Baruc 3 - Cebuano Meaning-Based Bible

1“O Ginoo nga Labing Gamhanan, Dios sa Israel, gikan sa kahiladman sa among nahasol ug gilaayan nga mga kalag nagtuaw kami kanimo.

2Patalinghogi kami, O Ginoo, ug kaluy-i kami kay nakasala man kami batok kanimo.

3Ikaw hari nga nagmando hangtod sa kahangtoran apan kami mangamatay ug mangahanaw sa dayon.

4O Ginoo, nga Labing Gamhanan, Dios sa Israel, patalinghogi ang among pag-ampo. Kami, sama niadtong nangamatay na, nakasala usab. Ang among mga katigulangan nakasala batok kanimo, ang Ginoo nga ilang Dios. Midumili sila sa pagsugot kanimo ug nagsagubang kami sa mga sangpotanan sa ilang mga sala.

5Karon kalimti ang mga sala nga nahimo sa among mga katigulangan kaniadto ug mao lamay hunahunaa ang imong gahom ug kadungganan

6kay ikaw mao man ang Ginoo nga among Dios ug ikaw lamang ang among daygon.

7Gihimo mo kaming mahadlokon kanimo aron sa among pagkabihag modangop kami kanimo ug magdayeg kanimo tungod kay mitalikod na man kami sa mga sala sa among mga katigulangan.

8Gipatibulaag mo kami diha sa kanasoran aron tamayon kami ug tunglohon. Gisilotan mo kami tungod sa mga sala sa among mga katigulangan sa diha nga misukol sila batok kanimo, ang Ginoo nga among Dios.”

Pagdayeg sa Kaalam

9Pamatia,Pan. 4:20-22. Israel, ang mga kasugoan nga nagsaad ug kinabuhi; pagmatngon ug mahimo ikawng maalamon.

10Ngano, O Israel, nga anaa man ikaw sa yuta sa kaaway? Nganong natigulang na man lang ikaw diha sa usa ka nasod nga langyaw

11ug giihap na uban kanila? Ngano man?

12Tungod kay gibiyaan nimo ang tinubdan sa kaalam!

13Kon nagsubay pa ikaw diha sa dalan sa Dios, magkinabuhi unta ikaw nga malinawon hangtod sa kahangtoran.

14Tun-i hain ang pagsabot, ang kusog ug ang kahibalo. Unya mahibalo ikaw asa pangitaa ang usa ka hataas ug hingpit nga kinabuhi, ang kahayag nga maggiya kanimo ug ang kalinaw.

15WalayJob 28:12, 20. bisan kinsa nga nakakaplag hain magpuyo ang kaalam o nakasulod sa iyang balay nga puno sa bahandi,

16-17ug sila nga misulay nangawagtang: ang mga nagmando sa kanasoran, ang mga lalaki nga nangayam sa mga ihalas nga mga mananap ug mga langgam aron maglingawlingaw, sila nga nagtigom ug dagkong mga katigayonan sa plata ug bulawan, sila nga gisaligan sa tanan ug naghimog bisan unsa aron pagkab-ot niini,

18ug sila nga nabalaka ug naningkamot aron makasapi apan wala magbilin ug agi sa ilang buhat.

19Nangahanaw na silang tanan ug atua na sa kalibotan sa mga patay. Ang uban miabot aron pagbanos sa ilang dapit.

20May naulahi nga kaliwatan nga natawo ug namuyo sa yuta apan sila usab wala makakaplag sa agianan ngadto sa kaalam. Wala sila makakaplag sa dalan ngadto sa kaalam o nahiabot kaniya.

21Ang ila usab nga mga anak nangapakyas.

22Ang mga taga-Canaan wala makakaplag sa kaalam. Wala makakaplag ang mga taga-Edom

23bisan pag nangita sila sa kaalam. Ang dalan ngadto sa kaalam wala makaplagi sa mga magpapatigayon sa Meran ug Tema o sa mga tig-asoy ug mga sugilanon o sa ubang laing mga tawo nga nangita niini.

24O Israel, pagkadako gayod sa pinuy-anan sa Dios! Pagkalapad gayod sa tanan nga iyang gipanag-iya!

25Wala kini kinutoban. Walay paagi sa pagsukod unsa kalapad o unsa ka habog kini.

26SaGen. 6:4; Klm. Sol. 14:6. unang mga panahon nangatawo dinhi ang gibantog nga mga higante, usa ka gamhanan nga kaliwat nga batid sa gubat.

27Apan ang Dios wala magpili kanila nga mahimong iyang katawhan o magpakita kanila sa dalan sa kaalam.

28Nangahanaw sila tungod kay wala silay pagsabot ug tungod ra usab sa ilang kabuang.

29Walay bisan usa nga nakasaka ngadto sa langit aron makakuha sa kaalam ug makadala kaniya nganhi gikan sa kapanganoran.

30Walay nakapanaw latas sa kadagatan aron makakaplag sa kaalam o makapalit kaniya pinaagi sa mahalon nga bulawan.

31Walay nahibalo unsaon pagkab-ot kaniya o unsaon pagkaplag sa dalan padulong kaniya.

32Ang bugtong nga nahibalo sa kaalam mao ang Dios ug nahibalo siya sa tanang mga butang. Pinaagi sa iyang salabotan makaplagan niya siya. Gitukod niya ang kalibotan alang sa tanang panahon ug gipuno niya kini sa tanang matang sa mga mananap.

33Ang kahayag mikurog ug misugot sa pagtawag niya. Gipadala niya kini ug mitungha kini.

34Gitawag niya ang mga bituon ug misanong dayon sila. Mipahimutang sila sa ilang mga dapit ug malipayon sila nga midan-ag aron pagpahimuot kaniya nga maoy nagbuhat kanila.

35Siya mao ang atong Dios ug walay lain nga sama kaniya.

36Siya ang nagkaplag sa tibuok dalan paingon sa kahibalo ug siya ang naghatag sa kaalam ngadto sa iyang sulugoon nga si Israel nga iyang gihigugma.

37Sukad niadtong panahona, ang kaalam mipakita sa kalibotan ug nagpuyo taliwala kanato.