Tobit 4 - Cebuano Meaning-Based Bible

Ang Tambag ni Tobit kang Tobias

1Nianang adlawa, si Tobit nahinumdom sa salapi nga iyang gibilin kang Gabael didto sa Rages sa Media.

2Miingon siya sa iyang kaugalingon, “Naghangyo ako sa Dios nga tugotan ako niya nga mamatay. Karon tawgon ko ang akong anak nga si Tobias ug tug-anan ko siya mahitungod sa salapi.”

3-4Busa gitawag ni Tobit si Tobias ug giingnan, “Anak, inigkamatay nako, ayoha ang paglubong kanako. Tahora ang imong inahan ug alimahi siya sa tibuok niyang kinabuhi ug inigkamatay na niya ilubong siya tupad kanako. Hinumdomi nga gitahan niya ang iyang kinabuhi aron pagpahimugso kanimo niining kalibotana busa paninguhaa ang paglipay kaniya ug ayaw gayod pagbuhat ug bisan unsa nga makapaguol kaniya.

5“Matag adlaw sa imong kinabuhi, hunahunaa ang Ginoo nga atong Dios. Ayaw gayod pagtuyo sa pagpakasala ug pagsupak sa bisan unsa sa iyang mga kasugoan. Sa kanunay buhata ang matarong ug ayaw gayod pag-apil sa bisan unsang daotan.

6Pagmaligdong ug molampos ka sa bisan unsa nga imong buhaton.

7“PagmanggihatagonDeut. 15:7-8; Pan. 19:17; Sir. 3:30–4:6; 1 Juan 3:17. kang bisan kinsa nga matinumanon sa pagsugot sa Dios. Kon maghinakog ka sa paghatag sa kabos, ang Dios maghinakog usab sa paghatag kanimo.

8Panghatag sumala sa anaa kanimo. Kon aduna kay daghan, daghan usab ang ihatag. Bisan kon gamay ray imoha, paghatag gayod sumala sa imong katakos.

9Kini sama ug salapi nga imong gihipos. Makadawat ikaw sa imong balos sa panahon sa kalisdanan.

10-11Ang pag-atiman sa mga kabos maoy usa ka matang sa paghalad nga makapahimuot sa Dios didto sa langit. Buhata kini ug sigurado nga malikay ka gikan sa mangitngit nga kalibotan sa mga patay.

12“Anak, likayi ang mga babayeng nagbaligya sa ilang dungog. Labaw sa tanan, pangasawa sa usa ka babaye sa atong banay kay kita mga anak nga naggikan sa mga propeta. Ayaw pagpangasawa kang bisan kinsa nga dili nato paryenti. Hinumdomi nga si Noe, si Abraham, si Isaac ug si Jacob, ang atong unang mga katigulangan, nangasawa sa ilang mga paryenti. Gipanalanginan sila sa Dios ug mga anak busa ang ilang mga anak maoy nanunod sa yuta sa Israel.

13Anak, pagmaunongon sa imong kaugalingong mga paryenti. Ayaw pagpalabig kamapahitas-on nga dili ka mangasawa sa usa kanila. Kanang maong pagkamapahitas-on magdala ngadto sa makalilisang nga kapakyasan ug kadaotan sama nga ang katapol magdala ngadto sa hilabihan nga kakabos ug maoy mahimong hinungdan sa gutom.

14“Suholi ang imong mga mamumuo matag adlaw ug ayaw pagpaugmai ang ilang mga suhol. Pasidunggi ang Dios niining paagiha ug gantihan ikaw niya. Himoa ang matarong sa tanang panahon.

15AyawMat. 7:12; Luc. 6:31. gayod pagbuhat kang bisan kinsa ug butang nga dili nimo buot nga buhaton diha kanimo.

“Ayaw pagpalabig inom ug bino hangtod nga mahubog ka ug ayaw pag-anad sa pag-inom.

16“Hatagig pagkaon ang gigutom ug bistihi ang mga tawo nga nagkinahanglan. Kon mahamugaway ka, pagmanggihatagon, ug himoa kini sa maayong kabubut-on.

17“KonDeut. 26:14. ang usa sa mga magtutuo sa Dios mamatay, hikayig pagkaon ang iyang banay apan ayaw gayod pagbuhat niini kon ang mamatay daotang tawo.

18“Pamatia ang tambag sa maayong tawo ug tagda gayod pag-ayo ang mapuslanong tambag.

19“Pahimusli ang tanang higayon sa pagdayeg sa Ginoo nga imong Dios. Hangyoa siya nga hatagag kalamposan ang bisan unsa nga imong gitinguha nga imong buhaton. Wala siya maghatag sa iyang kaalam ngadto sa katawhan sa laing nasod. Siya mao ang tinubdan sa tanang maayo apan mahimo usab niya ang paglaglag ug pagdala kanimo ngadto sa dili kaduhaduhaang kamatayon kon gusto siya.

“Hinumdomi ang tanan kong mga tugon. Ayaw kini hikalimti bisan sa usa ka gutlo.

20“Tobias, buot ko nga masayod ka nga nagbilin ako ug usa ka dakong kantidad sa salapi kang Gabael nga anak ni Gabrias didto sa Rages sa Media.

21Kita1 Tim. 6:6-8. karon kabos apan ayaw kabalaka. Kon magtahod ka sa Dios ug maglikay sa sala, mahimuot siya kanimo ug himoon ka niya nga hamugaway.”