Ester (Grego) 9 - Cebuano Meaning-Based Bible

Gilaglag sa mga Judio ang Ilang mga Kaaway

1Sa1 Mac. 7:49; 2 Mac. 15:36. ika-13 nga adlaw sa Adar, ang adlaw sa pagpatuman sa proklamasyon sa hari,

2ang mga kaaway sa mga Judio maoy nangalaglag. Ang mga tawo sa tanang dapit nangahadlok sa mga Judio ug walay mibarog batok kanila.

3Sa pagkatinuod, ang mga gobernador sa probinsiya, ang mga administrador ug ang mga sekretaryo sa hari nagpakitag pagtahod ngadto sa mga Judio tungod kay nangahadlok silang tanan kang Mardoqueo.

4-5Ang sugo sa hari naghimo kaniya nga inila sa tibuok emperyo.

6Didto sa Susa, ang ulohang siyudad, gipatay sa mga Judio ang 500 ka tawo

7-10ug gisakmit ang ilang mga kabtangan. Lakip kanila mao ang napulo ka mga anak ni Haman nga anak ni Hamedata nga usa ka taga-Bougia ug kaaway sa mga Judio: si Parsanestain, si Delpon, si Pasga, si Paradata, si Barea, si Sarbaca, si Marmasima, si Aroupeaus, si Arseus ug si Sabouteaus.

11Niadtong adlawa ang gidaghanon sa mga tawo nga napatay didto sa Susa gitaho ngadto sa hari.

12Unya miingon siya ngadto kang Ester, “Ang mga Judio nakapatay ug 500 ka tawo sa Susa pa lang gani. Unsa na kaha ang ilang nahimo didto sa gawas sa mga probinsiya! Tug-ani ako unsa pay lain nga gusto mo ug maimo kini.”

13Si Ester mitubag, “Tugoti nga ang mga Judio sa Susa maghimo usab ugma sa imong gitugot nga ilang gihimo karon. Ug ipabitay ang mga lawas sa napulo ka anak ni Haman.”

14Miuyon ang hari ug gitugotan ang mga Judio sa pagpasundayag sa publiko sa mga lawas sa napulo ka anak ni Haman.

15Sa ika-14 nga adlaw sa Adar ang mga Judio sa Susa nagtapok pag-usab ug gipatay nila ang dugang nga 300 ka tawo didto sa siyudad. Apan wala sila manakmit ug mga butang.

16Ang mga Judio usab didto sa mga probinsiya naghiusa ug nanalipod sa ilang kaugalingon. Gipatay nila ang 15,000 ka tawo sa ika-13 nga adlaw sa Adar apan wala sila manakmit ug mga butang.

17Sa ika-14 nga adlaw wala nay pagpamatay ug ang mga Judio naghimo niini nga usa ka masadya nga kasaulogan sa pagpahulay ug pagkombira.

18Apan ang mga Judio sa Susa naghimo sa ika-15 nga adlaw ingon nga usa ka kasaulogan kay ila mang gipamatay ang ilang mga kaaway sa ika-13 ug sa ika-14 nga adlaw ug wala sila mohunong hangtod sa ika-15 nga adlaw.

19Mao kini ang hinungdan ngano nga ang mga Judio nga nagpuyo sa gagmayng mga lungsod nagsaulog sa ika-14 nga adlaw sa bulan sa Adar ingon usa ka panahon sa pagpanghatag ug mga gasa nga pagkaon ngadto sa usag-usa samtang ang mga Judio sa dagkong mga siyudad naghimog kasaulogan sa samang paagi sa ika-15 nga adlaw.

Ang Kasaulogan sa Purim

20Si Mardoqueo misulat niining mga hitaboa diha sa usa ka basahon ug gipadala kini ngadto sa tanang mga Judio, duol man o layo, sa tibuok Emperyo sa Persia

21aron sa pagsaulog sa ika-14 ug ika-15 nga adlaw sa Adar.

22Mao kining mga adlawa nga gipukan sa mga Judio ang ilang mga kaaway. Ang mga Judio gisugo nga magsaulog sa tibuok bulan kay niining bulana ang panahon sa kaguol ug kawalay paglaom nahimong panahon sa kasadya ug kalipay. Gisugo sila nga saulogon kining mga adlawa uban sa mga kombira ug mga hikay ug sa pagpanghatag ug mga makaon ngadto sa mga higala ug ngadto sa mga kabos.

23Busa ang mga Judio midawat sa tanan nga gisulat ni Mardoqueo.

24SiEst. 3:7. Haman nga anak ni Hamedata nga usa ka taga-Macedonia, nakig-away batok sa mga Judio. Nagpakanaog siya ug usa ka sugo aron paglaglag sa tanang mga Judio ug nagripa aron pagtakda sa adlaw nga iya silang laglagon.

25Miadto siya sa hari aron paghangyo nga bitayon si Mardoqueo. Apan si Haman hinuon maoy nahiagom sa silot nga iyang gilaraw alang sa mga Judio. Siya ug ang iyang mga anak mao hinuon ang gibitay.

26-28Tungod sa sulat ni Mardoqueo, tungod sa tanan nga ilang giantos ug tungod sa tanan nga nahitabo kanila, ang mga Judio midawat sa sugyot ni Mardoqueo ug gihimo kini nga usa ka lagda alang sa ilang kaugalingon, sa ilang mga anak ug sa tanan nga mahimong Judio aron kining mga adlawa saulogon sa hustong paagi agig usa ka handomanan gikan sa usa ka kaliwat ngadto sa laing kaliwatan, sa tanang mga siyudad, probinsiya, ug nasod. Ang mga Judio kinahanglang mahinumdom ug magsaulog niining mga adlawa sa Purim sa tanang panahon nga umaabot ug dili gayod magpasagad niini. (Kining mga kasaulogan ginganlag Purim tungod kay ang pulong nga “Purim” sa ilang sinultihan nagkahulogan ug “ripa”.)

29-30Uban ni Mardoqueo nga Judio, si Rayna Ester nga anak ni Aminadab, nagduso niining mga butanga mahitungod sa Purim uban sa tibuok niyang awtoridad ngadto sa 127 ka mga probinsiya sa gingharian ni Hari Ahasuero.

31Silang duha maoy responsable sa pagtukod sa kasaulogan ug nakahukom sila sa pagsaulog niini bisan unsa pay mahitabo.

32Giduso ni Ester nga ang kasaulogan himoon sa tanang panahon ug usa ka sinulat nga taho ang gihimo mahitungod sa iyang opisyal nga sugo.