1Sa tuig 151, si Demetrio nga anak ni Seleuco mibiya sa Roma ug midunggo uban sa pipila niya ka sakop didto sa usa ka lungsod sa baybayon sa Mediteraneo diin giproklamar niya ang iyang kaugalingon ingon nga hari.
2Samtang nagpadulong siya ngadto sa harianong palasyo sa iyang mga katigulangan, gidakop sa mga sundalo si Antioco V ug si Lisias aron dad-on ngadto kang Demetrio.
3Sa pagkadungog niini ni Demetrio, miingon siya, “Dili ako gusto nga makakita kanila!”
4Busa gipatay sila sa mga sundalo ug gikuha ni Demetrio ang trono.
5Unya ang tanang mga mabudhion nga mga Judio nga wala magtahod sa Dios miadto kang Demetrio pinangulohan ni Alcimo nga gustong mahimong Pangulong Pari.
6Gisumbong nila ang ubang mga Judio ug miingon sila, “Gipatay ni Judas ug sa iyang mga igsoon ang tanan nga midapig kanimo ug gihinginlan kami nila gikan sa among nasod.
7Busa pagpadala ug usa ka tawo nga imong kasaligan aron pag-adto ug pagsusi sa tanan nga mga kadaot nga nahimo ngadto sa among mga kabtangan ug sa kayutaan sa hari ug sa pagsilot kang Judas, sa iyang mga igsoong lalaki ug sa tanan nga midapig kanila.”
8Tungod niini si Hari Demetrio mipili kang Baquides nga usa sa iyang magtatambag ug gobernador usab sa Siria Mayor. Usa siya ka dakong tawo didto sa emperyo ug maunongon sa hari.
9Gipadala siya ug ang daotan nga si Alcimo, ang gitudlo nga Pangulong Pari, aron sa pagpanimalos sa mga Judio.
10Mibiya sila sa Antioquia ug miabot sa Judea uban sa usa ka dakong pundok sa kasundalohan. Si Baquides misulay pagbitik kang Judas ug sa iyang mga igsoon nga lalaki pinaagi sa pagpadala kanila ug mga sinugo uban sa mga tanyag sa kalinaw.
11Apan sa pagkakita ni Judas ug sa iyang mga igsoon unsa kadako ang pundok sa mga sundalo nga ilang gidala, wala sila motuo sa gisulti sa mga sinugo.
12Unya may usa ka pundok sa mga magtutudlo sa Balaod nga miadto kang Alcimo ug kang Baquides, naghangyo nga hatagan silag hustisya.
13Kining relihiyoso ug makinasodnon nga mga Hasidio maoy unang mga Judio nga misulay pagpakigsabot kang Alcimo ug kang Baquides.
14Misalig sila kang Alcimo kay siya usa man ka pari nga kaliwat ni Aaron ug naghunahuna sila nga dili siya modagmal kanila.
15Gipasaligan sila ni Alcimo sa iyang malinawon nga mga tuyo ug misaad siya nga walay kadaot nga moabot kanila o sa ilang mga higala.
16Apan sa nagsugod na sila pagsalig kaniya, gidakop niya ang 60 kanila ug gipamatay sa maong adlaw sumala sa giingon sa kasulatan:
17“AngSal. 79:2-3. dugo sa imong matinumanon nga katawhan gibubo;
ang ilang mga lawas nagpasad libot sa Jerusalem,
ug walay bisan usa nga nahabilin aron paglubong sa mga patay.”
18Sa pagkahitabo niini, ang tanang mga tawo nahadlok kang Alcimo ug kang Baquides ug miingon sila, “Wala sila mahibalo unsay kahulogan sa kamatuoran o sa hustisya. Nanumpa sila apan wala nila kini tumana!”
19Si Baquides mibiya sa Jerusalem ug nagpahimutang sa iyang kampo didto sa Bet Zait. Nagsugo siya nga dakpon ang pipila sa mga matinumanon nga Judio lakip ang daghan nga mga Judio nga mitipon kaniya ug nagsugo siya nga pamatyon sila ug itambog ngadto sa usa ka lalom nga gahong.
20Gihatag ni Baquides ngadto kang Alcimo ang awtoridad sa pagmando sa nasod ug nagbilin siyag mga tropa didto aron pagtabang kang Alcimo ug mibalik siya ngadto sa hari.
21Unya misugod si Alcimo sa iyang pakigbisog aron ilhon siya nga Pangulong Pari.
22Ang tanang naghatag ug kasamok sa nasod miabin kaniya ug ang yuta sa Judea nahimong ubos sa ilang pagmando ug mao kini ang hinungdan sa dagkong kalisdanan nga gisagubang sa mga Judio.
23Nakita ni Judas nga ang kadaot nga gipasiugdahan ni Alcimo ug sa iyang mga tawo mas dako pa kay sa kadaot nga nahimo sa mga dili Judio.
24Busa gilibot niya ang tibuok nasod sa Judea ug nanimalos siya sa tanang tawo nga sa kinaugalingon mitipon kang Alcimo ug gidid-an niya sila sa paggula sa mga lungsod ug pag-adto sa kaumahan.
25Sa pagkakita ni Alcimo nga si Judas ug ang iyang mga tawo nag-anam sa pagkagamhanan ug sa pagkaamgo niya nga dili siya makahimo pagsukol batok kanila, mibalik siya ngadto sa hari ug gibutangbutangan niya sila ug dagkong mga kalapasan.
26Unya gipadala sa hari si Nicanor, usa sa iyang labing pinasidunggan nga opisyal nga nagdumot sa mga Judio, ug gimandoan sa pagpuo kanila.
27Si Nicanor miadto sa Jerusalem uban sa usa ka dakong pundok sa mga sundalo. Gilansisan niya si Judas ug ang iyang mga igsoon pinaagi sa pagpadala kanila ug mga tanyag sa kalinaw. Miingon siya,
28“Dili kinahanglan nga mag-away kita. Moanha ako kaninyo uban sa gamay nga pundok nga kauban alang sa usa ka malinawon nga pakigsultihanay.”
29Busa miadto siya kang Judas ug nagbinayloay sila ug matinahuron nga mga yukbo apan ang mga kaaway ni Judas nag-andam sa pagsikop kaniya.
30Sa pagkasayod ni Judas nga ang pagduaw ni Nicanor usa ka bahin sa laraw batok kaniya, nahadlok siya ug mihukom sa dili pagpakigkita kaniya pag-usab.
31Nakaamgo si Nicanor nga ang iyang laraw nasayran busa mibiya siya sa Jerusalem aron pagpakiggubat kang Judas duol sa Caparsalama.
32Mga 500 sa kasundalohan ni Nicanor ang nangamatay ug ang nahibilin miikyas ngadto sa kota sa Jerusalem.
33Unya human niini, si Nicanor miadto sa Bukid sa Sion. Ang pipila sa mga pari nga nahibilin didto sa Templo uban sa pipila ka mga pangulo sa katawhan miadto aron pagsugat kaniya uban sa mga pulong sa kalinaw ug aron pagpakita kaniya sa sinunog nga halad nga gisakripisyo alang sa hari.
34Apan gibugalbugalan niya sila, giinsulto ug gihimong hugaw sumala sa ilang seremonyas. Mapagarbohon siyang misulti
35ug masuk-anon nga nanghulga, “Kon dili ninyo itugyan si Judas ug ang iyang kasundalohan ngari kanako sa walay langan, sunogon ko kining Templo inigbalik nako human sa akong kadaogan.” Ug mitalikod siya nga napungot pag-ayo.
36Ang mga pari mibalik ngadto sa hawanan sa Templo ug mibarog atubangan sa altar ug sa Templo. Mihilak sila ug nag-ampo,
37“O Ginoo, gipili mo kining Temploha aron magdala sa imong ngalan ug aron mahimong usa ka dapit sa pag-ampo ug sa pangaliya alang sa imong katawhan.
38Karon panimasli kining tawhana ug ang iyang kasundalohan. Mangamatay unta sila diha sa gubat. Hinumdomi giunsa nila pagsultig daotan batok kanimo ug ayaw itugot nga may usa kanila nga mabuhi.”
39Mibiya si Nicanor sa Jerusalem ug gibutang niya ang iyang ulohang kampo didto sa Bet Huron diin ang kasundalohan sa Siria mitipon kaniya.
40Sa laing bahin, si Judas nagkampo didto sa Adasa uban sa 3,000 niya ka sakop. Didto nag-ampo si Judas,
41“Ginoo,2 Hari 19:35. sa diha nga ang usa ka hari mipadalag mga sinugo aron pag-insulto kanimo, ang imong anghel miadto ug mipatay sa 185,000 sa iyang kasundalohan.
42Karon lumpaga usab kining kasundalohan nga anaa sa among atubangan karong adlawa ug pahibaw-a ang tagsatagsa nga si Nicanor gisilotan tungod kay giinsulto niya ang imong balaang Templo. Siloti siya sumala sa angay sa iyang kadaotan.”
43Ang mga kasundalohan nagkasangka sa ika-13 nga adlaw sa bulan sa Adar ug ang kasundalohan ni Nicanor naparot. Si Nicanor mismo maoy una nga namatay sa gubat
44ug sa pagkakita sa iyang mga sundalo nga namatay na siya, gisalibay nila ang ilang mga hinagiban ug nanagan sila.
45Gigukod sila sa mga Judio sa tibuok adlaw gikan sa Adasa ngadto sa Geser. Ang mga Judio nga naggukod kanila nagpadayon sa pagpatingog sa tawag alang sa gubat pinaagi sa ilang mga trumpeta.
46Ang katawhan sa naglibot nga mga balangay sa Judea nanggula ug miataki usab sa nagdagan nga mga kaaway. Kini nakapugos sa mga kaaway sa pagsibog padulong sa mga Judio nga naggukod kanila ug ang tanang kaaway nangamatay didto sa sangka. Walay usa kanila nga nahibilin.
47Gisakmit sa mga Judio ang ilang kabtangan ug unya gipunggotan nila si Nicanor sa iyang ulo ug sa iyang tuo nga bukton nga iyang gibakyaw sa hilabihang pagpagarbo. Gidala nila ang iyang ulo ug ang iyang bukton aron ipasundayag sa gawas sa Jerusalem.
48Dako kaayo ang kasadya sa mga Judio ug gisubay nila kadtong adlawa isip adlaw sa paglipay ug pagmaya.
49Gihimo nila nga ang ika-13 ka adlaw sa Adar kinahanglang saulogon sa matag tuig.
50Unya may kalinaw didto sa yuta sa Judea sulod sa mubong panahon.
Who We AreWhat We EelieveWhat We Do
2025 by iamachristian.org,Inc All rights reserved.
