Sirac 22 - Cebuano Meaning-Based Bible

Ang Katapol ug ang Kabuang

1-2Ang tawo nga tapolan walay kalainan sa tai; luod siya ug walay tawo nga moduol kaniya.

3Ang anak nga lalaki nga bugoy usa ka kaulawan sa amahan; ang usa ka anak nga babaye makapobre.

4Ang usa ka but-an nga anak nga babaye makakitag bana apan ang usa ka anak nga babaye nga walay ulaw nagdalag kaguol sa iyang amahan.

5Ang usa ka babaye nga walay kaulaw magdalag kaulawan sa iyang bana ug sa iyang amahan. Walay motahod kaniya.

6Ang wala sa lugar nga pagpahimangno sa imong mga anak nahisama sa pag-awit ngadto sa mga tawo nga nagbangotan. Apan ang paglatos maoy usa ka maalamon nga pagdisiplina sa bisan unsang panahon.

7Ang pagsulay pagtudlo sa usa ka buang nahisama sa pagpahiuli sa usa ka nabuak nga kulon o sa pagpukaw sa usa ka tawo nga nahinanok pag-ayo.

8Ang pagpasabot ug usa ka butang ngadto sa usa ka buang nahisama sa pagpasabot ngadto sa usa ka tawo nga katulgon; inigkahuman nimog sulti, moingon siya, “Unsa gani kadto?”

11Magbangotan kita alang sa patay kay dili man sila makakita sa kahayag. Angay nga magbangotan kita alang sa mga buang kay dili man sila makakab-ot sa pagsabot. Ang tinuod, angay nga labi kitang magbangotan alang sa mga buangbuang kay ang ilang mga kinabuhi mas daotan pa kay sa kamatayon kay ang mga patay nakapahulay na man.

12SulodGen. 50:10; Jdt. 16:24. sa pito ka adlaw magbangotan kita sa patay apan ang usa ka tawo nga buangbuang o kaaway sa Dios mahimong hinungdan sa usa ka kagul-anan nga molungtad sa tibuok nga kinabuhi.

13Ayaw duawa ang mga tawo nga kulangkulang o paggahin ug dakong panahon sa pagpakigsulti kanila. Likayi sila; unya dili sila makatakod kanimo ug makapuyo ikaw diha sa kalinaw nga walay magsamok kanimo ug dili ikaw maugtas sa ilang kabuang.

14Ang maong mga tawo maoy palas-anon nga mas mabug-at pa kay sa tingga ug ang bugtong pulong nga sibo kanila mao ang “mga buangbuang.”

15Mas sayon ang pagpas-an sa usa ka sako nga balas, asin o puthaw kay sa pagpakig-uban sa usa ka tawo nga buangbuang.

16Ang usa ka troso ikapalig-on sa usa ka balay aron dili kini matay-og sa linog. Busa ang usa ka tawo nga binansay sa paggamit sa katarongan ug sa maayong panabot dili matarog kon moabot na ang kalisdanan.

17Ang usa ka tawo nga maalamong naghunahuna sa mga butang nahisama sa usa ka malig-on nga paril nga gidayandayanan pag-ayo.

18Ang gagmay nga mga bato ibabaw sa usa ka paril dili magpabilin didto inighapak sa hangin, ug ang usa ka tawo kansang binuang nga mga hunahuna nakapatalawan kaniya, dili makahimo sa pagbarog diha sa mga makahadlok nga mga hitabo.

Ang Panaghigalaay

19Kon mapuling ikaw, moagas ang mga luha; kon makasilo ikaw pag-ayo sa isigkatawo, masuta mo ang iyang matuod nga gibati.

20Kon labayon mog mga bato ang mga langgam, manglupad sila ug kon insultohan mo ang usa ka higala, mabungkag mo ang inyong panaghigalaay.

21-22Bisan kon makiglalis ka pag-ayo sa usa ka higala ug magsulti sa mahait nga mga pulong, wala mapildi ang tanan. Mahimo gihapon nga makig-uli ka kaniya. Apan bisan kinsang higala motalikod kanimo kon insultohan mo siya, kon garboso ka, kon ipanabi mo ang iyang mga tinagoan o kon budhian mo siya sa wala lang niya damha.

23Himoa nga mosalig kanimo ang imong silingan nga kabos; unya makaambit ikaw sa iyang kalipay kon mahimo siyang malampuson. Unongi siya kon anaa siya sa kalisdanan ug makaambit ka sa iyang kalipay kon moabot na kaniya ang kahamugaway.

24Ang inalisngaw ug ang aso makita sa dili pa ang kalayo; ang mga insulto moabot sa dili pa ang paggamit sa kusog.

25Dili gayod ako mahadlok sa pagpanalipod sa usa ka higala ug dili gayod nako talikdan ang usa ka higala kon magkinahanglan siya kanako.

26Apan kon may kadaot nga moabot kanako tungod kaniya, ang tanan nga mahibalo niini magbantay gayod kaniya.

Usa ka Pag-ampo aron Tabangan batok sa Sala

27Buot unta ako nga adunay usa ka guwardiya nga ikabutang sa akong baba aron ang akong mga ngabil maalamon unta nga matak-om. Maglikay kini kanako gikan sa mga sayop ug maoy magpugong kanako sa pagdaot sa akong kaugalingon pinaagi sa akong dila mismo!