot ug mga kahoy nga igdudumbol.
21Apan ang pipila sa mga lalaki nga gilibotan nakaikyas, ug uban sa pipila ka mga Judio nga mabudhion, nangadto sila sa hari ug miingon,
22“Hangtod kanus-a ang imong paghulat una ka manimalos sa gihimo ngadto sa atong katagilungsod?
23Andam kami sa pag-alagad sa imong amahan, pagsunod sa iyang mga mando ug pagsugot sa iyang mga sugo.
24Apan unsa may kaayohan nga nahimo niini alang kanamo? Karon ang atong kaugalingong katagilungsod nahimong atong mga kaaway. Sa pagkatinuod, gipatay nila ang daghan kanamo kutob sa ilang hisakpan ug gisakmit ang among mga kabtangan.
25Apan dili lamang kami ang ilang gidagmalan. Giataki usab nila ang tanan nilang kasilinganan
26ug karon ilang gilibotan pagsulong ang kota sa Jerusalem ug naglaraw sila sa pagkuha niini. Gilig-on usa nila ang Templo ug ang Betzur.
27Gawas kon molihok ka dayon, magbuhat sila ug labaw pa niini ug dili na ikaw makapugong kanila.”
28Sa pagkadungog niini sa hari napungot siya. Gitigom niya ang tanang mga pangulo sa kasundalohan, ang mga opisyal sa mga sundalong nagkabayo ug ang ilang labing sinaligang mga magtatambag.
29Nanuhol usab siya ug mga sundalo gikan sa ubang mga nasod ug gikan sa mga pulo nga Grego.
30Ang iyang mga kasundalohan mikabat ug 100,000 ka sundalong naglakaw ug 20,000 ka sundalong nagkabayo ug 32 ka elepante nga gibansay alang sa gubat.
31Ang hari ug ang iyang kasundalohan milatas sa Edomea ug gilibotan nila ang Betzur diin nakig-away sila sa taas nga panahon. Nagbuhat sila ug mga kahoy nga igdudumbol ug mga plataporma nga iglilibot pag-ataki apan ang mga nanalipod nakiggubat nga maisogon ug nanggula sa lungsod ug gisunog nila ang mga plataporma.
32Unya gipasibog ni Judas ang iyang mga tropa gikan sa kota sa Jerusalem ug gipahimutang ang iyang kampo didto sa Bet Zacarias aron sa pagbabag sa kasundalohan sa hari.
33Sayo sa pagkasunod buntag, ang hari uban sa iyang kasundalohan mipadayon ngadto sa dalan sa Bet Zacarias diin sila nagpahimutang ug nangandam alang sa gubat. Gipatingog nila ang ilang mga trumpeta
34ug giandam nila ang mga elepante alang sa gubat pinaagi sa pagpakita kanila sa mga duga sa ubas ug sa duga sa kahoy nga mulberi.
35Ang dagkong mga mananap giapod-apod ngadto sa mga pundok sa kasundalohan nga naglakaw. Usa ka libo ka sundalo nga nagsul-ob ug salipod sa lawas nga kadena ug mga kalo nga bronsi ang gipahimutang uban sa tagsatagsa ka elepante. Ang tagsatagsa ka elepante giubanan usab ug 500 ka piniling sundalong nagkabayo
36nga nag-uban kanunay sa elepante.
37Sa bukobuko sa matag elepante adunay usa ka lig-on ug sinalipdang plataporma. Hinimo kini gikan sa kahoy ug gihigot pag-ayo diha sa lawas sa elepante. Tulo ka sundalo ang anaa sa ibabaw sa matag elepante walay labot sa tigdumala sa elepante.
38Ang nahibilin sa mga sundalong nagkabayo gibutang ni Lisias didto sa duha ka kilid sa panon sa kasundalohan diin kapanalipdan sila sa mga sundalong naglakaw samtang mag-asdang sa kaaway.
39Ang silaw sa adlaw mibanda sa mga taming nga bronsi ug bulawan, misidlak didto sa mga bukid ug mikidlap sama sa mga nagsiga nga sulo.
40Ang usa ka bahin sa kasundalohan sa hari nakatag didto sa ibabaw nga dapit sa bakilid sa bukid ug ang laing bahin didto sa ubos ug silang tanan makanunayong nag-irog paingon sa unahan nga maayong pagkahan-ay.
41Ang tanan nga mga tawo nangalisang sa pagkadungog nila sa kabanha nga nahimo sa kinanaas sa hinagiban ug sa pagpanggula niadtong dako ug gamhanan nga kasundalohan.
42Midasdas si Judas ug ang iyang kasundalohan ug napatay dayon nila ang 600 sa mga sundalo sa hari.
43Sa pagkakita ni Eleazar Abaran nga usa sa mga elepante mas dako kay sa uban ug nga gitabonan kini sa mga taming sa hari, nagtuo siya nga ang hari nagsakay didto.
44Misakripisyo si Eleazar sa iyang kinabuhi aron pagluwas sa iyang katawhan ug pagkab-ot sa kabantog nga walay kataposan.
45Midagan siya nga maisogon padulong sa elepante nga didto sa taliwala sa usa ka batalyon sa kasundalohang naglakaw. Midasdas siya ug gipatay niya ang mga tawo sa tuo ug sa wala busa ang mga kaaway sa atubangan niya nanibog ug nagpadaplin.
46Misuong siya ilalom sa elepante ug gidunggab niya kini hangtod nga namatay apan hitumbahan siya niini ug namatay usab siya.
47Apan sa pagkakita sa mga Judio unsa kalig-on ang kasundalohan sa hari ug unsa ka hugot ang ilang hunahuna sa pagpakiggubat, misibog sila.
48Ang hari ug ang iyang kasundalohan miabante aron pagpakiggubat sa mga Judio didto sa Jerusalem ug nagkampo sila libot sa tibuok nga Judea ug sa Jerusalem.
49Nakigsabot siya sa mga Judio sa Betzur ug ang mga Judio didto namiya na lamang usab kay wala may igo nga pagkaon didto sa lungsod alang kanila aron pagsukol sa naglibot nga kaaway tungod kay tuig man kadto nga igpapahulay ug walay lagutmon nga gitanom.
50Gikuha sa hari ang Betzur ug gibutangan didto ug usa ka pundok sa mga tropa aron pagpanalipod niini.
51Unya nagkampo siya atubangan sa Templo sa taas nga panahon. Nagbutang siya ug mga plataporma libot niini, mga igdudumbol nga kahoy, mga tungtonganan nga galamiton sa pagsaliyab ug kalayo ug mga bato ug ubang mga hinagiban aron pagsalibay sa mga bangkaw ug mga bato.
52Ang mga Judio naghimo usab ug mga makina sa gubat aron pagsukol niadtong mga makina sa kaaway ug busa ang gubat nagpadayon sa taas nga panahon.
53Apan wala nay pagkaon nga nahibilin didto sa mga panudlanan sa Templo tungod kay tuig man kadto nga igpapahulay ug ang tanan nga pagkaon nga natigom didto gihurot man sa mga tawo nga nanagan gikan sa mga dili Judio ug midangop didto sa Judea.
54Ang kakulang sa pagkaon hilabihan kadako busa daghan sa mga tawo ang nagkatibulaag ngadto sa ilang mga puloy-anan ug pipila lamang ka mga lalaki ang nahibilin didto sa Templo.
55Niining tungora, si Felipe nga gitudlo ni hari Antioco sa wala pa siya mamatay aron pag-edukar sa iyang anak sa pagkahari,
56nahibalik gikan sa Persia ug Media. Nahibalik siya uban sa kasundalohan sa hari ug naglaraw sa pag-ilog sa kagamhanan. Sa pagkadungog ni Lisias niining balitaa,
57naghimo siya ug hinanali nga mga pangandam aron pagsibog. Miingon siya ngadto sa batan-ong hari, sa iyang mga opisyal ug sa iyang mga tawo, “Nagkahuyang kita matag adlaw; kulang kita sa kasangkapan ug lig-on kining dapita nga gilibotan nato. Gawas pa, adunay dinalian nga mga buhat sa gobyerno nga nagkinahanglang among atimanon.
58Busa karon maghikay kita ug usa ka panagsabot sa kalinaw uban sa mga Judio ug sa ilang tibuok nga nasod.
59Tugotan ta sila sa pagsunod sa ilang kaugalingong mga balaod ug mga pamatasan sama kaniadto. Kining tanang kagubot nagsugod sa diha nga ato silang gipalagot pinaagi sa pagpahunong sa ilang mga balaod ug mga pamatasan.”
60Kining sugyot nakapahimuot sa hari ug sa mga opisyal busa si Lisias mitanyag ug mga kondisyon sa kalinaw ngadto sa mga Judio ug gidawat nila kini.
61Sa pag-uyon sa hari ug sa iyang mga opisyal nga magsubay sila niining mga kondisyon, ang mga Judio nanggula sa ilang mga kota.
62Apan sa pagsulod sa hari sa dapit sa Templo didto sa Bukid sa Sion ug sa pagkakita niya sa lig-on nga mga kota, wala niya tumana ang iyang pulong ug misugo siya nga gub-on ang mga paril nga naglibot sa Templo.
63Unya midali siya pagbiya ug mibalik ngadto sa Antioquia diin hikaplagan niya si Felipe nga nagmando sa siyudad. Giataki sa hari ang siyudad ug nailog niya kini pinaagi sa kusog.
Who We AreWhat We EelieveWhat We Do
2025 by iamachristian.org,Inc All rights reserved.
