Judit 12 - Cebuano Meaning-Based Bible

Nagpabilin si Judit nga Matinumanon sa Iyang Tinuohan

1Gisugo ni Holofernes ang iyang mga tawo nga dad-on si Judit ngadto sa lamisa nga gibutangan sa iyang mga plata nga galamiton sa pagkaon ug nga silbihan siya sa pipila sa iyang kaugalingong linain nga pagkaon ug bino.

2ApanDan. 1:8; Est. Gr. C:28. mibalibad si Judit sa pag-ingon, “Dili ako makakaon sa imong pagkaon kay makalapas unya ako sa mga balaod sa akong Dios. Mokaon lamang ako sa akong gidala nga pagkaon.”

3Nangutana si Holofernes, “Apan unsa may imong buhaton kon mahurot na ang imong pagkaon o ilimnon? Asa man kami mangitag dugang pagkaon alang kanimo? Walay mga Israelita dinhi sa among kampo.”

4Mitubag si Judit, “Sir, sama nga ikaw buhi, ipaniguro ko nga aduna akoy igong pagkaon nga molungtad hangtod nga gamiton na ako sa Ginoo aron pagtuman sa iyang laraw.”

5Unya gidala si Judit sa kaugalingong mga sulugoon ni Holofernes ngadto sa usa ka tolda. Natulog siya didto hangtod hapit na ang banagbanag. Unya mibangon siya

6ug nagpadala ug usa ka mensahe ngadto kang Holofernes nga naghangyo nga tugotan siya paggula ngadto sa walog aron mag-ampo.

7Misugo si Holofernes sa iyang mga guwardiya nga tugotan si Judit paggula sa kampo. Busa sulod sa tulo ka adlaw nagpuyo si Judit didto sa kampo ug matag gabii mogula siya ngadto sa walog duol sa Betulia ug maligo sa tubod.

8Human siya makaligo, mag-ampo siya sa Ginoong Dios aron giyahan siya sa iyang laraw sa pagdalag kadaogan ngadto sa Israel.

9Unya mobalik siya ngadto sa kampo nga hinlo na sumala sa ilang seremonyas ug magpabilin sa iyang tolda hangtod inigkahuman sa panihapon.

Ang Kombira ni Holofernes

10Sa ikaupat nga adlaw sa pagpabilin ni Judit didto sa kampo, si Holofernes mihatag ug usa ka kombira alang sa iyang labing dagko nga mga opisyal apan wala niya dapita ang bisan kinsa sa mga opisyal nga anaa sa ilang puwesto niadtong adlawa.

11Miingon siya kang Bagoas, ang yunuko nga maoy tigdumala sa iyang mga personal nga kalihokan, “Lakaw ug daniha ang babaye nga Hebreo nga anaa ubos sa imong pagbantay aron moari siya sa akong tolda ug mokaon ug moinom uban kanato.

12Makauulaw man usab nga palabyon ang usa ka higayon sa pag-angkon sa usa ka babaye nga sama kaniya. Kon dili ko siya makuha, iya akong kataw-an.”

13Busa mibiya si Bagoas kang Holofernes ug miadto kang Judit. Miingon siya, “Maanyag nga babaye, ang heneral nagadapit kanimo ngadto sa iyang tolda aron mag-inom-inom uban kaniya didto. Dali ug paglingawlingaw sama sa mga babaye nga taga-Asiria nga nag-alagad sa palasyo ni Nabucodonosor. Usa kini ka dakong dungog.”

14Mitubag si Judit, “Malipay ako sa pagdawat. Unsaon nako pagbalibad? Hinumdoman ko kining malipayon nga gabii sa tibuok kong kinabuhi.”

15Busa mitindog si Judit ug misul-ob sa labing matahom niyang mga sapot. Ang iyang ulipon nga babaye nag-una kaniya ug gibutang sa yuta atubangan ni Holofernes ang mga panit sa karnero nga gihatag ni Bagoas kang Judit aron lingkoran samtang magkaon siya.

16Miadto si Judit sa tolda ug milingkod didto. Nadani pag-ayo si Holofernes sa pagkakita niya kang Judit ug dili kapugngan ang iyang tinguha sa pag-angkon kaniya. Sukad sa unang adlaw sa pagkakita niya kang Judit, nagpaabot siya ug usa ka higayon aron makuha niya siya.

17Miingon siya kang Judit, “Uban kanamo sa pag-inom-inom ug paglingawlingaw sa imong kaugalingon.”

18Mitubag si Judit, “Malipay ako, sir, sa paghimo niana. Mao kini ang labing malipayong adlaw sa akong kinabuhi.”

19Apan bisan pa niana si Judit mikaon ug miinom lamang sa inandam nga pagkaon sa iyang ulipon.

20Si Holofernes nabihag sa hilabihan nga katahom ni Judit nga tungod niini kadto pa gayod siya nakainom ug daghan kaayong bino sa tibuok niyang kinabuhi.