1Wala madugay human mabuntog si Timoteo, si Lisias nga magbalantay ug paryenti sa hari ug pangulo usab sa kagamhanan, nakadungog sa nahitabo ug nasuko siya pag-ayo.
2Busa gitigom niya ang mga 80,000 ka sundalo nga naglakaw ug ang tanan niyang sundalong nagkabayo aron pagsulong sa mga Judio. Ang iyang tuyo mao ang paghimo sa Jerusalem ngadto sa usa ka siyudad nga Grego.
3Pabuhisan niya ang Templo sama sa iyang gibuhat ngadto sa tanang mga dapit sa pagsimba sa mga dili Judio ug ang katungdanan sa pagka-Pangulong Pari ibaligya matag tuig.
4Si Lisias nahimuot pag-ayo sa iyang linibo nga sundalong naglakaw ug sundalong nagkabayo ug sa iyang 80 ka elepante ug tungod niini nakalimot siya sa gahom sa Dios.
5Gisulod niya ang Judea ug gisulong ang kota sa Betzur nga mga 25 ka kilometro sa habagatan sa Jerusalem.
6Sa pagkadungog ni Judas ug sa iyang mga tawo nga si Lisias misulong sa ilang mga kota, sila ug ang tanan nga mga tawo naninggit ug nanghilak, nangaliyupo sa Ginoo nga padad-an unta sila ug usa ka maayong anghel aron sa pagluwas kanila.
7Si Judas maoy una nga mikuha sa iyang mga hinagiban ug giawhag niya ang uban sa pagtipon kaniya ug sa pagtahan sa ilang mga kinabuhi aron pagtabang sa ilang kauban nga mga Judio. Busa uban sa dakong kadasig naghiusa sila sa pagpanggula.
8Apan wala pa gani sila makalakaw ug layo gikan sa Jerusalem, sa kalit himatngonan nila nga may nag-una kanila nga usa ka tawo nga nagsul-ob ug puti, ug nagkabayo ug nagdala ug mga hinagiban nga bulawan.
9Dihadiha silang tanan nagpasalamat sa Dios tungod sa iyang kaluoy. Naghatag siya kanilag igo nga kaisog aron pagsulong dili lamang batok sa mga tawo kondili hangtod sa labing mangtas nga mga mananap ug bisan sa mga kota nga puthaw.
10Busa nanggula sila, naglaray padulong sa gubat ug mikuyog kanila kadtong usa ka tawo nga gipadala sa Ginoo tungod sa iyang kaluoy aron pagpakiggubat dapig kanila.
11Unya daw mga liyon sila nga mihasmag sa mga kaaway ug napatay nila ang 11,000 ka sundalong naglakaw ug 1,600 ka nagkabayo ug ang nahabilin napugos sa pagpanagan aron pagluwas sa ilang kinabuhi.
12Kadaghanan niadtong nanagan nasamdan ug nawad-an sa ilang mga hinagiban ug si Lisias mismo nakaikyas pinaagi lamang sa makauulaw nga pagdagan.
Si Lisias Nakigsabotsabot sa mga Judio(1 Mac. 6:56-61)13Si Lisias dili buang. Gihinuktokan niya ang iyang kapildihan ug nakaamgo siya nga ang mga Judio wala gayod nila mabuntog tungod kay ang gamhanang Dios nakiggubat man dapig kanila. Busa nagpadala siya ug usa ka mensahe ngadto sa mga Judio
14aron pagdani kanila nga mouyon sa usa ka makiangayong sabotsabot ug nagsaad kanila nga himoon niya kutob sa iyang mahimo aron makigdait ang hari kanila.
15Gilantaw ni Judas Macabeo ang kaayohan sa iyang katawhan busa miuyon siya sa tanan nga mga sugyot ni Lisias. Ang hari mihatag sa tanang gipangayo sa mga Judio nga gisulat ni Judas ngadto kang Lisias.
Ang Sulat ni Lisias ngadto sa mga Judio16Ania ang usa ka kopya sa sulat ni Lisias ngadto sa mga Judio:
“Gikan ni Lisias ngadto sa katawhan nga mga Judio: Komusta.
17Si Juan ug si Absalom nga inyong gipadala naghatag kanako ug usa ka opisyal nga dokumento gikan kaninyo ug naghangyo nga mouyon ako sa mga nahisulat niini.
18Gipahibalo ko ang hari sa mga butang nga gikinahanglan nga iyang mahibaloan ug miuyon siya sa pagbuhat sa tanan nga mahimo.
19Kon magpadayon kamo sa pagkamaunongon sa kagamhanan, himoon ko ang tanan nga akong mahimo sa umaabot aron kahatagag kaayohan ang inyong nasod.
20Gitugon ko ang inyong mga embahador ug ang akong embahador sa pagpakigkita kaninyo aron paghisgot sa mga detalye niining mga butanga.
21Hinaot unta nga mabulahan kamo. Gipitsahan sa ika-24 nga adlaw sa bulan sa Dioscorintios sa tuig 148.”Ang Sulat sa Hari ngadto kang Lisias
22Ania ang usa ka kopya sa sulat sa hari:
“Gikan ni Hari Antioco ngadto sa madungganong Lisias: Komusta.
23Karon nga ang akong amahan patay na ug nakig-uban na sa mga dios, buot ko nga ang mga ginsakpan sa akong gingharian dili baldahon sa pagdumala sa ilang mga kalihokan.
24Nasabot ko nga ang mga Judio dili buot mosagop sa mga paagi sa kinabuhi nga Grego sumala sa tuyo sa akong amahan ug gipalabi nila ang ilang kaugalingong paagi sa kinabuhi ug naghangyo sila nga tugotan sa pagkinabuhi subay sa ilang kaugalingon nga mga batasan.
25Kay nagtinguha man ako nga magpuyo sila nga walay magsamok kanila sama sa ubang mga nasod sulod sa akong gingharian, karon nagpakanaog ako niining kasugoan nga ang ilang Templo iuli ngadto kanila ug nga tugotan sila sa pagpuyo subay sa mga batasan sa ilang mga katigulangan.
26Pahibaloa sila, palihog, niining hukom ug pasaligi sila sa akong pagkahigala aron dumalaon nila ang ilang kaugalingong mga kalihokan uban ang kalinaw sa wala nay bisan unsa nga kabalak-an.”
27Ania ang usa ka hulad sa sulat sa hari ngadto sa katawhang Judio:
“Gikan ni Hari Antioco ngadto sa mga pangulo nga Judio ug sa tanan nga mga Judio: Komusta.
28Naglaom ako nga anaa kamo sa maayong kahimtang. Ako ania sa maayong panglawas.
29Si Menelao nagtaho kanako mahitungod sa inyong tinguha sa pagbalik ngadto sa inyoha ug sa pagdumala sa inyong kaugalingong mga kalihokan.
30Busa karon kamo nga mamauli sa inyoha sa ika-30 sa bulan sa Santiko makasiguro nga wala na kamoy angay nga kahadlokan.
31Mahimo nga magpadayon kamo pagtuman sa inyong mga balaod mahitungod sa pagkaon ug sa uban nga mga balaod sumala sa inyong nabatasan nga pagbuhat ug walay Judio nga silotan tungod sa bisan unsang kalapasan nga nahimo tungod sa kakulang sa kasayoran.
32Gipadala ko karon si Menelao aron dili kamo mabalaka.
33Hinaot unta nga mabulahan kamo. Gipitsahan sa ika-15 nga adlaw sa bulan sa Santiko sa tuig 148.”
Ang Sulat sa mga Romano ngadto sa mga Judio34Ang mga Romano nagpadala usab ngadto sa mga Judio niining mosunod nga sulat:
“Gikan ni Quinto Memio ug ni Tito Manio, mga embahador sa mga Romano, ngadto sa mga Judio: Komusta.
35Hingpit ang among pag-uyon sa tanan nga gitugot kaninyo ni Lisias nga paryenti sa hari.
36Padulong na kami karon ngadto sa Antioquia busa palihog usisaha pag-ayo kining mga butanga nga gihisgotan ni Lisias ngadto sa hari. Unya ipadala dayon ngari kanamo ang inyong tubag aron among ikapadayag ngadto sa hari ang mga butang nga makaayo kaninyo. Himoa kini sa labing sayo
37ug ayaw paglangan aron mahibalo kami unsa ang inyong hukom.
38Hinaot unta nga mabulahan kamo. Gipitsahan sa ika-15 nga adlaw sa bulan sa Santiko sa tuig 148.”
Who We AreWhat We EelieveWhat We Do
2025 by iamachristian.org,Inc All rights reserved.
