Sirac 33 - Cebuano Meaning-Based Bible

1Walay kadaot nga moabot sa usa ka tawo nga mahadlokon sa Ginoo; bisan makadaghan pa moabot ang peligro, ang Ginoo moluwas gayod kaniya.

2Ang usa ka tawo nga walay pagtagad sa Balaod wala magbaton ug maayong panghunahuna ug bisan kinsa nga dili kinasingkasing ang pagtuman niini mahisama sa usa ka baroto nga gikusokuso sa unos.

3KonExo. 28:30; Sir. 45:10. maalamon ka, motuo ikaw sa Balaod; makaplagan mo kini nga sama ka kasaligan sa pagripa ginamit ang Urim.

4Andama ang imong isulti ug ang mga tawo mamati kanimo. Gamita ang imong makat-onan sa dili pa ikaw mosugod pagsulti.

5Ang hunahuna sa usa ka tawo nga buangbuang sama sa usa ka ligid sa karomata nga magsigi lamang ug tuyoktuyok.

6Ang usa ka higala nga mabiaybiayon nahisama sa usa ka ihalas nga kabayo nga mobahihi bisan kinsay mosulay pagkabayo niini.

Ang mga Tawo Dili Managsama

7Nganong ang ubang mga adlaw mas bililhon man kay sa uban bisan kon mao ra gihapon nga adlaw ang mosubang sa matag adlaw sa tibuok tuig?

8Tungod kay ang ubang mga adlaw gitakda man sa Ginoo ingon nga mga adlaw nga balaan ug mga adlaw sa kasaulogan.

9Gihimo niya ang ubang mga adlaw nga balaan ug importante ug ang ubang mga adlaw gihimo niya nga ordinaryo.

10Ang tagsatagsa ka tawo gibuhat gikan sa yuta sama kang Adan.

11Apan ang Ginoo, diha sa iyang kaalam, nagbuhat kanilang tanan nga nagkalainlain ug gihatagan sila ug nagkalainlaing mga tahas.

12Ang uban iyang gipanalanginan; ang uban gihimo niya nga dungganan ug balaan ug gibutang haduol kaniya. Ang uban iyang gitunglo ug gihimong ubos ug gipapahawa sa ilang mga katungdanan.

13Maingon nga ang lapok anaa sa mga kamot sa magkukulon aron iyang pormahon sumala sa iyang gusto, kita usab ania sa mga kamot sa atong Magbubuhat aron magbuhat siya sumala sa iyang gusto.

14Ang maayo kaatbang sa daotan, ang kinabuhi kaatbang sa kamatayon ug ang sala mao ang kaatbang sa pag-alagad sa Ginoo.

15Hunahunaa kini: gihimo sa Labing Halangdon nga magparisparis ang matag butang.

16Mahitungod kanako, ako ang kataposan nga mitambong sa akong katungdanan. Sama ako sa nanghagdaw diha sa parasan sa bisan unsa nga nakalimtan sa mga mamumupo sa ubas. Apan ang Ginoo nanalangin kanako ug maayo ang akong nabuhat sama sa usa ka mamumupo sa ubas nga nakapuno sa iyang galingan sa bino.

17Apan buot ko nga mahibalo kamo nga wala ako maghimo niining tanang buhat alang lamang sa akong kaugalingon kondili alang sa tanan nga buot makakat-on.

18Pamati kamo kanako, kamong tanan nga bantogang pangulo! Kamong tanan nga mga pangulo sa mga tigom, pamati kamo unsa ang akong isulti!

Ayaw Pagsalig sa Uban

19Samtang buhi ka pa, ayaw gayod paghatagi ug gahom ibabaw kanimo si bisan kinsa: ang imong anak, asawa, igsoon, higala. Ayaw ihatag ang imong katigayonan kang bisan kinsa kay tingali ug mausab ang imong hunahuna ug bawion mo kini.

20Samtang buhi ka pa, ayaw pagtugot nga may bisan kinsa nga magbuot sa imong kinabuhi.

21Mas maayo nga ang imong mga anak magsalig kanimo kay sa ikaw maoy magsalig kanila.

22Himoa nga anaa ubos sa imong pagbuot ang tanan nga imong buhaton; ayaw pagtugot nga may bisan unsa nga makabuling sa imong maayong dungog.

23Paghulat hangtod sa kataposang gutlo sa imong kinabuhi ug sa diha nga magtinga ka na, bahina ang imong katigayonan ngadto sa imong mga manununod.

Ang Pagdumala sa mga Ulipon

24Ang usa ka asno angay nga hatagan sa iyang lawog ug sa iyang karga ug kinahanglang bunalan siya. Ang usa ka ulipon angay nga hatagan sa iyang pagkaon ug sa iyang buhat ug kinahanglang pantonon siya.

25Kon hatagan mog buluhaton ang imong ulipon, wala ka nay kabalak-an. Kon dili mo siya hatagag buluhaton mangita siya ug kagawasan.

26Makagamit ka ug usa ka renda ug yugo aron motahod ang usa ka mananap ug ang usa ka ulipon mahimong sakiton diha sa bilanggoan.

27Pabuhata siya kanunay ug ayaw pagtugot nga siya magtanga; ang pagtanga makatudlo lamang kaniya unsaon paghimog daotan.

28Ang buhat mao ang iyang gikinahanglan; kon dili siya motahod kanimo, kadenahi siya.

29Apan ayaw pagpalabig estrikto kang bisan kinsa ug ayaw gayod panlupig.

30Kon aduna kay usa ka ulipon, ayoha siya pagdumala sama sa pagdumala nimo sa imong kaugalingon; gibayran mo siya sa hinagoan mo nga salapi.

31Isipa siya sama sa usa ka igsoon; nagkinahanglan ka kaniya sama nga nagkinahanglan ikaw sa imong kaugalingon. Kon dili mo siya ayohon pagdala mokagiw siya, unya asa man ikaw mangita kaniya?