Judit 13 - Cebuano Meaning-Based Bible

1Sa kataposan, sa lalom na ang gabii, ang mga dinapit mihangyo sa pagpamauli ug mibiya. Unya gisirhan ni Bagoas ang tolda gikan sa gawas ug gidid-an ang mga sulugoon ni Holofernes pagsulod. Busa silang tanan nanghigda kay ang tagsatagsa lapoy man kaayo tungod kay ang kombira dugay man kaayong nahuman.

2Si Judit nahabilin nga siya rang usa didto sa tolda uban kang Holofernes nga naghigda nga hubog didto sa iyang higdaanan.

3Ang ulipon nga babaye ni Judit nga didto sa gawas sa tolda naghulat kanus-a mogula si Judit aron pag-ampo sumala sa iyang gibuhat matag gabii. Si Judit nagsulti usab kang Bagoas nga mogula ra siya aron pag-ampo sumala sa naandan.

4Ang tanang mga bisita ug mga sulugoon nanggula na ug si Judit ug si Holofernes mao na lamang ang didto sa tolda. Si Judit mibarog duol sa higdaanan ni Holofernes ug nag-ampo sa hilom, “O Ginoo, Dios nga Makagagahom sa tanan, tabangi ako sa akong pagabuhaton alang sa himaya sa Jerusalem.

5Karon mao ang panahon sa pagluwas sa imong pinili nga katawhan ug pagtabang kanako sa pagtuman sa akong laraw sa paglaglag sa mga kaaway nga naghulga kanamo.”

6Si Judit miadto sa haligi sa kama duol sa ulo ni Holofernes ug giibot niya ang espada ni Holofernes.

7Miduol siya ug gigunitan niya ang buhok ni Holofernes ug miingon siya, “O Ginoo, Dios sa Israel, hatagi ako karon ug kusog.”

8Unya gibakyaw ni Judit ang espada ug ginamit ang tanan niyang kusog, gitigbas niya ang liog ni Holofernes hangtod nga napunggot ang ulo niini.

9Gipaligid niya ang lawas ni Holofernes gawas sa higdaanan ug gikuha ang moskitero gikan sa mga haligi sa higdaanan. Unya migula siya ug gihatag ang ulo ni Holofernes ngadto sa iyang ulipon

10ug gisulod kini sa sudlanan sa pagkaon.

Si Judit ug ang Iyang Ulipon Namalik sa Betulia

Unya nagkuyog ang duha ka babaye sa pagpanggula sumala sa kanunay nilang gibuhat aron mag-ampo. Human sila makalakaw latas sa kampo sa mga taga-Asiria, mitadlas sila sa walog ug mitungas sa kilid sa bukid hangtod miabot sila sa mga ganghaan sa Betulia.

11Sa nagkaduol na sila, gisinggitan ni Judit ang mga guwardiya sa ganghaan sa pag-ingon, “Ablihi ang ganghaan! Ablihi ang ganghaan! Ang atong Dios nag-uban pa gihapon kanato. Karong adlawa iyang gipakita pag-usab ang iyang kusog nganhi sa Israel ug gigamit niya ang iyang gahom batok sa atong mga kaaway.”

12Sa pagkadungog sa mga lalaki sa iyang tingog, midali sila pagkanaog ngadto sa mga ganghaan ug gitawag ang mga kadagkoan sa lungsod.

13Ang tanan, mga batan-on ug mga tigulang, nagdungan pagpanagan ngadto sa ganghaan. Walay nakatuo nga nahibalik si Judit. Giablihan nila ang ganghaan alang kaniya ug sa iyang ulipon ug giabiabi sila. Unya sa diha nga nakahaling na sila ug kalayo aron adunay kahayag ug makaalirong sila sa duha ka babaye,

14si Judit misinggit, “Dayga ninyo ang Dios, hatagi siyag pagdayeg! Dayga ang Dios nga wala maghikaw sa iyang kaluoy alang sa katawhan sa Israel. Karong gabhiona gigamit niya ako aron paglaglag sa atong mga kaaway.”

15Unya iyang gikuha ang ulo gikan sa puntil nga sudlanan sa pagkaon ug gipakita kini ngadto sa katawhan. Miingon siya, “Ania ang ulo ni Holofernes, ang heneral sa kasundalohan sa mga taga-Asiria ug ania ang moskitero gikan sa iyang higdaanan, diin naghigda siya nga hubog kaayo. Ang Ginoo migamit sa usa ka babaye aron pagpatay kaniya.

16Ingon nga buhi ang Ginoo, nanumpa ako nga si Holofernes wala gayod makahilabot kanako bisan nalingla siya sa akong kaanyag ug nadala siya ngadto sa iyang kalaglagan. Wala ako mabulingi o mabuong kay ang Ginoo nagbantay kanako latas niining tanan.”

17Ang tanan sa siyudad nahibulong pag-ayo. Nanghapa sila ug gisimba nila ang Dios ug nagdungan sa pag-ampo nga nag-ingon, “O Dios namo, ikaw takos sa dako nga pagdayeg. Karong adlawa nagmadaugon ikaw batok sa mga kaaway sa imong katawhan”.

18UnyaMag. 5:24; Luc. 1:28, 42. miingon si Uzias, “Judit, anak ko, ang Dios nga Labing Halangdon nagdayeg kanimo ug nagpanalangin kanimo labaw sa tanang babaye sa yuta. Pagkatakos daygon sa Ginoong Dios nga nagbuhat sa langit ug sa yuta! Gigiyahan ikaw niya sa imong paglunggo sa ulo sa atong labing mapintas nga kaaway.

19Ang imong pagsalig sa Dios dili gayod hikalimtan nila nga nagsimba sa gahom sa Dios.

20Ang Dios maghatag unta kanimo sa walay kinutoban nga dungog tungod sa imong nabuhat. Magganti unta siya kanimo sa mga panalangin tungod kay nagpabilin ikaw nga nagmatinumanon kaniya ug wala magduhaduha sa pagtahan sa imong kinabuhi aron pagpalingkawas sa imong katawhan gikan sa pagdaugdaog.”

Ang tanang mga tawo mitubag sa pag-ingon, “Amen, amen!”