Baruc 4 - Cebuano Meaning-Based Bible

1AngSir. 24:23. kaalam mao ang basahon sa mga sugo sa Dios, ang Balaod nga molungtad hangtod sa kahangtoran. Ang tanan nga naghupot kaniya mabuhi apan sila nga mobiya kaniya, mangamatay.

2Dangop kamo sa kaalam, O katawhan sa Israel, ug hupti siya. Lakaw kamo padulong sa kasanag sa iyang kahayag.

3Ayaw itugyan ang atong mahimayaon nga mga katungod ngadto sa bisan kinsang katawhan.

4Pagkamalipayon nato, O katawhan sa Israel, kay nagbaton kita sa kahibalo unsay makapahimuot sa Dios!

Kahupayan alang sa Jerusalem

5Pagmaisog, O katawhan ko, kay pinaagi kanimo buhi ang ngalan sa Israel.

6Gibaligya ikaw ngadto sa kanasoran nga dili Judio apan dili aron laglagon. Hinuon, tungod kay gipalagot man nimo ang Dios, gitugyan ikaw niya ngadto sa imong mga kaaway.

7Sa imong paghalad sa mga sakripisyo ngadto sa mga demonyo inay ngadto sa Dios, gipalagot nimo siya nga nagbuhat kanimo.

8Gikalimtan nimo ang Dios nga Walay Sinugdan ug Kataposan, siya nga nagmatuto kanimo sa bata ka pa. Gihatagan mog kasub-anan ang Jerusalem nga nagpadako kanimo.

9Nakita sa Jerusalem ang pagsilot sa Dios kanimo tungod sa iyang kasuko. Miingon ang Jerusalem ngadto sa tanang silingan nga mga siyudad, “Tan-awa ang dakong kaalaot nga gipahamtang sa Dios kanako.

10Nakita ko ang akong mga anak nga lalaki ug babaye nga gibihag, usa ka pagbihag nga midangat kanila gikan sa Dios nga Walay Sinugdan ug Kataposan.

11Giamuma nako ang akong mga kabataan uban sa dako nga kalipay apan naghilak ako ug nagbangotan sa diha nga gisakmit sila gikan kanako.

12Wala untay malipay sa akong mga kasakit karon nga ako usa na ka biyuda ug tungod sa daghan kong kabataan nga gisakmit gikan kanako. Mibiya sila sa Balaod sa Dios ug tungod sa ilang mga sala nahimo akong usa ka siyudad nga biniyaan.

13Wala silay pagtahod sa iyang mga sugo ug wala sila magkinabuhi subay niini; midumili sila nga giyahan niya diha sa dalan sa katarong.

14“Dali kamong tanan nga silingang mga siyudad ug palandonga ninyo giunsa pagdala sa Dios nga Walay Sinugdan ug Kataposan ang akong mga anak ngadto sa pagkabihag.

15Iyang gidala batok kanila ang usa ka nasod nga gikan sa halayo, usa ka walay ulaw nga nasod nga nagsulti ug langyaw nga pinulongan ug walay pagtahod sa mga tigulang ug walay kaluoy sa mga kabataan.

16Kining mga tawhana misakmit sa akong hinigugmang mga anak nga lalaki ug mibihag sa akong mga anak nga babaye ug gibiyaan ako nga biyuda ug nag-inusara.

17“Mga anak ko nga mga binihag, wala akoy mahimo aron pagtabang kaninyo.

18Siya ra nga nagpahamtang niining silot diha kaninyo ang makaluwas kaninyo gikan sa inyong mga kaaway.

19Padayon kamo sa inyong kaugalingong pagkinabuhi, mga anak ko, ug ako mag-inusara na lang intawon.

20Gihubo ko ang mga bisti nga akong gisul-ob sa mga adlaw sa kalinaw ug nagsul-ob ako ug sapot sa pagbangotan. Motuaw ako ngadto sa Dios nga Walay Sinugdan ug Kataposan samtang buhi pa ako aron sa pagpakitabang.

21“Pagmaisog, mga anak ko, ug pangamuyo kamo ngadto sa Dios aron kamo tabangan. Luwason kamo niya gikan sa pagkadinaugdaog ug gikan sa gahom sa inyong mga kaaway.

22Masaligon ako nga ang Dios nga Walay Sinugdan ug Kataposan sa dili madugay maghatag kaninyo ug kagawasan. Ang Balaan, ang inyong Manluluwas hangtod sa kahangtoran maglipay kanako sa diha nga magpakita siya kaninyo ug kaluoy.

23Naghilak ako ug nagminatay sa diha nga kamo gikuha apan ang Dios magdala kaninyo pagbalik ug maglipay kanako hangtod sa kahangtoran.

24Sama nga ang silingan nga mga siyudad nagpaminaw sa diha nga kamo gibihag, sa dili madugay makakita usab sila sa Dios nga Walay Sinugdan ug Kataposan nga moabot diha sa mahimayaon nga kasanag aron pagluwas kaninyo.

25Mga anak ko, antusa ang silot sa Dios uban ang pailob. Ang inyong mga kaaway naglutos kaninyo apan sa dili madugay makita ninyo sila nga laglagon ug maghulat sa inyong mga kaluoy.

26Mga anak ko, gihigugma ko kamo pag-ayo apan kinahanglan nga maglakaw kamo sa malisod nga mga dalan. Gibihag kamo sama sa karnero nga gisakmit sa kaaway.

27“Pagmaisog, mga anak ko, ug pagpakiluoy kamo ngadto sa Dios aron kamo tabangan. Gisilotan kamo niya apan dili siya makalimot kaninyo.

28Sama nga kaniadto hugot ang inyong tinguha sa pagtalikod gikan sa Dios, karon balik kamo kaniya ug alagari siya sa kahugot nga napulo ka pilo.

29Siya nga nagpahamtang niining mga kasakit diha kaninyo magluwas kaninyo ug magdala kaninyo ngadto sa walay kinutoban nga kalipay.”

Ang Jerusalem Gipasaligan ug Tabang

30Pagmaisog, Jerusalem, kay ang Dios nga naghatag kanimo sa imong ngalan karon magdalag kahupayan nganha kanimo.

31Ang kaalaot modangat kanila nga nagdaugdaog kanimo ug naglipay tungod sa imong pagkapukan.

32Ang kaalaot modangat niadtong mga siyudad nga miulipon sa imong mga anak. Ang kaalaot mao ang palad sa Babilonia, kadtong siyudad nga milamoy sa imong mga anak nga lalaki.

33Sama nga kadtong siyudara naglipay tungod sa imong pagkapukan ug nahimuot pag-ayo sa imong pagkagun-ob, karon usab magbangotan siya sa diha nga siya na mismo ang mahimong kamingawan.

34Himoon ko ang iyang mapagarbohon nga pangandak nga usa ka pagbangotan ug kuhaon ko ang iyang daghan nga katawhan nga iyang gipasigarbo.

35Ako, ang Dios nga Walay Sinugdan ug Kataposan, magpaulan ug kalayo diha kaniya ug magsiga kini sa daghang mga adlaw. Ang mga naguba ug nalumpag pagapuy-an sa mga yawa sa taas nga panahon nga umaabot.

36Tan-aw ngadto sa silangan, O Jerusalem, ug tan-awa ang kalipay nga gidala sa Dios kanimo.

37Tan-awa, namauli ang imong mga anak, ang mga anak nga gisakmit gikan kanimo. Nagkatapok sila gikan sa silangan ug gikan sa kasadpan tungod sa sugo sa Dios, ang Balaan. Ug karon namauli sila, nagmalipayon diha sa himaya sa Dios.