Tobit 12 - Cebuano Meaning-Based Bible

Ang Anghel nga si Rafael

1Sa pagkahuman na gayod sa kombira sa kasal, gitawag ni Tobit si Tobias ug giingnan, “Anak, siguroa gayod pagsuhol ang imong kauban sa biyahe ug ayaw kalimti ang paghatag kaniya ug pakapin.”

2Gipangutana siya ni Tobias sa pag-ingon, “Tay, pila man kaha sa imong hunahuna ang akong isuhol kaniya? Dili ko magsapayan sa paghatag kaniya sa katunga sa tanan nga among nadala pagbalik.

3Gidala ako niya balik sa ato nga maayog lawas ug walay kakulian. Siyay mikuha sa salapi alang kanako gikan ni Gabael; gihinginlan niya ang demonyo gikan sa akong asawa ug giayo niya ang imong pagkabuta. Pila may pakapin nga angay kong ihatag kaniya?”

4Mitubag si Tobit, “Hatagi siya sa katunga sa tanan nimong nadala pagbalik pinaagi sa iyang tabang. Angayan gayod siyang hatagan niana.”

5Busa gitawag ni Tobias si Rafael ug giingnan, “Ania ang katunga sa tanang nadala ko pagbalik pinaagi sa imong tabang. Angay ikaw niini. Hinaot unta nga maayo ang imong panaw balik sa inyo.”

6Unya sa hilom giingnan ni Rafael si Tobit ug si Tobias, “Dayga ninyo ang Dios ug suginli ang tanan mahitungod sa mga maayong butang nga iyang gibuhat alang kaninyo aron sila usab magpasidungog kaniya ug mag-awit ug mga pagdayeg alang kaniya. Pahibaloa ang tanan mahitungod sa nahimo sa Dios. Ayaw gayod paghunong sa pagdayeg kaniya.

7“Usa ka maayong butang ang pag-amping sa tinagoan sa hari apan ang gihimo sa Dios kinahanglang isugilon ngadto sa tanan aron daygon ug pasidunggan siya.

“Kon magbuhat kamo sa maayo, walay kadaot nga modangat ninyo.

8“MasSir. 29:8-13. maayo pa ang pag-ampo sa kinasingkasing ug ang pagpahimuot sa Dios pinaagi sa pagtabang sa mga kabos kay sa pagpadato ug sa pagpanlimbong. Mas maayo ang paghatag ngadto sa mga kabos kay sa pagtigom ug bulawan.

9AngPan. 11:4; Dan. 4:27; Sir. 3:30. maong pagkamanggihatagon magluwas kaninyo sa kamatayon ug maghugas sa tanan ninyong mga sala. Sila nga manghatag sa mga kabos magpuyo ug hingpit nga kinabuhi

10apan kadtong magkinabuhi sa sala ug kadaotan, ang ilang kaugalingon maoy ilang kaaway.

11“Gisultihan ko na kamo nga ang tinagoan sa hari angay nga ampingan apan ang mga butang nga gibuhat sa Dios kinahanglan nga itug-an sa tanan. Karon ipadayag ko kaninyo ang tibuok kamatuoran ug wala akoy itago kaninyo.

12Tobit,Job 33:23-24; Buh. 10:4; Gipa. 8:3-4. sa pag-ampo mo ug sa pag-ampo ni Sara sa Ginoo, ako mao ang nagdala sa inyong mga pag-ampo ngadto sa iyang mahimayaong presensya. Ang samang butang gihimo ko usab matag higayon nga ikaw naglubong sa mga minatay.

13Sa adlaw nga mitindog ikaw gikan sa lamisa sa walay pagkaon aron paglubong sa patay, gipadala ako sa Dios aron pagsulay kanimo.

14Apan gipadala usab niya ako aron pag-ayo kanimo ug aron pagluwas sa imong umagad nga si Sara sa iyang mga kagul-anan.

15AkoZac. 4:10; Luc. 1:19; Gipa. 8:2. mao si Rafael, usa sa pito ka mga anghel nga nagtindog didto sa mahimayaong presensya sa Ginoo ug andam sa pag-alagad kaniya.”

16Si Tobit ug si Tobias nalisang ug miluhod ug miyukbo nga nagkurog sa kahadlok.

17Apan miingon si Rafael kanila, “Ayaw kahadlok kay walay kadaot nga moabot kaninyo. Hinumdomi lamang kanunay ang pagdayeg sa Dios.

18Buot niyang moanhi ako ug motabang kaninyo. Wala ako moanhi sa akong kaugalingong gusto. Busa awiti ninyo ang pagkadalaygon sa Dios sa tibuok ninyong kinabuhi.

19Sa mga panahon nga abi ninyog nagkaon ako, sa tinuoray wala ako magkaon bisan unsa. Sama lamang kadto nga ako nagkaon.

20Samtang ania pa kamo niining kalibotana, kinahanglang magdayeg kamo sa Ginoong Dios ug magpasalamat kaniya. Karon kinahanglan mopauli ako balik kaniya nga nagpadala kanako. Isulat ang tanan nga nanghitabo kaninyo.”

21Unya nawala si Rafael ngadto sa kapanganoran. Si Tobit ug si Tobias nanindog apan wala na nila siya makita.

22Nag-awit sila sa mga alawiton sa pagdayeg, nagpasalamat tungod sa tanang gamhanang mga buhat sa Dios nga nahimo samtang ang iyang anghel nga si Rafael nag-uban pa kanila.