Sulat ni Jeremias 6 - Cebuano Meaning-Based Bible

1MaoJer. 29:1. kini ang usa ka kopya sa sulat nga gipadala ni Jeremias ngadto sa katawhan sa Jerusalem sa hapit na gayod sila bihaga sa hari sa Babilonia ngadto sa iyang nasod. Gisulat dinhi ang mensahe nga gisugo sa Dios kang Jeremias nga ipahatag ngadto kanila.

Ang mga Tawo Nag-atubang ug usa ka Dugayng Pagkabihag

2Nakasala kamo batok sa Dios. Tungod niini bihagon kamo ni Hari Nabucodonosor ug dad-on ngadto sa Babilonia.

3Magpabilin kamo didto nga mga binihag sulod sa daghang katuigan, ingon kadugay sa pito ka kaliwatan. Unya ang Dios magdala kaninyo nga malinawon balik sa inyong puloy-anan gikan sa Babilonia.

4Didto sa Babilonia makit-an ninyo ang mga diosdios nga binuhat gikan sa kahoy, plata ug bulawan—mga diosdios nga pas-anon sa mga tawo ug gikahadlokan sa mga wala magtuo sa Dios.

5Kinahanglan magmatngon kamo nga dili gayod kamo mosundog niadtong mga dili Judio. Ayaw kamo kahadlok sa ilang mga diosdios inigkakita ninyo nga dad-on sila diha sa mga prosisyon ug sa dihang kini pagasimbahon.

6Hinuon, ingna ang inyong kaugalingon, “Ikaw lamang, O Ginoo, ang kinahanglan among simbahon.”

7Ang anghel sa Dios mag-uban kaninyo didto. Magbantay siya kaninyo.

Walay Mahimo ang mga Diosdios

8Ang ilang mga diosdios giputos ug plata ug bulawan ug adunay mga dila nga gikulit sa mga mangungulit. Apan dili sila tinuod nga mga dios ug dili sila makasulti.

9Ang mga tawo maghimog bulawan nga purongpurong ug ibutang kini sa mga ulo sa ilang mga diosdios nga gipakasama nilag mga babaye nga mahigugmaon sa mga alahas.

10Usahay ang mga pari mangawat sa plata ug bulawan gikan sa ilang mga diosdios ug gamiton kini alang sa ilang kaugalingon.

11Gani ihatag nila ang pipila niini ngadto sa mga babayeng nagbaligya sa ilang dungog sa templo. Ang mga tawo magkuha niining mga diosdios nga kahoy, plata ug bulawan ug bistihan nila kini nga mura ug tawo.

12Apan bisan pag ang mga diosdios gibistihan sa mga bisti nga bulok tapol sama sa mga hari, dili gihapon kini makapanalipod sa ilang kaugalingon gikan sa mga anay.

13Sa diha nga ang abog gikan sa templo motugpa sa ilang nawong, kinahanglan adunay mopahid niini.

14Sama sa mga maghuhukom nga tawhanon, nagbitbit sila ug mga sitro apan wala silay gahom sa pagsilot kang bisan kinsa nga maghimo ug daotan kanila.

15Usahay aduna kini silay mga baraw ug mga wasay diha sa ilang mga kamot apan dili sila makapanalipod sa ilang kaugalingon sa panahon sa gubat o gikan sa mga kawatan.

16Kining tanan nagmatuod nga dili sila dios—ayaw sila ninyo pagsimbaha.

17Kadtong mga diosdios nga naglingkod sa ilang mga templo nahisama sa usa ka buak nga panaksan nga walay kapuslanan. Ang ilang mga mata puno sa abog nga nanglupad tungod sa pagpanulod sa mga tawo.

18Gipalig-onan sa mga pari ang mga pultahan sa mga templo pinaagi sa mga trangka ug siradora aron ang mga kawatan dili makalungkab niini. Ang mga diosdios gihipos diha sa mga sudlanan nga giyawehan pagsiguro sama sa usa ka binilanggo nga hapit na pahamtangi sa kamatayon tungod sa usa ka sala batok sa hari.

19Ang mga pari nanagkot ug mga suga alang sa mga diosdios labaw pa gani kay sa gikinahanglan nila alang sa ilang kaugalingon. Apan ang mga larawan sa mga diosdios dili makakita bisan usa kanila.

20Ang sulod niini gikaon sa mga anay sama sa mga busaog nga kahoy sa templo ug ang ilang mga bisti nangadunot apan wala gani sila mahibalo niini.

21Ang mga nawong niini naitom sa anoos didto sa templo.

22Mobatog niini ang mga kuwaknit, mga sayaw ug ubang mga langgam ug bisan ang mga iring moyaka niini.

23Kining tanan nagmatuod nga kini sila dili mga dios—ayaw ninyo sila pagsimbaha.

24Kining mga larawan sa mga diosdios giputos ug bulawan aron mahimong matahom apan dili kini mosidlak gawas kon may tawo nga mopasinaw niini. Inigbubo niini sa mga hulmahan, wala kini silay bation bisan unsa.

25Gipalit kini sila sa bisan unsang bili apan magpadayon kini sila nga walay gininhawa.

26Tan-awa unsa ka walay hinungdan kini sila! Dili sila makalakaw ginamit ang ilang kaugalingong mga tiil kay kinahanglan pa gayod alsahon sila.

27Bisan kadtong nag-atiman niini maulaw kon usa sa ilang mga diosdios mahulog sa yuta ug kinahanglan nga puniton pag-usab. Kon may mopabarog sa usa niini didto sa usa ka dapit, kini dili molihok ug kon magharag, dili gayod kini makatarong sa iyang kaugalingon. Ang paghalad ug mga gasa ngadto kanila sama sa paghalad ug mga gasa ngadto sa usa ka patay.

28Ang mga pari namaligya sa gisakripisyo ngadto sa ilang mga diosdios ug naggamit sa salapi alang sa ilang kaugalingon. Ug ang mga asawa sa mga pari nagtipig sa mga gihalad pinaagi sa asin inay ipaambit sa mga kabos ug sa mga timawa.

29Bisan ang mga babaye nga giabtan sa ilang binulan o ang mga babaye nga bag-o lang nanganak gitugotan sa paghikap sa mga halad. Kining tanan nagmatuod nga kini dili mga dios—ayaw ninyo sila pagsimbaha.

30Unsaon man gayod pagtawag niini ug mga dios nga ang mga babaye tugotan man sa paghimog mga halad alang niining mga butang nga hinimo gikan sa kahoy, plata ug bulawan?

31Ang mga pari molingkod pa gani didto sa mga templo sa ilang pagbangotan, nagsul-ob ug mga gisi nga mga sapot ug inalotan ug walay purong ang mga ulo.

32Ang mga pari maninggit ug motiyabaw sa atubangan sa ilang mga diosdios sama sa nagbangotan tungod sa minatay.

33Huboan nila ang ilang diosdios ug ihatag ang bisti ngadto sa ilang mga asawa ug mga anak.

34Walay sapayan kon ang usa ka tawo motabang o modagmal niining mga diosdios sanglit dili man kini makabalos. Dili kini makahimong hari sa usa ka tawo o makatangtang kaniya gikan sa trono.

35Dili kini makahimong adunahan sa usa ka tawo o makahatag kaniyag salapi. Kon ang usa ka tawo maghimog usa ka panaad apan dili gayod motuman niini, dili gayod kini makahimo pagpabayad kaniya.

36Dili gayod kini makaluwas sa usa ka tawo gikan sa kamatayon ug dili gayod kini makatabang sa usa ka luyahon nga tawo batok sa kusgan.

37Dili kini makapahiuli sa panan-aw sa buta o makaluwas kang bisan kinsa nga anaa sa katalagman.

38Dili kini makatanyag ug kaluoy o makahatag ug hinabang ngadto sa mga biyuda o sa mga ilo.

39Kini silang mga butanga nga binuhat gikan sa kahoy ug giputos ug plata ug bulawan nga walay gahom sama sa bato nga gikan sa bukid. Ang mga tawo nga nagsimba niini maulawan.

40Giunsa man sa mga tawo paghunahuna nga kini mga dios o nganong gitawag man kini nila ug mga dios?

Binuang ang Pagsimba sa mga Diosdios

Ang mga taga-Babilonia nagpakaulaw sa ilang kaugalingong mga diosdios.

41KonIs. 46:1. ang usa ka tawo dili makasulti, dad-on siya nila ngadto sa templo ug mangayo kang Bel nga hatagan siya sa gahom sa pagsulti, bisan kon si Bel dili makasabot.

42Apan bisan kon ang mga tawo nakamatngon nga ang ilang mga dios dili makatabang, nagpadayon gihapon sila sa pagsimba niini busa buangbuang gayod sila.

43Dugang pa niini, ang mga babaye nagbakos ug mga pisi ug naglingkod sa daplin sa dalan, nagsunog ug mga insenso ug nagtanyag sa ilang kaugalingon ingon nga mga babayeng nagbaligya sa ilang dungog. Kon ang usa kanila pakighilawasan, mobalik siya aron pagbiaybiay sa babaye nga naglingkod tupad kaniya nga wala pilia tungod kay walay igong katahom.

44Ang tanan mahitungod niining mga diosdios bakak. Unsaon man paghunahuna ni bisan kinsa nga kini mga dios ug unsaon man pagtawag niini nga mga dios?

45Ang mga mangungulit ug kahoy ug ang mga platero maoy namuhat niining mga diosdios busa wala kini silay mahimo gawas sa tuyo sa naghimo kanila.

46Bisan ang mga nagbuhat kanila wala mabuhi ug dugay busa dili gayod dios ang ilang gibuhat.

47Kining mga tawhana walay laing gibilin gawas sa limbong ug kaulawan ingon nga kabilin alang sa umaabot nga mga kaliwatan.

48Inig-abot sa mga gubat ug kagubot ang mga pari naglaraw asa sila manago uban sa ilang mga diosdios.

49Kining mga diosdios walay mahimo sa panahon sa mga gubat ug mga kagubot. Nganong dili man makaamgo ang mga tawo nga kining mga larawan sa mga diosdios dili mga dios?

50Kining mga larawan sa diosdios dili labaw sa mga kahoy nga giputos sa plata ug sa bulawan. May adlaw ra nga masabtan nga kini sila dili mga dios.

51Ang tanang mga nasod ug mga hari makaamgo nga ang larawan sa mga diosdios binuhat lamang ug tawo. Wala silay gahom sa pagkadios

52ug bisan kinsa angay nga mahibalo nga sa pagkatinuod dili kini mga dios.

53Kining mga gipakadios dili gayod makahimo nga hari kang bisan kinsa o makapaulan.

54Dili kini sila makahimo sa paghukom mahitungod sa ilang kaugalingong mga butang o makahatag ug hustisya kang bisan kinsa nga gilupigan. Wala gayod kini silay mahimo bisan unsa. Kini sila walay kapuslanan sama sa mga uwak nga naglupadlupad libot sa kahanginan.

55Kon ang usa ka templo masunog, ang mga pari managan aron pagluwas sa ilang kaugalingon samtang ang mga diosdios nga hinimo gikan sa kahoy ug giputos ug plata ug bulawan mahibilin nga mangasunog sama sa mga busaog nga kahoy.

56Dili kini makasukol batok sa mga hari o makaasdang sa gubat batok sa mga kaaway. Unsaon man pagtuo ni bisan kinsa nga kini sila mga dios?

57Kining mga diosdios nga kahoy pinutos sa plata ug bulawan. Dili makapanalipod sa ilang kaugalingon batok sa mga kawatan ug mga tulisan

58nga manghilabot sa plata ug sa bulawan sa mga diosdios ug sa mga sinina niini ug manglakaw nga dala kining tanan. Ang mga diosdios walay mahimo aron pagsanta kanila.

59Bisan unsang butanga, isog man siya nga hari o usa ka mapuslanong kulon, mas maayo pa kay sa usa ka mini nga dios. Bisan ang usa ka pultahan mas maayo pa kay sa usa ka mini nga dios kay ang usa ka pultahan makapanalipod man sa mga butang nga anaa sa sulod sa balay. Bisan ang usa ka haligi nga kahoy didto sa palasyo mas maayo pa kay sa usa ka mini nga dios.

60Ang Dios naghatag sa adlaw, bulan ug sa mga bituon aron maghatag sa kahayag ug kini sila nagtuman kaniya.

61Ingon usab niini ang kilat ug ang hangin. Ang kilat makita sa layo ug sa bisan diin ug ang hangin naghuyop sa tanang dapit.

62Sa pagsugo sa Dios sa mga panganod aron kini mokaylap sa tibuok kalibotan, kini mituman.

63Sa diha nga ang Dios nagpadala ug kalayo gikan sa langit aron pagsunog sa mga bukid ug sa mga lasang, gituman niini ang gisugo niya. Ang mga larawan sa mga diosdios dili makahimo niining mga butanga—dili gani kini makahimo sa pagsundog.

64Nganong kinahanglan mang tawgon kini nga mga dios nga dili man gani kini makahimo sa pagtabang kanato o pagdagmal kanato sa bisan unsang paagi?

65Nahibalo kamo nga kini dili mga dios—ayaw ninyo sila pagsimbaha.

66Kining mga diosdios walay gahom sa mga hari. Dili kini makabungat ug mga tunglo batok kanila o makahatag kanila ug mga panalangin.

67Dili kini makahimo alang sa mga nasod bisan unsang tilimad-on sa panganod; dili kini makadan-ag sama sa adlaw o sa bulan.

68Bisan ang mga ihalas nga mga mananap mas maayo pa kay niining mga larawan sa mga diosdios; bisan ang mga mananap mas maayo pa kay niining mga diosdios kay makadagan man sila pahilayo sa peligro aron pagpanalipod sa ilang kaugalingon.

69Busa tin-aw gayod nga kini dili mga dios—ayaw ninyo sila pagsimbaha.

70Kining ilang mga diosdios nga hinimo gikan sa kahoy ug pinutos sa mga plata ug bulawan dili makatabang kay sama lamang kini sa usa ka tawotawo sa umahan; dili gayod kini makapanalipod kanila.

71Sama lamang kini sila sa mga sampinit diha sa usa ka tanaman. Inay makabugaw sila sa mga langgam, nahimo hinuon silang batoganan niini. Kining mga diosdios sama sa patay nga lawas nga itambog ngadto sa kangitngitan.

72Ang mga bisti nga bulok tapol nga ilang gisul-ob mangadunot busa nahibalo kita nga kini dili mga dios. Sa kataposan kan-on kini sa mga anay ug unya walay bisan kinsa nga makagamit niini bisan diin.

73Ang matarong nga tawo adunay bintaha sa uban. Wala siya magbaton ug bisan unsang larawan sa mga diosdios ug dili gayod kini makatonto kaniya.