2 Macabeo 12 - Cebuano Meaning-Based Bible

Ang mga Judio sa Jopa Gipamatay

1Sa nahingpit na ang sabotsabot sa kalinaw tali sa mga Judio ug sa mga taga-Siria, mipauli si Lisias ngadto sa hari ug ang mga Judio mibalik ngadto sa ilang pagpanguma.

2Apan pipila sa mga gobernador sa lainlaing dapit, si Timoteo ug si Apolonio nga anak ni Geneo ingon man si Geronimo ug si Demopon lakip si Nicanor, ang nagmando sa mga sinuholang sundalo nga gikan sa Cipre, wala motugot nga ang mga Judio magpuyo nga malinawon.

3Ang mga tawo sa Jopa naghimo ug usa ka mangilngig nga buhat ngadto sa mga Judio nga nagpuyo sa ilang siyudad. Nagpakaaron-ingnon sila nga mahigalaon ngadto sa mga Judio ug gidapit nila ang mga Judio uban sa ilang mga banay sa pagpanakay kuyog kanila sa mga sakayan nga ilang giandam.

4Giuyonan kini sa mga tawo sa lungsod busa ang mga Judio wala magbatog katahap ug gidawat ang pagdapit aron makigdait kanila. Apan sa didto na sila sa dagat, gilumsan sa mga tawo sa Jopa ang mga Judio nga dili mokubos sa 200.

5Sa pagkadungog ni Judas mahitungod sa gibuhat sa mga walay kaluoy nga taga-Jopa ngadto sa iyang kaubang mga Judio, gitigom niya ang iyang mga tawo.

6Human sila mag-ampo sa Dios, ang matarong nga maghuhukom, giataki nila ang mga mipatay sa ilang isigka-Judio. Ilalom sa pandong sa kagabhion gisunog nila ang pantalan ug ang tanan nga sakayan ug gipamatay ang tanan nga ilang hikaplagan nga nagtago didto.

7Ug kay ang mga ganghaan sa siyudad gitrangkahan man misibog si Judas apan hugot ang iyang tinguha sa pagbalik sa laing panahon aron pagpatay sa tanan nga nagpuyo didto.

8Si Judas nakadungog nga ang mga tawo sa Jamnia adunay mga laraw sa pagpatay sa mga Judio didto sa ilang siyudad.

9Busa sa pagkagabii giataki niya ang Jamnia ug gisunog ang ilang dunggoanan ug mga sakayan ug ang kalayo makita sa halayo hangtod sa Jerusalem nga may 44 ka kilometro ang gilay-on.

Mga Kadaogan ni Judas sa Kayutaan sa Gilead(1 Mac. 5:9-54)

10Si Judas ug ang iyang mga tawo mibiya gikan sa Jamnia aron pagsugat kang Timoteo alang sa usa ka gubat. Apan sa dihang kapin pa lamang sa usa ug tunga ka kilometro ang ilang gilay-on gikan sa Jamnia, giataki sila sa kapin sa 5,000 ka Arabo nga gipaluyohan sa 500 ka sundalong nagkabayo.

11Unya usa ka dakong panagsangka ang nahitabo apan pinaagi sa panabang sa Dios gibuntog nila kining mga tawo sa diserto nga unya naghangyo nga makighigala sa mga Judio. Nagsaad sila nga hatagan nila ang mga Judio ug mga kahayopan ug nagtanyag sa pagtabang usab kanila sa lain nga mga paagi.

12Naghunahuna si Judas nga ang pagpakighigala kanila mahimo tingali nga mapuslanon sa daghan nga mga paagi busa miuyon siya sa pagpakigdait kanila. Human niana ang mga Arabo mipauli ngadto sa ilang mga tolda.

13Giataki usab ni Judas ang maayong pagkapanalipod nga siyudad sa Caspin. Ang mga tawo nga nagpuyo didto dili mga Judio nga naggikan sa nagkalainlaing dapit.

14Nagsalig sila sa ilang lig-on nga kota ug sa igong pagkaon nga ilang natigom. Busa gibugalbugalan nila si Judas ug ang iyang mga tawo; gisinggitan nila ug mga insulto ang mga Judio ug mga panamastamas batok sa Dios.

15Apan ang mga Judio nag-ampo sa Ginoo nga Labing Gamhanan sa tibuok kalibotan nga mitumpag sa mga paril sa Jerico sa mga adlaw ni Josue sa walay paggamit ug mga igdudumbol ug mga hinagiban sa pagsulong. Unya gihimo nila ang usa ka mapintas nga ataki batok sa kota

16ug tungod kay maoy kabubut-on sa Dios, nakuha nila ang siyudad. Gipatay sa mga Judio ang hilabihan kadaghan nga mga tawo nga ang lanaw nga didto sa duol nga may mga 365 ka metros ang gilapdon, nahimong daw lanaw sa dugo.

Gibuntog ni Judas ang Kasundalohan ni Timoteo(1 Mac. 5:37-44)

17Si Judas ug ang iyang mga tawo mibiya sa siyudad sa Caspin ug mipanaw ug mga 137 ka kilometro ug miabot sa Carax, ang lungsod sa mga Judio nga duol sa siyudad sa Tob.

18Apan wala nila maabti si Timoteo didto tungod kay nakabiya na man siya gikan niadtong yutaa. Walay nahimo si Timoteo didto gawas sa pagbilin ug usa ka malig-on nga pundok sa kasundalohan.

19Duha sa mga heneral ni Judas, si Doseteo ug si Susipater, miataki sa pundok sa mga sundalo ug gipatay nila ang tanang 10,000 ka tawo nga gibutang didto.

20Unya gibahin ni Judas ang iyang kasundalohan ngadto sa pipila ka mga pundok ug gibutangan ug mga pangulo ang matag pundok ug midali siya paggukod kang Timoteo nga adunay 120,000 ka sundalong naglakaw ug 2,500 ka sundalong nagkabayo.

21Sa pagkahibalo ni Timoteo nga si Judas nagsunod kaniya, gipauna niya ang mga babaye ug ang mga kabataan uban sa ilang mga kabtangan ngadto sa siyudad sa Carnaim kay ang maong dapit lisod kaayong sulongon ug sigpit ang mga agianan nga padulong ngadto.

22Apan sa diha nga nakita na ang unang pundok ni Judas, ang mga kaaway nagkaguliyang tungod sa usa ka talan-awon nga gipadala sa Dios nga nagtan-aw sa tanan. Sa kalisang nagkabuang sila pagpanagan ug daghan kanila ang nangasamad sa mga espada sa ilang kaugalingong mga tawo.

23Busa si Judas ug ang iyang mga tawo migukod kanila kutob sa ilang mahimo ug gipatay nila ang labing minos 30,000 ka kaaway.

24Si Timoteo mismo nadakpan sa mga tropa ni Doseteo ug ni Susipater. Apan abtik siya kaayo ug nakahimo sa pagdani kanila nga buhian siya kay daghan sa ilang mga kaparyentihan iyang mga priso ug pamatyon gayod sila kon adunay mahitabo kaniya.

25Sa kataposan gibuhian nila si Timoteo human kini mosaad nga walay daotan nga mahitabo ngadto sa ilang kaparyentihan ug nga buhian niya sila.

Lain Pang mga Kadaogan ni Judas(1 Mac. 5:45-54)

26Gisunod ni Judas pag-ataki ang siyudad sa Carnaim ug ang templo sa diosdios nga si Atargates ug gipatay niya ang 25,000 ka tawo.

27Human niya gub-a sa hingpit ang siyudad ug ang templo, giataki niya ang kinutaan nga siyudad sa Epron diin nagpuyo si Lisias ug ang mga tawo gikan sa tanang kanasoran. Ang mga lig-on nga mga batan-ong lalaki nagpahimutang sa atubangan sa mga paril ug nakig-away nga maisogon samtang sulod sa siyudad gitigom ang daghang mga kinahanglanon ug mga hinagiban sa gubat.

28Apan ang mga Judio nag-ampo aron tabangan sila sa Ginoo nga nagdugmok sa gahom sa iyang mga kaaway. Busa nakuha nila ang siyudad ug gipatay ang mga 25,000 ka tawo.

29Gikan didto midali sila pag-adto sa Betsan, usa ka siyudad nga may 109 ka kilometro ang gilay-on gikan sa Jerusalem.

30Ang mga Judio didto nagtug-an kang Judas sa kaayo sa mga tawo sa siyudad sa ilang pagdawat kanila, ilabina gayod sa malisod nga panahon.

31Busa si Judas ug ang iyang mga tawo nagpasalamat sa mga tawo didto ug nag-awhag kanila pagpakita sa samang maayong kabubut-on alang sa mga Judio karon ug sa umaabot. Unya nanggikan sila padulong sa Jerusalem ug miabot sila sa wala pa ang Kasaulogan sa Pangani.

Gibuntog ni Judas si Gorgias

32Human nakagunit sa kapa ni Gorgias. Busa ginamit ang tanan niyang kusog giguyod niya si Gorgias sa tinguha nga madakop nga buhi kining tawo nga walay puangod. Apan sa kalit usa sa mga tigkabayo nga taga-Trasia ang mihasmag kang Doseteo ug mitigbas sa iyang bukton ug naputol kini busa nakalingkawas si Gorgias ngadto sa siyudad sa Marisa.

36Karon ang mga lalaking Judio ubos sa pagmando ni Esdrias nakig-away sa dugayng panahon ug nangaluya na. Busa nag-ampo si Judas nga ang Ginoo magpakita nga siya dapig kanila ug nga maoy magmando kanila.

37Unya samtang nag-awit si Judas ug usa ka alawiton sa iyang kaugalingong sinultihan agi ug usa ka singgit sa gubat, ang mga Judio mihimo ug usa ka kalit nga pagsulong batok kang Gorgias ug sa iyang mga tawo ug nanagan sila.

Mga Pag-ampo alang sa mga Tawo nga Nangamatay sa Gubat

38Human sa gubat gitigom ni Judas ang iyang mga tawo ug nangadto sila sa lungsod sa Adulam. Adlaw kadto sa dili pa ang Adlaw nga Igpapahulay busa naghinlo sila sa ilang kaugalingon sumala sa mga batasan sa mga Judio ug unya nagsaulog sa balaan nga adlaw.

39Pagkasunod adlaw gidali gayod nila paghipos ang mga lawas sa mga tawo nga napatay sa gubat aron ilubong didto sa mga lubnganan sa ilang banay.

40ApanDeut. 7:25. sa ilalom sa sapot sa matag patay nga lawas nakita nila ang gagmay nga larawan sa mga diosdios nga gisimba didto sa Jamnia nga gidili sa balaod sa mga Judio. Busa nasayod ang tanan ngano nga kining mga tawhana namatay.

41Busa gidayeg nila ang mga paagi sa Ginoo, ang matarong nga maghuhukom nga nagpadayag sa tinagoan,

42ug nangamuyo sila kaniya nga papason unta sa hingpit kining salaa. Unya ang bantogang si Judas, nag-awhag sa katawhan sa paglikay sa sala kay sila mismo nakakita man unsa ang nahitabo niadtong mga tawhana nga nagpakasala.

43Nagpaamot usab siya gikan sa tanan niyang mga tawo ug mikabat kinig 2,000 ka salapi nga plata ug gipadala kini ngadto sa Jerusalem aron gamiton alang sa usa ka halad alang sa sala. Si Judas naghimo niining hamili nga butang tungod kay nagtuo siya sa pagkabanhaw.

44Kon wala pa siya magtuo nga ang patay mabanhaw, usa unta ka butang nga binuang ug walay kapuslanan ang pag-ampo alang sa mga nangamatay.

45Tungod niining malig-on ug diosnon nga hunahuna nga ang tanang mga tawo nga nagtuo sa Dios makadawat ug usa ka ganti nga kahibulongan, si Judas nag-andam alang sa usa ka halad aron malingkawas ang nangamatay sa ilang mga sala.