Sirac 19 - Cebuano Meaning-Based Bible

1Kon himoon mo kini, dili gayod ikaw madato; kon dili ka magmatngon sa gagmay nga mga butang, sa hinayhinay maut-ot ka.

2Ang bino ug ang babaye maghimo sa tawong but-an nga magbuhat ug mga binuang. Ang usa ka tawo nga moadto sa babayeng puta sa hinayhinay mawad-an nag kaulaw

3ug kini bayran niya sa iyang kinabuhi. Ang mga wati mokaon sa iyang dunot nga lawas.

4Binuang ang pagsalig dayon sa mga tawo. Kon magpakasala ka, nagdagmal ka sa imong kaugalingon.

5Kon ang pagkadaotan maghimo kanimong malipayon, ikaw silotan.

Ang Walay Hinungdan nga mga Tabi

6Likayi ang walay hinungdan nga mga tabi ug malikayan nimo ang daghang mga kagubot.

7Ayaw gayod pagpanabi sa imong hidunggan ug dili ikaw magbasol.

8Ayaw kini isugilon ngadto sa imong mga higala o sa imong mga kaaway gawas kon ang pagtipig niini makahimo kanimong makasasala.

9Bisan kinsa nga makabati kanimo magtimaan niini ug sa madugay o madali dumtan ikaw tungod niini.

10Nakadungog ba ikaw ug usa ka hunghongihong? Ayaw kini ipanabi. Pagmaisog! Dili ka mobuto tungod niini.

11Ang usa ka tawo nga buang nga mosulay sa pag-amping ug usa ka tinagoan mag-antos sama sa usa ka babaye nga nagbati.

12Sa panahon nga makadungog siya ug usa ka sikreto, mahisama kini sa usa ka udyong nga motaroy sa iyang bitiis.

13Kon makadungog ka nga ang usa ka higala nakahimo ug daotan, pangutan-a siya mahitungod niini. Tingali dili kini tinuod. Apan kon tinuod man kini, pangutan-a gihapon siya aron dili na kini niya buhaton pag-usab.

14Kon makadungog ka nga ang usa ka silingan nagsulti ug usa ka butang nga dili unta niya angay nga isulti, pangutan-a siya mahitungod niini. Tingali wala siya magsulti niini. Apan kon nagsulti man gayod siya niini, pangutan-a gihapon aron dili na siya magsulti niini pag-usab.

15Kon makadungog ka ug usa ka butang nga daotan mahitungod sa usa ka higala, pangutan-a siya mahitungod niini, tingali usa kini ka bakak. Ayaw pagtuo sa tanan nga imong nadunggan.

16Ang usa ka tawo mahimong magsulti ug usa ka butang nga wala sa iyang buot. Ang tanan nakasala gayod niining paagiha.

17Kon makadungog ikawg usa ka butang nga makapasuko kanimo batok sa imong silingan, pangutan-a siya mahitungod niini sa dili pa ikaw manghulga kaniya. Itugyan kanang butanga ngadto sa Balaod sa Labing Halangdon.Ang Pag-ila sa Matuod nga Kaalam

20Kahadloki ang Ginoo ug tumana ang iyang Balaod; mao kini ang kahulogan sa Kaalam.

22Tingali nahibalo ka sa tanan nga angay hibaloan mahitungod sa kadaotan apan wala kana maghimo kanimo nga makinaadmanon. Dili maayo ang pagsunod sa tambag sa mga makasasala.

23Mahimo tingali ang paggamit sa kaabtik alang sa mga tuyo nga daotan apan may pipila ka tawo nga daw buangbuang tungod kay kulang lamang sila sa kahibalo.

24Ang usa ka tawo nga mahadlokon sa Dios, bisan kon dili kaayo siya maalam mas maayo kay sa labing maabtik nga makasasala.

25May mga tawo nga abtik ug kutikutihan kaayo apan limbongan diay ug may mga tawo usab nga makakab-ot sa ilang gusto pinaagi sa minaut nga pagtahod.

26Unya adunay mga tawong daotan nga magpakita nga masulob-on kunohay apan nagtinguha diay sa paglingla kanimo.

27Molingiw sila ug magpakaaron-ingnon nga wala makadungog kanimo apan mamintaha sila kanimo sa higayon nga wala gayod nimo damha.

28Kon dili sila makahimo pagpakasala karon, himoon gayod kini nila kon makahigayon na sila.

29Mailhan nimo ang usa ka tawo pinaagi sa iyang panagway. Sa unang higayon sa imong pagtan-aw kaniya, makahibalo ikaw kon siya but-an ba.

30Ang iyang batasan makita diha sa paagi sa iyang pagpamisti, sa iyang pagkatawa ug sa iyang paglakaw.