2 Macabeo 10 - Cebuano Meaning-Based Bible

Gihalad Pag-usab ang Templo(1 Mac. 4:36-61)

1Nabawi ni Judas Macabeo ug sa iyang mga sumusunod ang Templo ug ang siyudad sa Jerusalem ubos sa pagpangulo sa Ginoo.

2Gibungkag nila ang mga altar nga gipabarog sa mga langyaw didto sa mga merkado ug giguba nila ang mga natukod nga dapit sa pagsimba.

3Gihinloan nila ang Templo ug nagtukod sila ug usa ka bag-ong altar. Unya ginamit ang bag-ong kalayo nga gisugdan pinaagi sa pagkadlit sa santik, naghalad silag sakripisyo, nagsunog ug insenso, nagdagkot sa mga suga ug nagbutang ug mga sagradong pan. Gihimo nila kini sa unang higayon human sa duha ka tuig.

4Unya nanghapa sila sa yuta ug nag-ampo nga dili na unta sila pahiagomon sa samang katalagman. Nangamuyo sila kaniya nga magmaluluy-on unta siya diha sa iyang pagsilot kanila tungod sa umaabot nga mga sala ug nga dili unta sila itugyan pag-usab ngadto sa mga dili Judio nga lampingasan ug walay kahadlok sa Dios.

5Gihalad nila pag-usab ang Templo sa ika-25 nga adlaw sa bulan sa Kisleb nga mao usab ang adlaw nga ang Templo gipanamastamasan sa mga dili Judio.

6Ang malipayon nga pagsaulog milungtad sa walo ka adlaw sama sa Kasaulogan sa mga Balongbalong. Ang mga tawo nahinumdom nga sa dili pa dugay, naghimo sila sa Kasaulogan sa mga Balongbalong aron sa paghinumdom nga kaniadto naglantaw sila didto sa kabukiran ug nagpuyo sa mga langub sama sa ihalas nga mga mananap.

7Apan karon, dala ang lunhaw nga mga palwa sa palmera ug mga sanga sa kahoy nga daghan ug dahon nag-awit sila ug mga pasalamat ug pagdayeg ngadto kaniya nga naghimo kanilang malampuson sa paghinlo sa iyang kaugalingong Templo.

8Ang tanan nagkauyon nga ang tibuok nasod nga Judio kinahanglang maghimo niining kasaulogan matag tuig.

Naghikog si Tolomeo Macron

9Sa maong paagi natapos ang mga adlaw ni Antioco Epifanes.

10Karon1 Mac. 6:17. iasoy namo ang mga hitabo sa panahon nga naghari si Antioco Eupator nga anak ni Antioco Epifanes, ang wala magtuo sa Dios. Ihatag namo ang mubo nga asoy sa dagkong kadaot nga misangpot tungod sa mga pagpakiggubat ni Antioco Eupator.

11Sa dihang nahimo siyang hari gitudlo niya si Lisias aron maoy magdumala sa mga butang sa kagamhanan ug maoy mahimong labawng gobernador sa Siria Mayor

12ilis kang Tolomeo nga gitawag ug Macron. Si Tolomeo Macron maoy unang gobernador nga nagdumala sa mga Judio sa paagi nga makiangayon ug naghikay ug usa ka kasabotan sa kalinaw tali kanila sa tinguha nga mahulipan ang mga kasaypanan nga ilang nabuhat ngadto sa mga Judio.

13Ang gisangpotan niini mao nga ang mga Higala sa Hari miadto kang Eupator ug gipasanginlan nila si Macron nga nagbudhi tungod kay gibiyaan niya ang pulo sa Cipre nga gibutang ni Hari Pilometor sa Ehipto ubos sa iyang pagmando ug mibali siya ngadto kang Antioco Epifanes. Gani, gitawag nila siya ug mabudhion. Sa diha nga wala na siya makahimo paghupot sa kadungganan nga angay sa iyang katungdanan, naghikog siya pinaagi sa pag-inom ug hilo.

Gibuntog ni Judas Macabeo ang mga Taga-Edomea(1 Mac. 5:1-8)

14Sa dihang si Gorgias nahimong gobernador sa Edomea, naghupot siya ug usa ka pundok sa kasundalohan nga sinuholan ug giataki niya ang mga Judio sa tanang higayon.

15Gawas pa niini, ang maong mga taga-Edomea nga naghupot sa pipila ka mahinungdanon nga mga kota kanunayng nagsamok sa mga Judio. Gidawat nila ang tanan nga nangagiw gikan sa Jerusalem ug gihimo nila ang tanan nga mahimo aron kanunay nga may gubat.

16Busa si Judas Macabeo ug ang iyang mga tawo, human makahalad ug pag-ampo ngadto sa Dios aron sila tabangan, nanggula pagdali ug gisulong nila ang mga kota sa mga taga-Edomea.

17Gipasibog nila kadtong nanalipod sa mga kota ug nakuha nila ang mga kota. Gipatay nila ang tanan nga ilang nasugatan nga mikabat ug mga 20,000 ka tawo.

18Apan ang mga 9,000 sa mga kaaway nakadangop ngadto sa duha ka kota nga sangkap sa pagsukol sa usa ka pagsulong.

19Si Judas kinahanglan nga moadto sa ubang mga dapit sa nasod diin labi siyang gikinahanglan busa gibilin niya si Simon, si Jose, si Saqueo ug ang uban sa iyang mga tawo nga igo nga mosulong sa ilang mga kaaway.

20Apan ang uban sa mga tawo ni Simon mga dalo busa sa diha nga gitanyagan sila ug 70,000 ka salapi nga plata, gitugotan nila nga makaipsot ang pipila sa mga kaaway gikan sa mga kota.

21Sa pagkadungog ni Judas sa nahitabo, gitigom niya ang mga pangulo sa iyang mga tawo ug gisudyaan kadtong mga tawhana nga nagbaligya sa ilang mga igsoon pinaagi sa pagpagawas sa ilang mga kaaway aron makiggubat batok kanila.

22Unya iyang gipatay ang mga mabudhion ug nakuha dayon niya ang duha ka kota.

23Si Judas kanunayng magmalampuson sa gubat ug sa iyang paghasmag batok niadtong duha ka kota napatay niya ang kapin sa 20,000 ka tawo.

Gibuntog ni Judas si Timoteo

24Si Timoteo nga nabuntog kanhi sa mga Judio, nagtigom ug daghang mga sundalong nagkabayo gikan sa Asia lakip ang usa ka makalilisang nga pundok sa kasundalohan nga sinuholan ug nagpadulong na sa Judea aron pagkuha niini pinaagi sa kalit nga pag-ataki.

25Apan samtang ang mga kasundalohan nga kaaway nagsingabot pa, si Judas ug ang iyang mga tawo nag-ampo sa Dios. Nagsul-ob sila ug bisting sako, nagbolibod ug abo sa ilang mga ulo

26ug nanghapa sila sa mga ang-ang sa altar, nangaliyupo sa Dios nga tabangan unta niya sila sa ilang pagpakiggubat batok sa ilang mga kaaway sumala sa iyang gisaad diha sa iyang Balaod.

27Sa pagkahuman na nilag ampo, mikuha sila sa ilang mga hinagiban ug nanggula sila ngadto sa layulayo gikan sa Jerusalem ug nanghunong sila dili layo sa kaaway.

28Sa pagpamanagbanag na ang duha ka kasundalohan nagsangka. Ang mga kasundalohan nga Judio wala magsalig sa ilang kaisog lamang kondili sa Ginoo nga maoy maghatag kanilag kadaogan samtang ang kaaway nagsalig lamang sa ilang kabangis.

29Sa nagkainit na ang sangka, ang mga kaaway nakakita ug lima ka ambongan nga mga lalaki nga gikan sa langit. Nagsakay silag mga kabayo nga may bulawan nga mga renda ug nag-una sa kasundalohan sa mga Judio.

30Kining lima ka lalaki naglibot kang Judas ug nanalipod kaniya pinaagi sa ilang kaugalingon nga salipod sa dughan ug hinagiban. Gipaulanan nila ug mga udyong ug mga kilat ang mga kaaway. Unya ang kasundalohan sa mga kaaway hilabihan kalibog ug nagkaguliyang ug nagkatibulaag sa Busa giwataswatas sila sa mga Judio

31ug 20,500 ka sundalong naglakaw ug 600 ka nagkabayo nga kaaway nga nangamatay.

32Si Timoteo nakaikyas ug midangop ngadto sa kota sa Geser nga maayong pagkapanalipod diin ang iyang igsoon nga si Kerias maoy nagmando.

33Gisulong ni Judas ug sa iyang mga tawo ang kota sulod sa upat ka adlaw uban sa dakong kadasig

34apan ang mga tawo nga didto sa sulod nga nagsalig sa kalig-on sa ilang kota naninggit ug mga pasipala nga hilabihan ka ngil-ad batok sa mga Judio ug sa ilang Dios.

35Sa pagbanagbanag sa ikalima ka adlaw, 20 sa mga tawo ni Judas nga puno sa kapungot tungod niining mga pasipala, maisugong mikatkat sa kota ug sa mapintas nga kasuko gipanigbas nila ang tanan nga ilang nasugatan.

36Dungan niini, ang uban mikatkat sa mga kota sa laing kilid sa siyudad ug gisunog nila ang mga bantayan busa daghan sa mga kaaway ang nangasunog nga buhi. Ang uban kanila miguba sa mga pultahan ug gipasulod nila ang ilang mga kauban ug nailog nila ang siyudad.

37Si Timoteo nga mitago sa usa ka gahong ilang gipatay ingon man ang iyang igsoon nga si Kerias ug si Apolopanes.

38Sa pagkahuman na niini, ang mga Judio nagsaulog pinaagi sa pag-awit ug mga pagdayeg ug mga pasalamat ngadto sa Ginoo nga nagpakita kanila ug dakong kaluoy ug naghatag kanila sa kadaogan.