Sirac 6 - Cebuano Meaning-Based Bible

1Ayaw pagpakig-away kondili pagpakighigala hinuon. Ang daotang dungog magdala kanimo sa kaulawan nga angay sa mga bakakon.

2Ayaw pagpadala sa kainit sa imong pagbati kay kini makadaot sa imong kalag sama sa mahimo sa usa ka bangis nga toro.

3Ang imong sangpotan sama sa usa ka patay nga kahoy nga walay mga dahon o bunga ug ikaw ray nakaingon niini.

4Ang daotan nga mga tinguha makalaglag kanimo ug maghimo kanimo nga usa ka kataw-anan ngadto sa imong mga kaaway.

Ang Panaghigalaay

5Kon ikaw matinahuron ug matinagdanon, mahimo kang higala sa daghang mga tawo.

6Pakigdait sa daghan apan pagpakitambag sa usa lamang ka tawo sa usa ka libo.

7Sa imong pagpakighigala, ayaw pagdalidali sa pagsalig kaniya; siguroa nga matinud-anon siya kanimo.

8Adunay mga tawo nga mahimong imong mga higala lamang kon ikaw mapuslanon kanila apan dili sila mounong kanimo sa panahon sa kalisdanan.

9Adunay uban nga masilo kanimo tungod sa panagsumpaki ug unya pakaulawan ikaw niya pinaagi sa pagbutyag sa tanan mahitungod niini.

10-11Adunay uban nga makigsalo kanimo samtang hamugaway pa ikaw; makig-unong sila kanimo daw imong anino ug mosugo usab sa imong mga sulugoon apan dili sila mounong kanimo sa panahon sa kalisdanan.

12Kon magkalisodlisod na ikaw, motalikod sila kanimo ug dili na ikaw makakita kanila.

13Pagpahilayo sa imong mga kaaway ug pagbantay sa imong mga higala.

14Ang usa ka maunongon nga higala sama sa usa ka lig-on nga dalangpanan; pangitag sama niini ug makaplagan nimo ang usa ka bahandi.

15Walay sama ka bililhon niini ug dili kini masukod.

16Ang usa ka maunongon nga higala sama sa usa ka tambal nga mag-amping kanimo gikan sa sakit. Sila lamang nga mahadlokon sa Ginoo maoy makakaplag sa maong matang sa higala.

17Ang usa ka tawo nga mahadlokon sa Ginoo makahimo ug matuod nga paghinigalaay kay tagdon man niya ang iyang mga higala sama sa iyang kaugalingon.

Pagkat-on gikan sa Kaalam

18Anak, pagkat-on pagmahal sa Kaalam samtang batan-on ka pa ug makaplagan gihapon nimo siya sa diha nga matigulang ka na.

19PaningkamotSan. 5:7-8. kutob sa imong mahimo sa pagpangita sa Kaalam sama sa usa ka mag-uuma nga magdaro ug magpugas unya may mapaabot kang dakong ani. Magtrabaho ka alang niini sa hamubo nga panahon apan sa dili madugay magpahimulos ikaw sa imong kahago.

20Ang mga ignorante ug haguka ug baroganan dili makaagwanta sa disiplina sa Kaalam.

21Ang gipangayo sa Kaalam bug-at ra kaayo kay sa ilang buot pas-anon busa biyaan lang dayon nila kini.

22Ang Kaalam nagkahulogan ug disiplina gayod ug dili daghang tawo ang makahimo sa pagdisiplina sa ilang kaugalingon.

23Anak, pamatia ako ug dawata ang akong tambag.

24Ibutang ang mga talikala sa Kaalam libot sa imong mga tiil ug ang yugo niini diha sa imong liog.

25Dawata kini diha sa imong abaga ug ayaw pagmahay sa iyang mga gapos.

26Sunda ang Kaalam ug subaya ang iyang mga paagi sa tibuok nimong kasingkasing.

27Pangitaa siya ug magpadayag siya kanimo. Kupot kaniya ug ayaw pamuhi.

28Unya makita nimo ang kalinaw sa hunahuna nga iyang gitanyag ug mahimo siya nga imong kalipay.

29-30Ang mga timaan sa kaulipnan nga imong gisul-ob mahimong mga timaan sa harianon nga kahalangdon. Ang iyang mga talikala mahimong imong panalipod ug pas-anon nimo ang iyang yugo sama sa usa ka harianon nga bisti.

31Isul-ob nimo ang Kaalam sama sa usa ka harianong kupo ug korona.

32Anak, makakat-on ikaw kon buot ka. Mahimo kang abtik kon buot ikaw niini.

33Kon gusto ikaw nga mamati, makakat-on ka ug mahimo kang maalamon.

34Lakaw diin atua ang mga tigulang; pangitaa ang usa ka tawo nga maalamon ug pabilin didto uban kaniya.

35Pamati gayod mahitungod sa mga balaanong mensahe ug sa bisan unsa nga nagpakita ug pagpanabot.

36Kon makaplagan nimo ang usa ka tawo nga maalamon, pagmatag sayo ug adtoa siya kanunay.

37IgahinJos. 1:8; Sal. 1:2. ang tibuok nimong panahon sa pagtuon sa mga sugo sa Ginoo ug sa paghunahuna mahitungod niini. Hatagan ikaw niya sa kahibalo ug kaalam nga imong gipangita.