2 Macabeo 8 - Cebuano Meaning-Based Bible

Si Judas Macabeo Misukol(1 Mac. 3:1-26)

1Si Judas Macabeo ug ang iyang mga kauban tago nga nangadto sa matag lungsod hangtod nga natigom nila ang usa ka pundok nga miabot ug mga 6,000 ka lalaki nga Judio nga nagpabilin nga matinud-anon sa ilang relihiyon.

2Nangamuyo sila sa Ginoo nga tabangan ang iyang katawhan nga karon giyatakan sa tanang nasod, ug kaluy-an ang Templo nga karon gipanamastamasan sa mga dili Judio,

3ug ang Jerusalem nga karon giguba ug hapit na mapatag.

4Nangayo usab sila sa Ginoo nga ipakita ang iyang pagsupak sa daotan pinaagi sa pagpanimalos kanila nga nagpatay sa iyang katawhan, nag-ihaw sa walay kukaluoy sa walay sala nga kabataan ug nagsultig daotan batok sa Ginoo.

5Sa diha nga naandam na ni Judas ang iyang kasundalohan, ang mga dili Judio wala makahimo sa pagsukol kaniya tungod kay ang kasuko sa Ginoo batok sa Israel nahimo na man nga kaluoy.

6-7Si Judas mikalit pagdasdas sa mga lungsod ug kabalangayan ug gipangsunog niya kini. Nailog niya ang mga mahinungdanong dapit ug gipildi niya ang daghang mga tropa sa kaaway ug nakita niya nga malampuson kaayo siya sa panahon sa gabii. Ang mga tawo sa tanang dapit nag-asoy sa iyang kaisog.

Gipadala ni Tolomeo si Nicanor aron Pag-asdang kang Judas(1 Mac. 3:38-41)

8Nakaamgo si Felipe, ang gobernador sa Jerusalem, nga si Judas sa hinayhinay nagkalig-on ug nga nagsunodsunod ang iyang kadaogan. Busa nagsulat siya kang Tolomeo, ang gobernador sa Siria Mayor aron paghangyo nga tabangan siya sa pagpanalipod sa pamunoan sa hari.

9Gitudlo dayon ni Tolomeo si Nicanor nga anak ni Patroclo ug usa sa mga suod nga “Higala sa Hari,” ug gipadala siya uban ang 20,000 ka sundalo ngadto sa nagkalainlain nga kalungsoran aron pagpuo sa tibuok kaliwat sa mga Judio. Gitudlo usab ni Tolomeo si Gorgias nga usa ka heneral nga may dakong kasinatian sa militar aron mouban kang Nicanor.

10Si Hari Antioco utangan sa mga Romano ug 66,000 ka kilo nga plata. Si Nicanor naglaraw pag-impas sa utang pinaagi sa pagpamaligya ug mga ulipon nga mga priso nga Judio.

11Busa nagpahibalo dayon siya ngadto sa mga lungsod nga diha sa kabaybayonan nga namaligya siya ug mga Judio sa kubos sa tagsa ka kilo nga plata. Apan wala siya mahibalo sa silot nga giandam sa Dios nga Labing Gamhanan alang kaniya.

Nasayran ni Judas ang mga Laraw ni Nicanor(1 Mac. 3:42-54)

12Nasayran ni Judas nga si Nicanor ug ang iyang kasundalohan nagpadulong sa Judea busa gipahibalo niya ang iyang mga tawo.

13Ang uban kanila mga talawan ug wala motuo sa katarong sa Dios ug nanagan sila.

14Ang uban namaligya sa tanang nahabilin nilang kabtangan ug nag-ampo aron luwason sila sa Ginoo gikan kang Nicanor nga wala magtuo sa Dios, kay gipamaligya na man sila ni Nicanor ingon nga mga ulipon bisan sa wala pa mahitabo ang gubat.

15Nag-ampo sila nga kon dili man kini himoon sa Dios tungod ug alang kanila, luwason sila sa Dios tungod sa mga kasabotan nga iyang gihimo uban sa ilang mga katigulangan, ug tungod kay siya ang halangdon ug kahibulongan nga Dios nga nagtawag kanila aron mahimo nga iyang katawhan.

16Gitigom ni Judas ang iyang mga tawo nga miabot ug 6,000 ug gidasig niya sila aron dili mahadlok o malisang sa gidaghanon sa mga kaaway nga dili Judio nga nakiggubat kanila sa walay hinungdan. Gidasig niya sila sa pagpakig-away nga maisogon

17ug sa paghinumdom kanunay sa kalapasan nga gihimo sa mga dili Judio batok sa Templo ug sa ilang makalilisang nga pagpaantos sa Jerusalem ug sa pagpahunong sa mga batasan sa mga Judio.

18Si Judas miingon, “Nagsalig sila sa ilang mga hinagiban ug sa ilang pagpangahas apan kita nagasalig sa Dios nga Labing Gamhanan nga sa usa ka pagyango lamang makahimo sa paglaglag dili lamang niining mga kaaway kondili sa tibuok kalibotan usab.”

19Unya mipadayon si Judas pagpahinumdom kanila kon giunsa sa Dios pagtabang ang ilang mga katigulangan: sa panahon ni Senakerib 185,000 sa mga kaaway ang gilaglag

20ug makausa didto sa Babilonia 8,000 ka Judio ang mitabang sa 4,000 ka taga-Macedonia ug gibuntog nila ang 120,000 ka taga-Galacia ug nasakmit nila ang daghang mga butang ug kining tanan tungod sa panabang sa Dios.

Gibuntog ni Judas si Nicanor(1 Mac. 3:55–4:27)

21Ang mga pulong ni Judas nakadasig sa iyang mga sundalo ug naghatag kanila ug kaisog sa pagpakamatay alang sa ilang relihiyon ug sa ilang yutang natawhan. Unya iyang gibahin ang iyang kasundalohan ngadto sa upat ka bahin

22nga may 1,500 ka tawo matag bahin. Siya mismo ug ang iyang mga igsoon nga si Simon, si Jose ug si Jonatan maoy nangulo sa matag usa sa upat ka bahin.

23Gisugo1 Mac. 3:48. niya si Eleazar sa pagbasa sa balaan nga basahon ngadto kanila ug gihatagan niya ang iyang mga tawo sa singgit sa gubat nga nag-ingon, “Ang Dios motabang kanato” ug siya mismo ang nag-una sa pag-ataki batok kang Nicanor.

24Ang Dios nga Labing Gamhanan nakig-away dapig kanila ug napatay nila ang kapin sa 9,000 sa mga kaaway. Nasamaran nila ang daghang mga tawo ug ang tibuok kasundalohan nga kaaway nanagan.

25Gisakmit nila ang salapi gikan sa katawhan nga miabot aron pagpalit kanila ingon nga mga ulipon. Unya gigukod nila ang mga kaaway ngadto sa layo hangtod napugos sila sa pagbalik

26tungod kay hapit na ang panahon alang sa pagsugod sa Adlaw nga Igpapahulay.

27Sa natigom na nila ang mga hinagiban sa kaaway ug nasakmit nila ang mga butang sa mga patay, gisaulog nila ang Adlaw nga Igpapahulay ug nagdayeg sila sa Ginoo ug nagpasalamat kaniya tungod kay iya silang gidala nga walay kabilinggan hangtod niadtong adlawa ug gihatagan sila sa unang timaan sa iyang kaluoy.

28Sa pagkatapos na sa Adlawng Igpapahulay, gihatag nila ang uban nga sinakmit ngadto sa mga biktima sa panglutos ug ngadto sa mga biyuda ug mga ilo, unya gibahin nila ang nahabilin alang sa ilang kaugalingon nga mga banay.

29Human niana nagtigom sila diha sa pag-ampo ngadto sa maluluy-on nga Ginoo, nangayo kaniya nga tan-awon unta niya ang iyang mga alagad uban sa kaluoy.

Gibuntog ni Judas si Timoteo ug si Baquides

30Unya ang mga Judio nakiggubat batok sa mga kasundalohan ni Timoteo ug ni Baquides ug napatay nila ang kapin sa 20,000 kanila. Nailog nila ang pipila ka habog kaayo nga mga kota ug nakuha nila ang daghan nga mga sinakmit nga ilang giangay pagbahin alang sa ilang kaugalingon, sa mga biyuda, mga ilo, mga tigulang ug sa mga biktima sa panglutos.

31Gitigom nila pag-ayo ang tanan nga mga hinagiban sa kaaway ug gibutang kini sa mga dapit nga sayon tultolon apan ang nahabilin sa sinakmit gidala ngadto sa Jerusalem.

32Gipatay nila ang opisyal nga nagmando sa kasundalohan ni Timoteo, usa ka tawo nga wala magtuo sa Dios ug maoy hinungdan sa daghang pag-antos sa mga Judio.

33Samtang nagsaulog sila sa ilang kadaogan didto sa siyudad sa ilang mga katigulangan, gidaoban nila nga buhi ang mga tawo nga nagsunog sa mga ganghaan sa Templo. Lakip sa mga napatay mao si Calistenes nga mitago sa usa ka gamay nga balay ug busa nakadawat siya sa silot nga sibo sa iyang daotan nga mga buhat.

34Niining paagiha, ang daotan nga si Nicanor nga nagdala ug 1,000 ka magpapatigayon aron mopalit sa mga Judio,

35naparot uban sa panabang sa Ginoo pinaagi sa mga tawo nga iyang gitamay sa hilabihan. Gisalibay niya ang iyang harianong uniporme ug mikagiw sama sa usa ka kagiw nga ulipon hangtod nahiabot siya sa Antioquia. Nakalampos lamang siya sa paglaglag sa iyang tibuok nga kasundalohan.

36Kining tawhana nga misulay sa pagbayad ug utang ngadto sa Roma pinaagi sa pagbaligya sa mga tawo sa Jerusalem, nagpakita nga ang mga Judio dili mabuntog. Ang Dios mao ang ilang gamhanang Tigpanalipod tungod kay nagtuman sila sa mga balaod nga iyang gihatag kanila.