1Sa pagkakita ni Jonatan nga ang mga panghitabo maayog lakaw alang sa iyang kaayohan, nagpili siya ug mga embahador ug nagpadala kanila ngadto sa Roma aron pagdason ug pagbag-o sa panaghigalaay uban sa mga Romano.
2Nagpadala usab siya ug mga sulat nga may samang mga mensahe ngadto sa Esparta ug sa ubang mga dapit.
3Ang mga embahador nangadto sa Roma diin gidawat sila ngadto sa hawanan sa Senado ug mitaho sila nga ang Pangulong Pari nga si Jonatan ug ang nasod nga Judio nagpadala kanila aron pagbag-o sa unang mga bugkos sa panaghigalaay ug panag-abin sa Roma.
4Gisangkapan sila sa mga Romano ug mga sulat alang sa mga awtoridad sa matag nasod nga ilang agian, nagpasalig kanila nga dili sila hilabtan inig-agi nila diha sa ilang pagbalik ngadto sa yuta sa Judea.
5Ania ang usa ka kopya sa sulat ni Jonatan nga iyang gisulat ngadto sa mga taga-Esparta:
6“Si Jonatan ang Pangulong Pari, ang nasodnong konseho sa mga pangulo, ang mga pari ug ang uban sa katawhan sa Judea, ngadto sa among mga kaigsoonan sa Esparta, komusta.
7Sa unang mga panahon, ang inyong hari nga si Ario nagpadala ug usa ka sulat ngadto sa among Pangulong Pari nga si Onias nga nagsaysay nga ang atong duha ka nasod naghigalaay sumala sa gipakita sa kopya nga gipauban.
8Gidawat ni Onias ang inyong embahador uban sa bug-os nga mga pagpasidungog ug giila niya nga nakadawat siya sa inyong sulat, nga nagpahayag sa atong panag-abin ug panaghigalaay.
9Ug karon, bisan wala kami magkinahanglan sa maong pagpakig-abin kay nakaplagan namo ang among tuboran sa kusog diha man sa balaan nga mga basahon nga among gihuptan,
10nagsulat kami aron pagbag-o sa among bugkos sa panag-inigsoonay ug panaghigalaay uban kaninyo. Dili kami buot nga mahimong bug-os nga mga langyaw ug daghan nang mga katuigan nga milabay sukad sa inyong kataposan nga pagsulat.
11Sulod sa mga katuigan gigamit namo ang tanang kahigayonan, sa among mga adlaw sa pangilin ug sa ubang sibo nga mga adlaw aron paghinumdom kaninyo diha sa among paghalad sa among mga sakripisyo ug paghimo sa among mga pag-ampo sanglit sibo ug angay alang sa mga igsoon ang paghimo niini.
12Nahimuot usab kami nga ang kabantog miabot kaninyo.
13Apan may daghang mga kalisdanan nga miabot kanamo ug napugos kami sa pagpakig-away sa daghang mga gubat tungod kay nahamutang kami ubos sa kanunayng pag-ataki gikan sa naglibot nga mga nasod.
14Sulod niining panahon sa gubat, wala kami mobuot sa pagsamok kaninyo o sa among uban nga mga kaabin ug higala,
15kay aduna kami hinabang gikan sa Ginoo nga maoy nagbuntog sa among mga kaaway ug nagluwas kanamo gikan kanila.
16Busa gipili namo si Numenio nga anak ni Antioco uban ni Antipater nga anak ni Jason ug gipadala namo sila nga mga embahador ngadto sa Roma aron pagbag-o sa among mga bugkos sa panag-abin ug panagsanggaay uban sa mga Romano.
17Gibaoran usab sila namo sa pag-adto kaninyo uban sa among mga yukbo ug paghatag niining sulat mahitungod sa pagbag-o sa atong bugkos sa panag-igsoonay.
18Ug karon nagahangyo kami ug usa ka balos niining sulata.
19“Ang mosunod maoy usa ka kopya sa unang sulat:
20“‘Si Hari Ario sa Esparta ngadto kang Onias, ang Pangulong Pari, komusta.
21Nakakaplag kamig usa ka dokumento mahitungod sa mga taga-Esparta ug sa mga Judio nga nagpakita nga kita managparyenti ug nga ang duha nato ka nasod mga kaliwat ni Abraham.
22Karon nga ato na kining nahibaloan, palihog padad-i kami ug usa ka taho mahitungod sa inyong pagkabutang.
23Amo unya kamong tubagon pinaagi sa sulat nga magpasabot nga andam kami sa pagpakig-ambit sa among mga katigayonan, lakip sa mga baka ug mga kabtangan kon mohimo usab kamo niini. Naghatag kami ug kasugoan sa among mga embahador aron hatagan kamo nila ug hingpit nga taho mahitungod niining mga butanga.’”
Mga Pakiggubat ni Jonatan ug ni Simon24Nasayod si Jonatan nga ang mga opisyal ni Demetrio mibalik pagsulong kaniya uban sa usa ka mas dako pang pundok sa kasundalohan kay sa kaniadto.
25Wala mobuot ni Jonatan sa paghatag kanila ug usa ka higayon sa pagsulod ngadto sa iyang kaugalingong yuta busa mibiya siya sa Jerusalem ug miadto aron pagsugat kanila didto sa kayutaan sa Hamat.
26Nagpadala si Jonatan ug mga espiya ngadto sa mga kampo sa kaaway nga nagtaho kaniya nga ang kasundalohan sa kaaway nanaghimo ug mga laraw sa pagsulong sa mga Judio sa pagkagabii.
27Sa pagsalop sa adlaw nagsugo si Jonatan sa tanan niyang mga sundalo sa pagbantay ug sa pag-andam sa ilang mga hinagiban alang sa usa ka pakugang nga ataki sa bisan unsang panahon sulod sa kagabhion. Nagbutang usab siya ug mga guwardiya libot sa tibuok kampo.
28Sa pagkasayod sa mga sundalo sa kaaway nga si Jonatan ug ang iyang mga tawo andam sa gubat, nangalisang sila ug nagkatibulaag pagdagan ug gibiyaan nga nagsiga ang ilang mga kalayo sa kampo.
29Si Jonatan ug ang iyang mga tawo nakakita sa mga kalayo sa kampo apan wala makaamgo unsa ang nahitabo hangtod sa pagkaugma sa buntag.
30Unya migula si Jonatan aron paggukod kanila apan wala siya makaapas kanila tungod kay nakatabok na man sila sa Suba sa Eleutero.
31Unya miliko si Jonatan ug misulong sa usa ka tribo sa mga Arabo nga ginganlag mga Sabadeano. Gibuntog niya sila ug gipanakmitan sa ilang mga kabtangan.
32Unya gibungkag niya ang ilang kampo ug miadto siya sa Damasco ug nagsusi sa tibuok kayutaan nga diha sa agianan.
33Samtang nahitabo kini, si Simon migula usab alang sa usa ka gubat ug nakairog hangtod sa Ascalon ug sa silingan nga mga kota. Unya miliko siya ngadto sa Jopa
34ug nagbutang siya ug usa ka bahin sa kasundalohan didto tungod kay nakadungog man siya nga ang mga tawo naglaraw sa pagtahan sa kota sa Jopa ngadto sa mga sundalo ni Demetrio.
35Sa paghibalik ni Jonatan, mitawag siya sa konseho sa mga pangulo ug naghimo siyag mga laraw uban kanila aron pagtukod ug mga kota didto sa Judea
36aron patas-an ang mga paril sa Jerusalem ug aron pagtukod ug usa ka hataas nga paril aron mahimulag ang kota sa siyudad. Nagpalain kini sa kota, aron ang mga kaaway dili na makahimo sa pagpalit ug sa pagbaligya ug bisan unsa.
37Ang mga tawo naghiusa sa pagtrabaho aron paglig-on sa mga panalipod sa siyudad tungod kay usa ka bahin sa paril sa silangan nga buyon sa Walog sa Kidron naguba ug ang bahin sa Capenata nagkinahanglan nga ayohon.
38Gibag-o usab pagtukod ni Simon ang lungsod sa Adida sa tiilan sa mga bungtod. Gilig-on niya kini ug gitukoran niya ug mga ganghaan nga may trangka.
Gidakop si Jonatan ni Tripo39Unya naglaraw si Tripo ug usa ka pagsukol batok kang Hari Antioco aron makahimo siya sa iyang kaugalingon nga hari sa Siria.
40Apan nahadlok siya nga si Jonatan dili mouyon niini ug makiggubat batok kaniya aron pagsanta niini. Busa giandam ni Tripo ang iyang kasundalohan ug miadto siya sa Betsan ug malaomon nga madakpan niya si Jonatan ug mapatay.
41Apan si Jonatan miadto usab sa Betsan uban sa 40,000 ka maayong pagkabansay nga mga sundalo.
42Sa pagkakita ni Tripo unsa kadako ang pundok sa kasundalohan nga gidala ni Jonatan kuyog kaniya, nahadlok siya sa paghimo ug bisan unsang lakang.
43Busa gidawat niya si Jonatan uban sa tanang pasidungog, gipailaila siya ngadto sa tanan niyang magtatambag, gihatagan siya ug mga gasa ug nagsugo siya sa iyang mga magtatambag ug mga sundalo sa pagtahod kang Jonatan sama sa ilang pagtahod kaniya.
44Gipangutana niya si Jonatan, “Nganong gisamok pa man gayod nimo pag-ayo kining mga sundalo nga wala man kita managgubat?
45Nganong dili man nimo sila papaulion? Pagpili ug pipila ka mga tawo nga magpabilin uban kanimo ug unya ubani ako ngadto sa Tolemais. Itahan ko kanimo ang siyudad ingon man ang uban nga mga kota, ang mga tropa, ug ang tanan nga mga opisyal. Unya motalikod ako ug mogikan. Sa pagkatinuod, mao kanay katarongan ngano nga ania ako dinhi.”
46Si Jonatan mituo kaniya ug misunod sa iyang tambag. Gipapauli niya ang iyang mga sundalo ngadto sa Judea.
47Nagdala siya ug 3,000 ka lalaki uban kaniya apan gibilin ang 2,000 kanila didto sa Galilea, samtang 1,000 lamang ang miuban kaniya sa nahibilin nga panaw.
48Apan sa paghisulod ni Jonatan sa Tolemais, gisirhan sa mga tawo sa siyudad ang mga ganghaan, gidakop siya ug gipatay ang tanan nga mikuyog kaniya.
49Nagpadala si Tripo ug mga sundalo nga naglakaw ug nagkabayo ngadto sa Galilea ug sa Walog sa Jezreel aron pagpatay sa nahibilin sa mga sundalo ni Jonatan.
50Ang mga tropa nga Judio naghunahuna nga si Jonatan hidakpan ug gipatay uban sa tanan nga mikuyog kaniya busa nagdinasigay sila sa usag-usa ug nanggula nga hinan-ay alang sa gubat.
51Sa pagkakita sa kasundalohan sa kaaway nga ang mga Judio andam sa pagpakig-away alang sa ilang kinabuhi, nanagan sila pagbalik.
52Unya ang mga sundalong Judio namalik nga walay kabilinggan ngadto sa Judea apan nangalisang sila pag-ayo. Ang tibuok nasod nagbangotan sa hilabihan ug naghunahuna nga si Jonatan ug ang tanan niyang mga tawo gipatay.
53Ang tanang naglibot nga mga nasod misulay dayon sa paglaglag kanila. Naghunahuna sila nga ang mga Judio wala nay pangulo o mga kaabin ug nga miabot na ang panahon sa pagpuo kanila ug pagtapos sa ilang kasaysayan.
Who We AreWhat We EelieveWhat We Do
2025 by iamachristian.org,Inc All rights reserved.
