Tobit 9 - Cebuano Meaning-Based Bible

Ang Biyahe ngadto sa Rages

1Unya gitawag ni Tobias si Rafael ug giingnan,

2“Azarias, pagdala ug upat ka sulugoon uban kanimo ug duha ka kamelyo ug adto sa balay ni Gabael sa lungsod sa Rages. Ipakita kaniya ang pinirmahan nga dokumento aron ihatag niya kanimo ang salapi. Unya dad-a siya nganhi alang sa kombira sa kasal.

3-4Nahibalo ikaw nga ang akong amahan nag-ihap sa mga adlaw hangtod mahiuli ako ug maguol gayod siya kaayo kon malangan ako bisan ug usa ka adlaw. Nahibalo usab ikaw nga si Raguel naghangyo nga kinahanglang magpabilin ako ug dili ako makahimo sa pagbalibad kaniya.”

5Busa si Rafael ug ang upat ka sulugoon nangadto sa Rages didto sa Media ug didto sila midayon sa balay ni Gabael. Gihatag ni Rafael kaniya ang pinirmahan nga dokumento ug gisuginlan siya nga ang anak ni Tobit nga si Tobias bag-o lang naminyo ug nga siya, si Gabael, gidapit alang sa kombira sa kasal. Giihap dayon ni Gabael ang mga puntil sa salapi nga sinilyohan pa ug gikarga kini sa mga kamelyo.

6Sayo kaayo sa pagkasunod buntag nanglakaw sila paingon sa kombira sa kasal. Sa paghiabot ni Rafael ug ni Gabael sa balay ni Raguel, naabtan nila si Tobias nga naniudto. Mitindog dayon si Tobias ug gihimamat si Gabael. Mibalos si Gabael sa paghimamat nga may mga luha sa iyang mga mata ug midugang sa pag-ingon, “Sama gayod ikaw sa imong maligdong ug manggihatagong amahan. Ang Ginoo sa langit manalangin kanimo ug sa imong asawa, sa imong ugangan ug sa imong amahan. Daygon ang Dios kay mitugot siya nga mabuhi pa ako aron makakita sa akong ig-agaw nga si Tobias nga sama gayog dagway sa iyang amahan!”