2 Macabeo 2 - Cebuano Meaning-Based Bible

Gitagoan ni Jeremias ang Tolda nga Tagboanan

1“Nahibalo kami gikan sa mga talaan nga si Jeremias, ang propeta, nagtugon sa mga tawo sa dayon na nilang pagkabihag nga patagoan ang pipila ka bahin sa kalayo nga gikan sa altar sumala sa bag-o pa lamang namong gihisgotan.

2Nahibalo usab kami nga gitudloan niya sila sa Balaod sa Dios ug gipasidan-an sila nga dili sila magpalimbong sa mga diosdios nga gidayandayanan ug bulawan ug plata nga ilang makit-an didto sa yuta diin sila bihaga.

3Unya giawhag niya sila nga dili gayod mobiya sa Balaod.

4“Kining maong mga talaan nagtug-an usab kanato nga si Jeremias, uban sa paggiya sa Dios, nagsugo nga ang Tolda nga Tagboanan ug ang Sudlanan sa Kasabotan magsunod kaniya ngadto sa bukid diin si Moises milantaw sa yuta nga gisaad sa Dios alang sa atong katawhan.

5Sa pag-abot ni Jeremias didto sa bukid, nakita niya ang usa ka dakong langub ug didto iyang gitagoan ang Tolda nga Tagboanan, ang Sudlanan sa Kasabotan ug ang altar sa insenso. Unya iyang gitak-opan ang ganghaan.

6“Pipila sa mga higala ni Jeremias ang misulay sa pagsunod kaniya ug sa pagtimaan sa agianan apan wala na sila makakita sa langub.

7Sa pagkasayod ni Jeremias sa ilang gibuhat, gikasab-an niya sila, ‘Kinahanglan nga walay mahibalo mahitungod niining dapita hangtod nga pundokon pag-usab sa Dios ang iyang katawhan ug magpakita siya kanila ug kaluoy.

8NiadtoExo. 16:10; 24:16; 1 Hari 8:10-11. unyang panahona iyang ipadayag hain tagoi kining mga butanga ug ang masulaw nga kahayag sa iyang presensya makita didto sa panganod sama sa panahon ni Moises ug sa diha nga si Solomon nag-ampo aron nga ang Templo ihalad diha sa balaan ug harianong kasanag.’

Ang Paghimo ni Solomon sa Kasaulogan

9“Gitug-anan usab kami nga si Solomon, ang maalamong hari, naghalad ug mga mananap agig paghalad sa bag-ong nahuman nga Templo.

10Sa pag-ampo niya, usa ka kalayo ang mikunsad gikan sa langit ug milamoy sa mga halad sama sa nahitabo sa unang panahon sa dihang nag-ampo ni Moises.

11Gipasabot ni Moises nga ang halad sa sala gilamoy sa kalayo tungod kay kini wala man kan-a.

12Si Solomon naghimo sa kasaulogan sulod sa walo ka adlaw.

Ang Tigomanan sa mga Basahon ni Nehemias

13“Kining maong mga hitabo makita usab sa mga talaan sa hari ug sa kaugalingong talaan ni Nehemias. Si Nehemias nagtigom ug mga basahon lakip ang mga sinulat ni David, ang mga sulat sa mga hari mahitungod sa mga halad ug ang mga basahon mahitungod sa mga hari ug sa mga propeta.

14Gitigom usab ni Judas ang mga basahon nga nangawani tungod sa gubat ug hangtod karon gihuptan pa namo kini.

15Kon magkinahanglan kamo ug bisan unsa niining mga basahona, pahibaloa kami ug amo kining ipadala kaninyo.

Usa ka Pagdapit sa Paghimo sa Kasaulogan

16“Kay1 Mac. 4:59. hapit na man kami maghimo sa kasaulogan sa Paghalad Pag-usab sa Templo, nagsulat kami ug nagtambag kaninyo sa pagsaulog usab niini.

17Giluwas sa Dios ang tanan niyang katawhan ug giuli kanatong tanan ang atong balaan nga yuta, ang pagkahari, ang pagkapari ug ang pagpangalagad diha sa Templo

18nga maoy iyang gisaad sa iyang Balaod. Giluwas kita niya gikan sa makalilisang nga kadaot ug gihinloan ang Templo ug masaligon kita nga diha sa iyang kaluoy sa dili madugay tigumon kita niya ngadto sa iyang balaan nga Templo gikan sa tanang nasod sa tibuok kalibotan.”

Pahayag sa Magsusulat

19Gisulat ni Jason sa Cirene diha sa lima ka basahon ang kasaysayan ni Judas Macabeo ug sa iyang mga igsoon nga lalaki ug ang paghinlo sa dako nga Templo ug ang paghalad pag-usab sa mga altar niini.

20Giasoy usab niya ang mga gubat batok kang Antioco Epifanes ug sa iyang anak nga si Eupator

21ug ang langitnong mga panan-awon nga gipakita ngadto kanila nga mainitong nakigbisog alang sa Judaismo. Bisan tuod ug diyutay lamang sila, nabawi nila ang tibuok yuta ug gibuntog nila ang kasundalohan sa mga dili Judio.

22Nabawi usab nila ang Templo nga nabantog sa tibuok kalibotan; giluwas nila ang Jerusalem ug gipatuman pag-usab ang mga Balaod nga wala na tumana. Nakahimo sila pagbuhat niining tanan tungod kay ang Ginoo maluluy-on man ug maayo kanila.

23Karon akong sulayan pagsaysay diha sa mubo nga basahon ang kasaysayan nga gisulat ni Jason diha sa lima ka basahon.

24Ang mga hubit ug mga saysay sa mga panghitabo daghan ra kaayo ug ang buot nga mobasa niini maglisod gayod.

25Busa gisulayan ko ang pag-asoy niini sa yano nga paagi aron kadtong buot mobasa aron lamang malingaw makakaplag ug kalipay ug kadtong buot mosag-ulo sa mga hitabo dili maglisod niini.

26Ang pagsulat sa maong minubo nga asoy lisod nga buhat ug nagkinahanglan ug dakong trabaho ug mga gabii nga walay katulog.

27Sama kini kalisod sa pag-andam ug kombira aron pagpahimuot sa mga tawo nga nagkalainlain ang gusto. Apan nalipay kami sa pagsagubang niining kalisdanan aron makapahimuot sa mga magbabasa.

28Itugyan ko ang mga makuti nga butang ngadto sa una gayod nga magsusulat ug mangahas ako paghatag lamang ug usa ka mubo nga saysay sa mga hitabo.

29Dili ako ang magtutukod sa usa ka bag-ong balay nga nag-atiman sa mga kuti nga bahin sa pagtukod kondili usa lamang ka yano nga mamimintal nga ang tinguha mao lamang ang pagpatahom sa balay.

30Ang magsusulat sa kasaysayan kinahanglan nga batid kaayo sa iyang tema; kinahanglan nga susihon niya ang tanang mga ginagmay nga butang ug unya ipasabot kini pag-ayo.

31Apan bisan kinsa nga igo lamang nga magsulat sa usa ka mubo nga asoy angay nga tugotan sa paghatag ug usa ka mubo nga asoy sa wala nay paghilabot sa mga gagmay nga bahin.

32Busa sa wala nay daghan pang langan, sugdan ko ang akong pagsaysay kay binuang man ang pagsulat ug usa ka taas nga pasiuna sa usa ka mubo nga sugilanon.