1Si Rayna Ester nag-ampo sulod sa tulo ka adlaw. Unya iyang gihubo ang iyang mga sapot ug nagsul-ob na usab siya sa iyang naggilakgilak nga mga bisti.
2-3Diha sa tibuok niyang harianon nga kasanag, nag-ampo siya pag-usab sa iyang Dios ug manluluwas nga nakakita sa tanan. Milakaw siya ingon sa usa ka rayna ug mibiya siya sa iyang lawak nga inubanan sa duha ka babaye nga sulugoon: ang usa kanila nag-abay kaniya nga nag-agak sa iyang bukton ug
4ang usa nagbitbit sa iyang kapa.
5Ang nawong ni Rayna Ester misanag sa katahom. Ang iyang panagway masadya ingon nga siya maanyag apan sa iyang kasingkasing puno siya sa kalisang.
6Miagi siya latas sa tanang mga pultahan ug misulod siya sa lawak sa trono diin mibarog siya atubangan sa hari. Ang hari naglingkod sa iyang harianong trono, binistihan sa iyang mahimayaong mga kapa nga nalukop sa bulawan ug mahalon nga mga alahas—usa ka kulba-hinam nga talan-awon.
7Ang iyang nawong miamag sa kasanag apan sa pagkakita niya kang Ester, mitutok siya kaniya uban sa dakong kalagot. Naluya ug naluspad si Ester. Hapit siya kuyapi busa napugos siya sa pagsandig sa iyang ulo didto sa abaga sa iyang sulugoon.
8Apan giusab sa Dios ang kasuko sa hari ngadto sa malumo nga pagtagad. Mitindog siya pagdali gikan sa iyang trono ug gikuptan ang mga bukton ni Ester hangtod nga makahimo na siya pagtindog. Gialam-alaman siya sa hari sa makahupay nga mga pulong.
9Miingon siya kaniya, “Unsa man, Ester? Imo akong bana busa dili ka angay mahadlok.
10Ang atong balaod alang lamang sa ordinaryo nga mga tawo; dili ikaw mamatay.
11Dali ngari kanako.”
12Gitunol niya ang iyang bulawan nga sitro ug pinaagi niini gihikap niya si Ester diha sa liog unya iya siyang gihagkan ug giingnan, “Tug-ani ako unsa ang imong tuyo.”
13Ang rayna mitubag, “Sa pagtan-aw ko kanimo, agalon ko, naghunahuna ako nga nagtan-aw ako sa usa ka anghel sa Dios ug gidaog ako sa imong makataha nga kahalangdon.
14Kahibulongan ka kaayo ug ang imong nawong puno kaayo sa kaluoy.”
15Apan samtang nagsulti siya gikuyapan siya pag-usab.
16Ang hari nahingawa mahitungod kaniya ug ang tanan niyang mga kaabag naninguha nga maulian siya.
Who We AreWhat We EelieveWhat We Do
2025 by iamachristian.org,Inc All rights reserved.
