1Kon pilion ka sa pagpangulo sa usa ka kombira, ayaw pagginarboso. Pagpakasama lang sa uban. Atimana ang mga bisita una ikaw molingkod.
2Human ikaw makatuman sa imong mga katungdanan, makalingkod ka na ug makalingawlingaw tipon sa uban. Tahoron ikaw nila tungod sa usa ka katungdanan nga maayo nimong pagkatuman.
3Kon mas magulang ka kay sa kadaghanan sa mga bisita, mahimo nga mosulti ka; imo kanang katungod. Apan angay nga mahibalo ka unsa ang imong gihisgotan ug ayaw pagbaldaha ang honi.
4Kon adunay giandam nga kalingawan, ayaw pagsigig tabi; dili kini mao ang panahon sa pagpasundayag sa imong kaalam.
5Ang honi diha sa usa ka kombira diin gidalit ang bino maoy usa ka bato nga rubi nga gitaod diha sa bulawan.
6Ang maayong honi ug maayong bino maoy bato nga esmeralda nga gitaod diha sa bulawan.
7Kon batan-on ka, ayaw pagsulti gawas kon kinahanglan apan dili gayod labaw sa makaduha ug diha lamang kon may mouna pagsulti kanimo.
8Ayaw paglikoliko ug isulti ang buot mong isulti sa pipila lamang ka pulong. Ipakita nga ikaw may igo nga kasayoran apan pagpakahilom lamang.
9Ayaw pagtrataha ang importante nga mga tawo nga daw tupong ikaw kanila ug ayaw pagsamok kon adunay nagsulti.
10Ang kabantog sa usa ka but-an nga tawo mag-una kaniya sama nga ang kilat mag-una sa dalugdog.
11Biya sa kombira sa husto nga panahon ug ayaw gayod pagpaulahi paglakaw. Ayaw paglangay diha sa ganghaan; pauli dayon sa inyo.
12Didto makalulinghayaw ikaw sumala sa imong gusto apan ayaw pagpakasala pinaagi sa pagpanghambog.
13Ayaw kalimot sa pagpasalamat sa imong Magbubuhat tungod sa pagtugot kanimo pagpahimulos sa daghang maayong mga butang.
Ang Paghubad sa Balaod14Kon mahadlokon ikaw sa Ginoo, dawaton mo ang iyang pagbadlong. Panalanginan niya sila nga mobangon ug sayo sa kabuntagon aron mag-ampo.
15Pagtuon sa iyang Balaod ug makakat-on ikaw pag-ayo niini. Kon dili kinasingkasing ang imong paghimo niini, mapakyas gayod ikaw.
16Kon mahadlokon ikaw sa Ginoo, mahibalo ikaw unsa ang matarong ug mahimo kang bantogan tungod sa imong pagkamakiangayon.
17Ang mga makasasala dili mopatuo ug badlong ug hubaron nila ang Balaod sa paagi nga mahiangay sa ilang gusto.
18Ang but-an nga mga tawo maghunahuna sa tagsatagsa ka opinyon apan ang mga tawo nga mapahitas-on dili motugot nga may mobabag sa ilang paagi.
19Ayaw gayod pagbuhat sa bisan unsang butang sa walay paghunahuna niini pag-ayo ug human ikaw makabuhat ug usa ka butang, ayaw na paglingi ug pag-ingon nga maayo pa unta nga laing butang ang imong nabuhat.
20Ayaw paghimo ug usa ka buhat nga peligroso ug ayaw paghimo sa samang sayop sa makaduha.
21Ayaw pagpalabig salig sa imong kaugalingon bisan kon ang paagi morag sayon lamang.
22Pagbantay kanunay asa ikaw padulong.
23Bisan unsay imong buhaton pagmatngon; mao kini ang pagtuman sa mga kasugoan sa Ginoo.
24Ang pagtuo sa Balaod nagkahulogan sa pagtuman sa mga sugo sa Ginoo. Kon mosalig ikaw sa Ginoo, dili ikaw maalaot.
Who We AreWhat We EelieveWhat We Do
2025 by iamachristian.org,Inc All rights reserved.