Tobit 5 - Cebuano Meaning-Based Bible

Pangandam alang sa biyahe

1Unya mitubag si Tobias sa iyang amahan, “Buhaton ko ang tanan nga imong gisugo kanako.

2Apan unsaon ko man pagkuha sa salapi gikan ni Gabael? Wala gayod kami magkaila. Unsaon ko man pagmatuod kaniya kinsa ako aron saligan ako niya ug ihatag kanako ang salapi? Gawas pa niana, wala ako makatultol sa Media.”

3Unya gihatag ni Tobit ngadto kang Tobias ang dokumento nga gipirmahan niya ug ni Gabael ug miingon, “Karon, lakaw ug pangita ug kasaligang tawo nga makabiyahe uban kanimo ngadto sa Media ug ato siyang suholan sa pagbalik na ninyo. Apan kinahanglang kuhaon mo ang salapi nga gibilin ko kang Gabael.”

Gikasugat ni Tobias si Rafael

4UnyaHeb. 13:2. milakaw si Tobias aron pagpangitag tawo nga nakahibalo sa dalan ngadto sa Media. Dihadiha dayon sa pagtalikod niya sa ila, gikasugat niya si Rafael. Wala mahibalo si Tobias nga si Rafael usa diay ka anghel sa Dios.

5Busa nangutana siya kaniya kon taga diin siya.

Mitubag si Rafael, “Israelita ako, usa sa imong layo nga paryenti ug mianhi ako dinhi sa Ninibe aron pagpangitag trabaho.”

Nangutana si Tobias, “Nahibalo ba ikaw sa dalan paingon sa Media? Mahimo bang ubanan mo ako paingon didto?”

6Mitubag si Rafael, “Oo, nahibalo ako kay tig-adtoan man ako sa akong paryenti nga si Gabael nga nagpuyo sa lungsod sa Rages. Magkinahanglan ug labing minos duha ka adlaw nga pagbiyahe ngadto sa Rages gikan sa Ecbatana, ang ulohang siyudad, kay ang Rages tua man sa kabukiran. Mahimo ko ikaw nga ubanan didto.”

7Unya miingon si Tobias kang Rafael, “Hulata una ako dinhi kay adtoon ug sultihan ko ang akong amahan. Buot ko nga mobiyahe ka uban kanako ug suholan ko ikaw.”

8Miingon si Rafael, “Oo maghulat ako apan ayaw pagdugay.”

9Si Tobias mipauli sa ila ug misugilon sa iyang amahan, “Nakakita akog sama kanato nga Israelita ug mobiyahe siya uban kanako.”

Mitubag si Tobit, “Tawga ug paanhia kanang tawhana. Buot akong masayod kon unsang banaya o triboha siya ug kon kasaligan ba siya nga kauban mo sa biyahe.”

Nakighimamat si Tobit kang Rafael

Busa migula si Tobias ug gitawag niya si Rafael ug giingnan, “Ang akong amahan buot makighimamat kanimo.” Sa paghisulod na ni Rafael, nagkomustahay sila.

10Gipangutana ni Tobit si Rafael, “Tug-ani ako, higala ko, hain ka mang banaya ug triboha mahisakop?”

11Apan si Rafael nangutana, “Nganong buot man ikaw masayod niana?”

Miingon si Tobit, “Tug-ani ako sa tinuod. Unsa may imong ngalan ug kinsa ka mang anak?”

12Si Rafael mitubag, “Si Azarias ako ug anak ako sa tigulang nga si Ananias, usa sa imong paryenti.”

13Unya miingon si Tobit kaniya, “Abli ang among balay alang kanimo! Panalanginan ka sa Dios, anak ko. Ayaw kasuko tungod kay buot ako masayod sa kamatuoran mahitungod kanimo ug sa imong banay. Gikan ka diay sa usa ka maayong banay ug paryenti pa gayod! Nakaila ako kang Ananias ug kang Natan, ang duha ka anak sa tigulang nga si Semias. Wala gayod sila mobiya sa ilang pagtuo, dili sama sa uban. Magkuyogay kami kaniadto sa pagbiyahe ngadto sa Jerusalem ug sa pagsimba didto. Ang imong mga kagikan mga maayong tawo ug naggikan ikaw sa maayong banay. Hinaot unta nga maayo ang inyong biyahe.”

14Mipadayon si Tobit sa pag-ingon, “Bayran ko ang naandang adlaw-adlaw nga suhol lakip na sa inyong gastohon.

15Ikaw nay mahibalo kang Tobias ug pag-amping gayod kamo. Pakapinan ko ang imong suhol kon makabalik kamo nga luwas sa mga kakulian.” Ug nagkauyon sila.

16MiingonGen. 24:7, 40. si Rafael, “Ubanan ko siya. Ayaw kabalaka, moabot lagi kami didto ug mahibalik nga walay kakulian. Labot pa, ang mga dalan dili piligroso.”

Mitubag si Tobit, “Ang Dios mag-uban unta kaninyo.” Unya iyang gitawag si Tobias ug giingnan, “Anak, andama ang imong gikinahanglan alang sa biyahe aron kamong duha makalakaw dayon. Hinaot unta nga ang Dios ug ang iyang anghel magbantay kaninyong duha.” Busa nanglakaw si Rafael ug ang batan-ong si Tobias ug uban kanila ang iro ni Tobias.

17Unya misugod paghilak ang iyang inahan. Miingon siya, “Nganong imo mang gipalakaw ang atong anak? Siya lamang ang bugtong makabuhi kanato. Kinsa na man karon ang mag-atiman kanato?

18Hilabihan ba gud kaimportante alang kanimo kadtong kuwartaha nga andam ka man pagsugal sa kinabuhi sa imong anak aron lamang pagkuha niadto?

19Nganong dili na man lang gayod kita malipay niining gihatag sa Dios kanato?”

20Miingon si Tobit kaniya, “Kalma lang. Moabot lagi siya didto ug makabalik nga walay kakulian ug sa imong kaugalingong mga mata makita mo siya nga mahibalik sa ato nga maayog lawas.

21Busa ayaw na kaguol mahitungod kanila, pinangga ko. Ubanan si Tobias sa usa ka maayong anghel. Magmalampuson ang iyang biyahe ug mobalik siya nga maayog lawas.” Tungod niana, mihunong sa paghilak si Ana.