Sirac 48 - Cebuano Meaning-Based Bible

Si Elias

1Unya1 Hari 17:1-24; 18:38; 19:15-16; 2 Hari 1:10-16; 2:11; Mal. 4:5-6. mitungha ang maisogon nga si Elias kansang mga pulong nagdilaab sama sa usa ka sulo.

2Nagdala siyag usa ka kagutom ngadto sa katawhan ug daghan kanila ang nangamatay tungod sa iyang pagkamainiton ngadto sa Ginoo.

3Sa pagsulti niya sa ngalan sa Ginoo, gipugngan niya ang ulan ug sa tulo ka higayon naghangyo siya nga ipakanaog ang kalayo.

4Elias, ang imong mga milagro katingalahan gayod! Walay lain nga makapasigarbo sa maong mga buhat!

5Sa ngalan sa Labing Halangdon gibanhaw nimo ang usa ka tawong patay.

6Gipahamtang nimo ang usa ka sakit ug ang kamatayon ngadto sa usa ka bantogan nga hari.

7Didto sa Sinai hidunggan nimo ang Ginoo nga nagbadlong kanimo ug nagpahayag sa iyang kabubut-on sa pagsilot sa iyang mga kaaway.

8Gidihogan nimo ang usa ka hari aron mahimong galamiton niadtong silota ug ang usa ka propeta aron mobanos kanimo.

9Gidala ikaw ngadto sa kahitas-an pinaagi sa usa ka alimpulos nga kalayo, diha sa usa ka karwahi nga gibitad sa nagsiga nga mga kabayo.

10Ang kasulatan nag-ingon nga andam ikaw sa pagpakita sa gitakda nga panahon aron pagbugnaw sa kasuko sa Dios sa dili pa kini mosugwak diha sa kapungot, nga ikaw “magdala sa mga amahan ug sa mga anak aron magkahiusa pag-usab” ug magpahiuli sa mga banay sa Israel.

11Palaran sila nga buhi nga makakita kanimo nga mobalik ingon man sila nga nangamatay na diha sa gugma kay kami usab mangabuhi.

Si Eliseo

12Sa2 Hari 2:9, 13. diha nga si Elias gidala sa alimpulos, si Eliseo napuno sa iyang espiritu. Samtang buhi pa siya, wala siya mahadlok sa mga hari ug wala sila makahimo pagpabuhat kaniya sa ilang gusto.

13Walay2 Hari 13:20-21. butang nga malisod kaayo alang kaniya. Bisan sa namatay na siya, ang iyang lawas naghimog milagro.

14Sa kinabuhi ug sa kamatayon naghimo siya ug katingalahan nga mga milagro.

15Apan2 Hari 18:11-12. bisan pa niining tanan, ang katawhan wala mobiya sa ilang makasasala nga paagi hangtod nga nabihag sila gikan sa ilang yuta ingon nga mga priso ug gipatibulaag sila ngadto sa tibuok kalibotan. Pipila na lamang ka buok ang nahibilin apan giharian gihapon sila sa mga kaliwat ni David.

16Ang uban nga mga tawo nagbuhat sa makapahimuot sa Ginoo, apan ang uban nagpadayon sa pagpakasala.

Si Ezequias

17Gipalig-onan2 Hari 20:20. ni Ezequias ang mga kota sa iyang siyudad ug gisangkapan kini ug tubig. Nagkalot siya ug usa ka bangag nga agianan sa tubig diha sa tibuok nga pangpang nga bato pinaagi sa mga kahimanan nga puthaw ug naghimo siyag tigomanan ug tubig.

18Sa2 Hari 18:13-17. panahon sa iyang pagkahari, gisulong ni Senakerib ang siyudad ug gipadala ang iyang labawng opisyal gikan sa Lakis. Gihagit niya ang Jerusalem ug nanghambog siya sa hilabihan gayod.

19Ang mga tawo nawad-an sa ilang kaisog ug mikurog sa kalisang. Gisakitan sila sama sa usa ka babaye nga nagbati.

20Apan2 Hari 19:15-20, 35. nag-ampo sila ngadto sa maluluy-on nga Ginoo, ang Balaan sa langit, nga sa walay langan mitubag sa ilang mga pag-ampo ug nagpadala kang Isaias aron pagluwas kanila.

21Gihapak sa Ginoo ang kampo sa Asiria, gipuo sila sa iyang anghel.

22Oo, si Ezequias naghimo sa makapahimuot sa Ginoo ug nagsunod sa malig-on nga panig-ingnan sa iyang katigulangan nga si David. Mao kini ang gisugo sa bantogang propeta nga si Isaias kansang mga panan-awon kasaligan.

23Gipasibog2 Hari 20:10-11. niya ang adlaw ug gidugangan ang gitas-on sa kinabuhi sa hari.

24Gihupay niya ang mga nagbangotan didto sa Jerusalem. Ang iyang gamhanan nga espiritu naglantaw ngadto sa umaabot

25ug gitagna niya unsa ang mahitabo sa dili pa ang kataposan sa panahon, ang tinagoan nga mga butang nga wala pa mahitabo.