Judit 7 - Cebuano Meaning-Based Bible

Gilibotan ang Betulia

1-2Sa pagkasunod adlaw, gitigom ni Holofernes ang tibuok niyang kasundalohan ingon man ang mga sundalo sa kaabin niyang mga nasod. Kadto maoy usa ka dako kaayong pundok sa kasundalohan nga nagsakop sa 170,000 ka sundalong naglakaw ug 12,000 ka nagkabayo, wala pay labot sa nagpaluyo nga mga tropa nga tig-atiman sa kahimanan. Gisugo sila ni Holofernes sa pagsulong sa Betulia, pag-ali sa mga agianan sa kabukiran ug sa pag-ataki sa mga Israelita. Busa nanggula sila

3ug nagkampo sa tampi sa tubod didto sa walog duol sa Betulia. Ang kampo hilabihan ka lapad nga mikaylap kini hangtod sa lungsod sa Dotan hangtod sa Balbaim ug ingon kataas nga mikaylap gikan sa Betulia hangtod sa Ciamon nga nagaatubang sa Walog sa Jezreel.

4Sa pagkakita sa mga Israelita sa gidak-on sa kasundalohan, nangalisang sila ug nag-ingnanay, “Kining mga sundaloha motukob sa tanan kutob sa ilang makita. Walay igong katas-on sa kabukiran, sa mga kawalogan ug kabungtoran nga paigo ipakaon sa ingon niana kadako nga kasundalohan.”

5Apan1 Mac. 12:28-29. bisan pa sa ilang kahadlok, ang tanang mga Israelita migamit sa ilang mga hinagiban, nagdagkot ug mga kalayo didto sa mga bantayan ug nagpabilin sa pagbantay tibuok gabii.

6Sa pagkasunod nga adlaw gikatag ni Holofernes ang tibuok niyang kasundalohan nga nagkabayo aron ang mga Israelita sa Betulia makakita kanila.

7Gisusi niya ang agianan ngadto sa lungsod ug ang mga tubod nga gikuhaan nilag tubig. Gialihan niya ang mga tubod ug gibutangan didtog mga guwardiya sa wala pa siya mobalik sa kampo.

8Ang tanang mga pangulo nga taga-Edom ug ang kasundalohan sa Moab uban sa mga pangulo sa mga tropa gikan sa kabaybayonan sa Mediteraneo, miadto kang Holofernes ug miingon,

9“Sir, kon mamati ka sa among tambag, ang imong mga tropa dili mapildihag daghan.

10Kining mga Israelita wala magsalig sa ilang mga hinagiban aron pagpanalipod sa ilang kaugalingon kondili sa gihabugon sa kabukiran diin sila nagpuyo kay ang mga bukid dili man sayon katkaton.

11Busa, Heneral Holofernes, kon dili ka maghimog inatubangay nga pag-ataki kanila, ang tibuok mong kasundalohan dili kapildihan.

12Pabilin sa imong kampo ug ayaw palakta ang imong mga sundalo sa ilang kampo. Sugoa lamang ang imong mga tawo pagsampong sa mga tubod nga anaa sa tiilan sa mga bukid

13kay anha diha magkalos sa ilang tubig ang mga tawo sa Betulia. Unya, kon himalatyon na sila sa kauhaw, itugyan nila ang ilang lungsod kanimo. Samtang mahitabo kini, kami ug ang among mga tawo moadto sa mga tumoy sa naglibot nga mga bukid diin adto kami magkampo ug bantayan namo nga walay bisag usa nga mogula sa lungsod.

14Ang tanan mamatay sa kagutom: ang mga lalaki, ang mga babaye ug ang mga bata. Bisan sa dili pa kita moataki, ang kadalanan mapuno na sa ilang mga patay.

15Niining mga paagiha pabayron nimo sila tungod sa ilang pagsukol ug pagdumili pagtahan sa ilang kaugalingon nganha kanimo nga malinawon.”

16Nahimuot si Holofernes ug ang tanan niyang pangulo sa kasundalohan niining sugyota busa iyang gipakanaog ang sugo sa pagtuman sa laraw.

17Ang mga taga-Moab ug ang 5,000 ka taga-Asiria mibalhin pagkampo ngadto sa walog aron sila nay magbuot sa tinubdan sa tubig sa lungsod.

18Ang taga-Edom ug ang taga-Amon mitungas ngadto sa kabukiran ug nagkampo sila atbang sa lungsod sa Dotan. Nagpadala sila sa pipila sa ilang mga tawo ngadto sa habagatang silangan padulong sa Acraba duol sa Cusi nga tupad sa Suba sa Mocmur. Ang nahabilin sa kasundalohan nga taga-Asiria nagkampo didto sa walog. Ang ilang kampo mikaylap sa tibuok kapatagan tungod kay ang gidaghanon sa ilang mga tolda ug ang gidak-on sa ilang mga kahimanan daghan kaayo alang sa ingon kadako nga kasundalohan.

19Unya ang mga Israelita nagpakitabang sa Ginoo nga ilang Dios. Nawad-an na sila sa kaisog kay sa diha nga gilibotan na sila sa kaaway wala nay paagi nga makalingkawas pa sila.

20Ang tibuok kasundalohan sa Asiria—ang naglakaw, ang nagsakay ug karwahi ug ang nagkabayo—nag-ali sa Betulia sulod sa 34 ka adlaw hangtod nga nahutdag tubig ang lungsod.

21Ang tanang tigomanan ug mga sudlanan sa tubig nangauga busa ang tubig nga ilimnon kinahanglan nga bahinon ug walay adlaw nga adunay igo nga tubig nga ikaapod-apod.

22Ang kabataan nangaluya ug bisan diin sa tibuok lungsod gipanguyapan ang mga babaye ug ang mga batan-on. Wala na gayoy umoy ang tanan.

23Ang tanang mga tawo sa lungsod—ang mga lalaki, ang mga babaye, ingon man ang mga bata—mialirong kang Uzias ug sa mga kadagkoan sa lungsod ug naninggit sila sa pagtutol,

24“Ang Dios magsilot kanimo tungod sa imong gibuhat kanamo! Ikaw ang pasanginlan sa nanghitabo tungod kay wala ikaw makigdait sa mga taga-Asiria.

25Wala na karoy motabang kanato! Ang Dios nagtugyan kanato ilalom sa ilang gahom. Nangaluya kita ug himalatyon na sa kauhaw.

26Karon tawga ang mga taga-Asiria aron moampo kita kanila ug ipakuha ang lungsod ug ipasakmit ni Holofernes ug sa iyang kasundalohan ang mga kabtangan niini.

27Mas maayo pa nga mahimo kitang mga bihag sa gubat ug himoon nila nga mga ulipon basta kay buhi kita ug dili magtan-aw sa atong mga asawa ug mga bata nga mangamatay sa atubangan nato.

28Ang langit ug ang yuta mga saksi batok kanimo ingon man ang atong Dios, ang Ginoo sa atong katigulangan, nga nagsilot kanato tungod sa ilang mga sala ug sa ato usab. Makalaom lamang kita ug makaampo nga dili unta siya motugot nga kining makalilisang nga mga butang modangat kanato karong adlawa.”

29Ang tanan didto nanghilak sa kusog nga tingog ug nag-ampo sa Ginoo nga ilang Dios.

30Unya si Uzias miingon kanila, “Ayaw wad-a ang inyong paglaom, mga igsoon ko! Maghulat kita ug dugang lima ka adlaw aron tan-awon ta kon ang Ginoo nga atong Dios maluoy ba kanato. Sa walay duhaduha dili gayod siya mobiya kanato sa hingpit.

31Apan kon walay moabot nga hinabang human sa lima ka adlaw, buhaton ko ang inyong gisulti.”

32Busa gipapauli ni Uzias ang mga tawo. Ang tanang mga lalaki mibalik sa ilang giguwardiyahan didto sa mga paril ug mga lantawan samtang ang mga babaye ug ang mga bata namauli sa ila. Naluya pag-ayo ang tibuok lungsod.