1Samtang si Onias mao ang Pangulong Pari didto sa Jerusalem, ang balaang siyudad nagpahimulos sa kalinaw ug sa kahamugaway ug ang mga balaod niini gituman sa hingpit tungod kay siya mahadlokon man sa Dios ug madumtanon sa daotan.
2Ang mga hari sa Siria ug Ehipto nagpasidungog sa Templo ug naghalad niini ug mga mahalon nga mga gasa
3ug bisan gani ang hari nga si Seleuco, ang magmamando sa tibuok Asia, naanad man sa pagbayad sa mga galastohon sa mga halad sa Templo gikan sa mga buhis nga iyang napaningil.
4Apan ang usa ka tawo nga ginganlag Simon nga gikan sa banay ni Bilga ug pangulong tigdumala sa Templo, napildi sa panaglalis nila ni Onias mahitungod sa mga lagda sa pagdumala sa merkado sa siyudad.
5Niining panahona si Apolonio nga anak ni Traseo mao ang gobernador sa Siria Mayor. Si Simon miadto kaniya
6ug nagsugilon nga didto sa panudlanan sa Templo adunay daghan kaayong salapi nga dili maihap ug kay ang salapi wala man kinahanglana alang sa mga halad, mahimo kini nga adto lang ibutang sa pagbuot sa hari.
Si Eleudoro Gipadala ngadto sa Jerusalem7Sa nagkakita na si Apolonio ug ang hari, gisuginlan niya ang hari mahitungod sa salapi ug ang hari nagsugo kang Eleudoro nga iyang labawng ministro, sa pagkuha niini alang kaniya.
8Si Eleudoro miadto dayon sa pagtuman sa iyang tahas apan ang iyang pasangil mao nga nagbiyahe lamang siya aron pagsusi sa mga siyudad sa Siria Mayor.
9Human siya mahiabot sa Jerusalem ug sa gidawat na siya nga mainiton sa Pangulong Pari, gipasabot niya ang tinuod nga katarongan sa iyang pagduaw ug nangutana siya kon ang iyang nadungog tinuod ba.
10-11Unya ang Pangulong Pari nag-asoy nga ang daotan nga si Simon wala magsugilon sa tinuod. Tinuod adunay diyutayng salapi didto sa panudlanan sa Templo apan ang usa ka bahin niini gigahin alang sa mga biyuda ug sa mga ilo ug ang laing bahin niini iyaha ni Hircano, anak ni Tobias, usa ka importante kaayong tawo. Gipasabot usab niya nga ang tibuok nga kantidad mikabat lamang ug 13,700 ka kilo nga plata ug 6,850 ka kilo nga bulawan.
12Midugang siya pag-ingon nga dili gayod mahimo nga may tugotan sa pagkuha sa salapi niadtong mga tawo nga misalig sa kabalaan ug sa seguridad niining Templo nga nabantog sa tibuok kalibotan.
Si Eleudoro Naglaraw sa Pagsulod sa Templo13Apan si Eleudoro nagpadayon pag-ingon nga ang salapi kinahanglang kuhaon alang sa panudlanan sa hari sumala sa gisugo sa hari.
14Busa naggahin siya ug usa ka adlaw ug miadto siya sa Templo aron pagtan-aw sa pag-ihap sa salapi. Kini nakapagubot sa tibuok siyudad.
15Ang mga pari, nagsul-ob sa ilang parianon nga mga bisti, ug nanghapa dinuko ang ilang mga nawong ngadto sa yuta atubangan sa altar ug nangamuyo sa Dios aron bantayan nga masiguro ang salapi kay naghatag man siya sa mga kasugoan nga ang tuyo mao ang pagpanalipod sa salapi nga gitigom sa mga tawo didto sa Templo.
16Makahilab sa kasingkasing ang pagtan-aw sa Pangulong Pari. Nangluspad siya timaan sa kasakit sa iyang kalag
17ug ang iyang lawas nagkurog sa kahadlok, nagpakita sa kasakit sa iyang kasingkasing.
18Ang mga tawo nanggula sa ilang mga balay aron pag-apil sa pag-ampo aron ang Templo malikay unta sa panamastamas.
19Ang mga babaye nga nagtapis ug sako nagpunsisok sa kadalanan. Ang mga batan-ong babaye nga wala tugoti sa ilang mga ginikanan nga makit-an sa publiko nanagan ngadto sa mga ganghaan, ang uban nanagan ngadto sa mga paril sa siyudad ug ang uban nanambo lamang gikan sa ilang mga bintana.
20Apan bisan diin sila nangadto, gipataas nila ang ilang mga kamot ngadto sa Dios diha sa pag-ampo.
21Pagkamakaluluoy nga tan-awon sa Pangulong Pari! Gibati niya ang dili tiaw nga kasakit apan wala siyay mahimo. Pagkamakaluluoy usab nga tan-awon sa mga tawo diha sa siyudad nga nanghapa sa yuta.
Ang Ginoo Nanalipod sa Iyang Templo22Samtang ang tanan nangaliyupo sa Ginoo nga Labing Gamhanan sa tanan aron panalipdan niya ang salapi nga gitipigan diha sa Templo,
23si Eleudoro mipadayon usab sa iyang laraw.
24Apan sa pag-abot gayod niya ug sa iyang mga sakop didto sa panudlanan, ang Ginoo sa tanang mga gahom sa kahitas-an mipakita ug usa ka talan-awon. Tungod niini ang tanan nga nangahas sa pagsulod uban kang Eleudoro nangalisang ug nangaluya sa kahadlok tungod niining pagpasundayag sa gahom sa Ginoo.
25Nakita nila ang usa ka kabayo nga gidayandayanan sa mahalon nga renda ug ang nagsakay niini nagsul-ob ug bulawan nga salipod sa dughan ug makalilisang kaayo kini. Dihadiha ang kabayo mihasmag kang Eleudoro unya misinta kini ug mipatid kaniya.
26Si Eleudoro nakakita usab ug duha ka batan-ong lalaki nga kusgan kaayo ug ambongan nga nagsul-ob ug anindot kaayong mga bisti. Nagbarog sila sa isigkakilid niya ug gibunalan siya sa walay kukaluoy.
27Natumba dayon siya sa yuta ug nawad-an ug panimuot ug gibutang siya sa iyang mga sakop sa usa ka lantay
28ug gidala ngadto sa gula. Pipila lamang ka gutlo sa wala pa kini mahitabo, kining tawhana misulod sa panudlanan uban sa usa ka dakong pundok sa kalalakin-an lakip ang tanan niyang mga guwardiya apan karon wala na siyay panimuot nga gidala sa gawas. Busa sa dayag giila nila ang dakong gahom sa Dios.
Si Onias Nag-ampo aron Maulian si Eleudoro29Si Eleudoro naghigda didto nga dili makasulti ug wala nay paglaom nga maulian gikan niining pagpasundayag sa gahom sa Dios.
30Apan ang mga Judio nagdayeg sa Dios nga makagagahom sa tanan tungod kay gipanalipdan niya ang iyang Templo sa paagi nga kahibulongan. Ang Templo nga sa pipila ka gutlo pa lamang napuno sa kahadlok ug kaguliyang, karon napuno na sa dakong kalipay ug kasadya.
31Gihangyo dayon sa pipila ka higala ni Eleudoro si Onias nga Pangulong Pari nga mag-ampo aron luwason sa Labing Halangdon ang kinabuhi niining tawhana nga himalatyon na.
32Busa ang Pangulong Pari naghimog usa ka paghalad uban ang paglaom nga luwason sa Dios si Eleudoro kay dili siya buot nga maghunahuna ang hari nga ang mga Judio maoy nagbuhat niini ngadto sa tawo nga iyang gipadala.
33Samtang gihimo ni Onias ang paghalad, mipakita pag-usab kang Eleudoro ang duha ka batan-ong lalaki nga nagsul-ob ug mao gihapon nga bisti. Miingon sila, “Pasalamati ang Pangulong Pari kay ang Ginoo nagluwas sa imong kinabuhi tungod kaniya.
34Hinumdomi nga ang Ginoo sa langit mao ang nagsilot kanimo. Karon lakaw na ug suginli ang tanan mahitungod sa iyang dakong gahom.” Human sila makasulti niini, wala na sila makita.
Si Eleudoro Nagdayeg sa Dios35Busa si Eleudoro naghimog paghalad ngadto sa Ginoo ug naghimo ug daghang mga panaad tungod kay ang Dios nagluwas man sa iyang kinabuhi. Unya nanamilit siya kang Onias ug mibalik uban sa iyang kasundalohan ngadto sa hari.
36Didto iyang gisuginlan ang tanan mahitungod sa gihimo sa Ginoo nga Labing Gamhanan sa tanan.
37Sa pagpangutana sa hari kang Eleudoro kinsa ang labing maayo nga ikapadala alang sa sunod nga sugo ngadto sa Jerusalem, mitubag si Eleudoro,
38“Kon aduna kay usa ka kaaway o nakaila ka ug usa ka tawo nga naglaraw batok sa imong kagamhanan, ipadala siya. Mobalik siya nga maayong pagkaparot, kana kon ugaling makabalik pa siya kay aduna may kahibulongang gahom nga gikan sa Dios nga maoy nagpahigayon didto.
39Ang Dios sa langit nagbantay sa Templo ug mohampak siya ug maglaglag kang bisan kinsa nga moabot aron pagpasipala niini.”
40Mao kini ang sugilanon giunsa pagpanalipod ang panudlanan sa Templo gikan kang Eleudoro.
Who We AreWhat We EelieveWhat We Do
2025 by iamachristian.org,Inc All rights reserved.
