18-19 Kining Nagmando siya gikan sa iyang harianong trono didto sa Susa, ang ulohang siyudad sa Persia.
20 Sa ikatulong tuig sa iyang paghari, naghikay siyag usa ka kombira alang sa tanan niyang magtatambag, sa mga representante sa ubang mga nasod, sa mga kadagkoan sa Persia ug sa Media ug sa mga gobernador sa mga probinsiya.
21 Sulod sa tibuok unom ka bulan nagpasundayag siya sa kadato sa korte sa emperyo pinaagi sa mga magasto ug dagko nga kasaulogan.
22 Human sa kasaulogan naghatag ang hari ug usa ka kombira alang sa mga tawo sa laing mga nasod nga didto sa siyudad. Mikabat kini ug usa ka semana ug gihimo didto sa hawanan sa palasyo
23 nga gidayandayanan sa lino ug algodon nga mga kurtina, binugkosan ug mga pisi sa lino nga bulok tapol nga gisumpay sa mga argulya nga plata ug bulawan didto sa mga haligi nga marmol ug bato. May mga lingkoranan nga hinimo gikan sa bulawan ug plata nga gipahimutang didto sa patyo nga binakbakan sa marmol nga berde ug puti ug sa mga perlas. Ang lingkoranan gitabonan ug mga mahalon ug pino nga mga panapton sa nagkalainlaing mga bulok ug mga rosas libot sa mga sidsid niini.
24 Didto may mga kupa nga bulawan ug plata ug ang usa niini nga gidayandayanan ug mga alahas nga mobilig kapin sa usa ka libo ka tonilada nga plata, gipagula aron makita ug daghan kaayo ang bino nga gikan sa kaugalingong bodega sa hari.
25 Walay pugongpugong ang pag-inom. Naghatag ug kasugoan ang hari ngadto sa mga sulugoon sa palasyo nga kinahanglang sangkapan siya ug ang iyang mga dinapit sa bisan unsa nga gusto nila.
26 Samtang gihimo kini, si Rayna Vasti naghatag usab ug usa ka kombira alang sa mga babaye didto sa sulod sa palasyo sa hari.
27 Sa ikapitong adlaw sa iyang kombira, ang hari nalipay busa gitawag niya ang pito ka yunuko nga mao ang iyang kaugalingong mga sulugoon nga si Haman, Bazan, Tarra, Borasi, Satolta, Abataza ug si Taraba.
28 Gisugo niya sila sa pagkuha sa rayna aron ikabutang niya ang harianong korona sa ulo sa rayna ug aron pagpasundayag kaniya ngadto sa mga opisyales ug sa tanan niyang mga dinapit kay usa man siya ka maanyag nga babaye.
29 Apan si Rayna Vasti nagdumili sa pagsugot ug wala mouban sa mga sulugoon. Naulaw ang hari niini ug napungot siya pag-ayo.
30 Gisuginlan niya ang iyang mga magtatambag mahitungod sa tubag ni Vasti ug nagpakitambag siya pinasubay sa balaod kon unsa ang angay niyang buhaton.
31-32 Tulo kanila nga maoy labing suod sa hari ug naghupot sa labing taas nga mga katungdanan, misulti kaniya unsa ang gimbut-an sa balaod ug unsa ang angay buhaton ngadto kang Rayna Vasti tungod sa wala niya pagsugot sa sugo nga iyang gipakanaog pinaagi sa iyang mga sulugoon. Sila mao si Arkesius, Sarsatius ug si Malesear nga mga opisyales sa Persia ug sa Media.
33 Unya gitug-anan sa hari ang iyang mga opisyal ug ang mga gobernador sa Media ug sa Persia giunsa siya pagsupak sa rayna. Busa si Moqueo miingon sa hari ug sa tanan nga nanambong, “Dili lamang ikaw kondili kami usab giinsultohan ni Rayna Vasti.
34-35 Inigkabalita sa among mga asawa sa gihimo sa rayna, mosukol na unya sila sa ilang mga bana ug dili na motahod kanila sama sa gibuhat ni Vasti kanimo.
36 Busa kon makapahimuot kanimo, O Kamahalan, pagpakanaog ug usa ka harianong sugo nga si Vasti dili na gayod makaatubang sa hari. Isulat kini sa mga balaod sa Media ug sa Persia. Unya tangtangi siya sa iyang pagkarayna ug pulihi sa laing mas maayong babaye. Wala nay laing paagi.
37 Sa mahibaloan na ang imong sugo niining tibuok nga emperyo, ang tanang babaye maghatag na unya sa igong pagtahod sa ilang bana, dato man siya o pobre.”
38 Ang hari ug ang iyang mga opisyal nakagusto niining mga hunahunaa ug gibuhat sa hari ang gisugyot ni Moqueo.
39 Sa tagsatagsa ka harianong probinsiya gipadala niya ang usa ka mensahe sa sinultihan niadtong probinsiyaha nga nag-ingon nga ang tanang bana kinahanglang tahoron diha sa iyang kaugalingong panimalay.
Who We AreWhat We EelieveWhat We Do
2025 by iamachristian.org,Inc All rights reserved.
