1 Macabeo 13 - Cebuano Meaning-Based Bible

Si Simon Nangulo sa mga Judio

1Nasayran si Simon nga si Tripo nagtigom ug usa ka dakong pundok sa kasundalohan aron sa pag-ilog sa Judea ug sa paglaglag niini.

2Nakaamgo siya nga kining balitaa nakapagubot ug nakapalisang sa mga tawo busa miadto siya sa Jerusalem ug gitawag niya ang katawhan aron magtigom

3ug gidasig niya sila sa pag-ingon: “Nasayod kamo unsa kadako ang gihimo sa banay sa akong amahan, sa akong mga igsoong lalaki ug ang gihimo ko alang sa Balaod ni Moises ug sa Templo. Nasayod usab kamo mahitungod sa mga gubat nga atong nahimo ug sa mga kasamok nga atong naagian.

4Ang tanan nakong mga igsoon nangamatay nga nakig-away alang sa atong Balaod, sa atong Templo ug sa atong nasod ug ako na lamang ang nahibilin.

5Apan dili gayod ako buot nga ingnon nga misulay ako sa pagluwas sa akong kaugalingong kinabuhi sa panahon sa katalagman. Wala ako mag-isip sa akong kaugalingon nga mas maayo kay sa akong mga igsoon.

6Wala gayod! Tinuod nga tungod sa ilang pagdumot, ang tanang mga nasod nga dili Judio nagkatigom aron paglaglag kanato apan makig-away ako aron paglaban sa akong nasod, sa Templo ug sa inyong mga hinigugma.”

7Kining mga pulonga nakabuhi dayon sa kadasig sa mga tawo

8ug mitubag sila sa usa ka makusog nga singgit, “Ikaw na karon ang among pangulo ilis sa imong mga igsoon nga si Judas ug si Jonatan.

9Pakig-away sa among gubat ug buhaton namo ang bisan unsa nga imong pangayoon.”

10Busa gitigom ni Simon ang tanan nga mga sundalo ug gidali ang paghuman sa mga paril sa Jerusalem ug sa paglig-on sa tanan nga mga panalipod niini.

11Gipadala niya si Jonatan nga anak ni Absalom ngadto sa Jopa uban sa usa ka dakong pundok sa kasundalohan. Gihinginlan ni Jonatan ang mga tawo didto ug mipuyo sila sa lungsod.

12Si Tripo mibiya sa Tolemais uban sa usa ka dakong pundok sa kasundalohan aron pag-ilog sa Judea ug dala nila ingon nga binilanggo si Jonatan nga igsoon ni Simon.

13Si Simon nagkampo didto sa Adida sa daplin sa patag.

14Sa pagkasayod ni Tripo nga si Simon maoy mipuli sa iyang igsoon nga si Jonatan ug nga andam siya sa pagpakigsangka kaniya sa gubat, nagpadala siya ug mensahe ngadto kaniya:

15“Gihuptan ko ang imong igsoon nga si Jonatan nga dinakpan tungod kay samtang diha siya sa katungdanan wala siya mobayad sa iyang mga utang ngadto sa panudlanan sa hari.

16Apan bisan pa niana, buhian ko siya kon bayran mo ako ug 2,727 ka kilo nga plata ug ipadala mo ang duha sa iyang mga anak nga lalaki agig patinga aron pagpasalig nga dili siya mosukol batok kanamo inigkabuhi na niya.”

17Bisan nahibalo si Simon nga gilimbongan siya nila, gipadala niya ang salapi ug ang duha ka anak nga lalaki ni Jonatan kay dili siya buot nga mahaling ang kasuko sa mga Judio.

18Nahadlok siya nga tingali unyag moingon sila nga si Jonatan gipatay tungod kay si Simon wala man mopadala ug salapi ug sa mga kabataan.

19Busa gituman niya sumala sa gipangayo ni Tripo apan wala motuman si Tripo sa iyang mga saad ug wala niya buhii si Jonatan.

20Unya milihok si Tripo aron pag-ilog sa yuta ug paglaglag niini. Milibot siya agi sa dalan padulong sa Adora. Apan si Simon ug ang iyang kasundalohan milihok nga nag-atubang kaniya bisan asa siya moadto.

21Ang mga kaaway nga sundalo nga didto sa kota sa Jerusalem nagpunayg padala ug mga sinugo ngadto kang Tripo nga nag-awhag kaniya sa pag-adto dayon kanila agi sa dalan sa diserto ug sa pagpadala kanila ug pagkaon.

22Giandam ni Tripo ang tanan niyang sundalong nagkabayo alang sa sulong apan niadtong gabhiona may dakong ulan sa yelo ug wala siya makahimo pagtungas sa kabungtoran. Busa misibog siya ug miadto sa Gilead.

23Sa pagkaduol niya sa Baskama, gipapatay niya si Jonatan ug gipalubong didto.

24Unya mitalikod si Tripo ug mibalik ngadto sa iyang kaugalingong nasod.

25Gisugo ni Simon ang pipila ka mga tawo aron dad-on ang lawas sa iyang igsoon nga si Jonatan ngadto sa Modin aron ilubong didto sa lungsod sa ilang mga katigulangan.

26Ang tanan nga didto sa Israel nagbangotan pag-ayo sa taas nga panahon tungod sa kamatayon ni Jonatan.

27Ibabaw sa lubnganan sa iyang amahan ug sa iyang mga igsoon nagtukod si Simon ug usa ka taas nga monyumento nga makita gikan sa halayo kaayo. Ang atubangan ug ang luyo niini gitabonan ug mga pinasinaw nga bato.

28Nagtukod siya ug pito ka mga piramid sa isigka kilid alang sa iyang amahan, sa iyang inahan ug sa iyang upat ka igsoon.

29Alang sa mga piramid naghimo siya ug tag-as nga mga lindog nga adunay mga kinulit. Pipila niining mga kinulit mao ang kotamaya ug ang uban mga sakayan. Monyumento kadto nga gipahinungod sa ilang mga kadaogan, nga mahimong duawon sa mga magpapanaw nga gikan sa layong dagat.

30Ang lubnganan nga iyang gitukod didto sa Modin anaa pa hangtod karong mga adlawa.

31Sa laing bahin, gipatay ni Tripo ang batan-ong hari nga si Antioco VI

32ug giilog niya ang iyang gingharian didto sa Siria. Nagdala siya niadtong nasora ug dagkong mga kaguliyang.

33Gibag-o pagtukod ni Simon ang mga kota sa Judea lakip ang tag-as nga mga bantayan, malig-on nga mga paril ug mga ganghaan nga tinarangkahan. Unya nagbutang siya didto ug mga tigomanan sa mga kasangkapan.

34Nagpadala siyag mga embahador ngadto kang Hari Demetrio II aron pagpangayo nga dili siya pabayron ug buhis sa yuta kay si Tripo wala may laing gibuhat gawas sa pagtulis kanila.

35Si Hari Demetrio mipadala niining mosunod nga sulat agig tubag:

36“Si Hari Demetrio ngadto sa Pangulong Pari nga si Simon, ang higala sa mga hari, ngadto sa nasod nga Judio ug sa ilang mga pangulo, komusta.

37Nakadawat ako sa bulawan nga purongpurong ug sa bulawan nga sanga sa palmera nga inyong gipadala ug andam ako sa paghimog usa ka kasabotan sa kalinaw uban kaninyo ug sa pagsugo sa among mga opisyal nga maniningil sa buhis aron tugotan kamo nga malingkawas niini.

38Ang atong unang mga kasabotan uban kaninyo gidasonan ug ang mga kota nga inyong gitukod magpabilin nga inyoha.

39Pasayloon ko kamo sa mga kalapasan sa kasabotan nga inyong nahimo hangtod karong petsaha ug gilingkawas ko kamo sa pagbayad ug espesyal nga buhis nga balayranan pa ug sa bisan unsang laing mga buhis nga gipaningil hangtod niining panahona didto sa Jerusalem.

40Ang tanang mga Judio nga may katakos, mahimong magpalista aron sa pag-alagad sa hari. Patunhayon nato ang kalinaw.”

41Busa sa tuig 170 ang yugo sa mga dili Judio nga madaugdaugon natangtang gikan sa mga Judio.

42Ang mga tawo misugod pagpitsa sa ilang mga dokumento ug kasabotan pinaagi niining mga pulonga: “Sa unang tuig ni Simon, ang bantog nga Pangulong Pari, ang magmamando ug pangulo sa mga Judio.”

43Niadtong may dako nga kasaulogan didto sa siyudad tungod niining makalilisang nga hulga alang sa kasigurohan sa Israel nga natapos. Si Simon ug ang iyang mga tawo misulod sa kota nga nanag-awit ug mga alawiton sa pagdayeg ug pasalamat samtang nagdala sila sa mga sanga sa palmera ug nagkablit sa mga alpa, nagtokar sa mga piyangpiyang ug lira.

52Nagpakanaog si Simon ug usa ka kasugoan nga kadtong adlawa kinahanglang saulogon nga masadya matag tuig. Gilig-on niya ang mga panalipod sa bungtod sa Templo sa kilid nga nag-atubang sa kota ug siya ug ang iyang mga tawo naghimo sa ilang ulohang kampo didto.

53Ang anak ni Simon nga si Juan dako na karon, busa gihimo siya ni Simon nga pangulo sa tibuok kasundalohan ug si Juan nagbutang sa iyang ulohang kampo didto sa Geser.