Judit 10 - Cebuano Meaning-Based Bible

Miadto si Judit sa Kampo ni Holofernes

1Sa pagkatapos ni Judit sa pag-ampo ngadto sa Dios sa Israel,

2mitindog siya ug gitawag niya ang iyang ulipon nga babaye ug nanaog sa balay sumala sa kanunay niyang gibuhat sa mga adlaw nga Igpapahulay ug sa mga Adlaw sa Kasaulogan.

3Gihubo niya ang bisti nga sako ug ang iyang mga bisti sa pagka biyuda ug naligo siya ug namutang ug mahalon nga mga pahumot. Gisudlay niya ang iyang buhok, gibugkosan ug laso ug nagbisti siya sa labing matahom nga mga sinina nga naandan niyang isul-ob sa malipayong mga higayon samtang buhi pa ang iyang bana nga si Manases.

4Nagsul-ob siya ug mga sandalyas ug sa tanan nga labing mahalon nga mga alahas, mga singsing ug ariyos, mga pulseras sa iyang mga bukton ug mga tiil. Matahom kaayo siya ug wala siya magduhaduha nga makadani sa pagtagad kang bisan kinsang tawo nga makakita kaniya.

5Gihatagan ni Judit ang iyang ulipon nga babaye sa usa ka panit nga sudlanan sa bino ug usa ka botilya nga lana aron iyang dad-on. Gipuno niya ang usa ka sudlanan sa sinangag nga sebada, mga torta sa binulad nga igos ug pipila ka buok pan nga giluto sumala sa balaod sa pagkaon sa mga Judio. Giayo niya pagputos ang tanang mga pagkaon ug mga sud-an ug gihatag kini sa iyang ulipon.

6Unya ang duha ka babaye mibiya sa ila ug miadto sa mga ganghaan sa Betulia, diin gikaatubang nila si Uzias ug ang mga kadagkoan sa lungsod nga si Cabris ug si Carmis nga nagguwardiya didto.

7Sa pagkakita sa mga lalaki kang Judit human siya makailis ug makapangareglar, nadani sila sa iyang katahom ug miingon sila kaniya,

8“Ang Dios sa atong katigulangan manalangin unta kanimo ug maghatag ug kalamposan sa imong laraw aron magdala ikaw ug himaya ngadto sa Jerusalem ug kadaogan ngadto sa Israel.”

Nag-ampo si Judit

9ug unya miingon, “Paablihi sa mga tawo ang mga ganghaan alang kanako. Padulong na ako aron pagbuhat sa akong gisulti kaninyo.” Unya gisugo nila ang batan-ong mga lalaki nga paablihan ang ganghaan alang kaniya

10ug si Judit ug ang iyang ulipon mibiya sa siyudad. Ang mga lalaki nagtan-aw kaniya sa iyang paglugsong gikan sa bukid ngadto sa walog hangtod nga wala na siya makita.

11Samtang naglakaw ang duha ka babaye latas sa walog, usa ka patrolya sa mga taga-Asiria ang nakasugat kanila.

12Gidakop nila si Judit ug gisukitsukit sa pag-ingon, “Taga diin ka mang nasora? Diin ka man gikan ug asa ka man paingon?”

Mitubag siya, “Ako usa ka Hebreo. Apan mikagiw ako gikan sa mga Israelita tungod kay sila ipalaglag sa Dios kaninyo.

13Padulong ako sa pagpakigkita kang Holofernes, ang heneral nga nagmando sa inyong kasundalohan aron paghatag kaniya ug pipila ka kasaligan nga mga taho. Makatudlo ako kaniya unsaon pagsulong ngadto sa kabukiran ug pag-ilog sa tibuok kayutaan nga walay bisan usa nga mamatay.”

14Ang mga lalaki mitutok kaniya tungod kay hilabihan man siya katahom. Namati sila sa iyang gisulti ug miingon,

15“Giluwas mo ang imong kinabuhi pinaagi sa paglugsong nganhi aron sa pagpakigkita sa among heneral. Pipila sa among mga tawo modala kanimo ngadto sa iyang tolda ug ipailaila ka kaniya.

16Ayaw kahadlok kaniya. Tug-ani lamang siya sa imong gisulti kanamo ug ayohon ka niya pagtagad.”

17Nagtudlo silag 100 ka tawo aron mokuyog kang Judit ug sa iyang ulipon ngadto sa tolda ni Holofernes.

18May dakong kaguliyang didto sa kampo sa mga taga-Asiria sa diha nga mikaylap gikan sa usa ka tolda ngadto sa lain ang balita sa paghiabot ni Judit. Samtang nagbarog siya gawas sa tolda ni Holofernes ug nagpaabot nga ipailaila siya kaniya, daghang mga sundalo nga taga-Asiria miabot ug mialirong kaniya.

19Nakadayeg sila sa iyang kaanyag ug nakapangutana unsa kahang matanga ang katawhan sa mga Israelita. Nagpangutan-anay sila, “Kinsay makayam-id sa katawhan nga ang mga babaye ingon niini katahom? Mas maayo pang patyon ta ang tanan nilang mga lalaki kay kondili kining mga Judio makadani sa tibuok kalibotan.”

20Unya ang mga guwardiya ni Holofernes ug ang iyang kaugalingong mga sulugoon migula ug gipasulod si Judit ngadto sa tolda.

21Si Holofernes nagpahulay sa iyang higdaanan ilalom sa usa ka moskitero nga hinabol sa hilo nga porpura ug dalag ug gidayandayanan ug mga esmeralda ug ubang mahalon nga mga bato.

22Sa pagpahibalo sa mga tawo kaniya nga miabot si Judit, migula siya sa tolda. Nag-una kaniya ang mga suga nga plata.

23Sa pagduol ni Judit kaniya ug sa iyang mga sulugoon, natingala sila sa iyang kaanyag. Mihapa si Judit sa yuta atubangan ni Holofernes. Apan ang mga sulugoon ni Holofernes mipatindog kaniya.