13 Ingon niini ang nahisulat sa sugo: “Mga pangomusta gikan kang Hari Ahasuero, ang Bantogan, ngadto sa mga gobernador sa 127 ka mga probinsiya gikan sa India ngadto sa Etiopia ug ngadto kanilang tanan nga nag-unong kanamo.
14 “Daghang mga tawo ang mahimong mapahitas-on sa diha nga ihatag kanila ang dungog ug pabor.
15 Dili sila mahibalo unsay ilang buhaton sa hilabihan kadaghang kaayohan nga ilang naangkon busa mosulay sila sa pagdagmal sa atong mga ginsakpan ug maghimo pa gayod ug mga laraw batok kanila nga naghatag kanilag mga pabor.
16 Dili gayod sila mapasalamaton sa gihimo sa mga tawo alang kanila ug naghunahuna pa gani sila nga makalingkawas sila sa silot sa Dios nga nagdumot sa daotan ug nagatan-aw sa tanan. Sa ilang kamapahitas-on namati sila sa mga ulog-ulog sa mga tawo nga walay hibangkaagan ug mga makasasala.
17 “Kadaghan usab mahitabo nga ang mga higala nga gitugyanan ug mga kaakohan sa pagdumala sa kagamhanan magduso sa ilang hangyo ngadto sa ilang mga higala nga anaa sa awtoridad. Ang ilang mga pangulo himoon nilang kaabag sa pagpamatay sa katawhan ug sa pagpahamtang ug mga kadaot nga dili gayod matabang.
18 Kining mga higalaa, pinaagi sa ilang mga bakak ug malimbongong mga paagi, magpahimulos sa maayong kabubut-on sa ilang mga magmamando.
19 “Makita ninyo ang mga panig-ingnan niining abuso sa gahom dili lamang diha sa mga sugilanon nga gipasunod kanato gikan sa nangagi kondili diha sa mga butang nga mangilngig nga bag-o lang nahitabo diha kaninyo.
20 “Buot ako nga makasiguro nga sa umaabot nga panahon ang akong gingharian magpabilin nga walay kagubot ug nga magmalinawon alang sa tanang mga tawo.
21 Mahimo kini pinaagi sa pag-usab sa pipila ka mga paagi ug pinaagi sa makiangayong paghukom sa matag suliran nga ipadangat ngari kanako.
22 “Palandonga pananglitan ang kaso ni Haman nga anak ni Hamedata nga usa ka taga-Macedonia. Siya usa ka langyaw nga walay dugo sa taga-Persia ug wala kaniya ang pagkamanggihatagon nga akong gipakita kaniya apan ako siyang gidawat.
23 Nakapahimulos siya sa kaayohan sa akong kahangawa ug gugma alang sa tanang mga tawo. Sa pagkatinuod siya gipaila nga ‘Amahan’ sa emperyo ug nakadawat ug labawng dungog kay kang bisan kinsa gawas sa hari.
24 “Apan ang iyang pagkamapahitas-on walay kinutoban ug misulay siya sa pagpatay kanako ug pag-ilog sa emperyo.
25 Sa iyang pagkamalimbongon, nangayo siya nga patyon si Mardoqueo—si Mardoqueo nga sa usa niana ka higayon nagluwas sa akong kinabuhi ug sa kanunay nagpaluyo kanako. Nangayo pa gani siya sa kamatayon ni Ester, ang atong walay mansa nga rayna, ug sa pagkatinuod, sa kamatayon sa tanang mga Judio.
26 Ang iyang tuyo mao nga himoon kitang makaluluoy ug wala nay mahimo aron mailog sa taga-Macedonia ang Emperyo sa Persia.
27 Bisan kon kining daotan nga kriminal naglaraw sa pagpuo sa mga Judio, nasuta nako nga dili gayod sila mga mabudhion kondili gimandoan sila sa mga balaod nga matarong kaayo.
28 Nagsimba sila sa buhi nga Dios, ang labing halangdon ug labing gamhanan nga Dios nga maoy nanalipod sa atong emperyo ug naghatag niini ug kalamposan gikan sa panahon sa atong mga katigulangan hangtod karon.
29 “Busa gisugo ko kamo sa dili pagtuman sa mga kasugoan nga gipakanaog diha sa mga sulat nga gipadala ni Haman.
30 Siya mao ang tawo nga responsable niining tanan ug siya gibitay na kauban sa tibuok niyang panimalay didto sa ganghaan sa Susa. Ang Dios nga nagdumala sa tanang mga butang naghatag kaniya sa dinalian nga silot nga angay kaniya.
31 “Gisugo ko kamo sa pagbutang sa mga kopya niining maong sugo diha sa tanang mga dapit nga publiko. Tugoti ang mga Judio sa pagkinabuhi subay sa ilang kaugalingong mga batasan
32 ug tabangi sila sa ilang pagpanalipod sa ilang kaugalingon batok niadtong moataki kanila sa adlaw nga gitagal nga sila laglagon nga mao ang ika-13 nga adlaw sa Adar, ang ika-12 nga bulan.
33 Ang Dios nga nagdumala sa tanang mga butang naghimo nianang gitakda unta nga adlaw sa kalaglagan ngadto sa usa ka adlaw sa kasaulogan alang sa iyang pinili nga katawhan.
34 “Ilakip kining adlawa sa inyong mga adlaw sa nasodnong kasaulogan ug sauloga ninyo kini.
35 Karon ug sa umaabot magpahinumdom kini kanato ug sa atong mga kaabin sa paagi sa Dios sa pagbantay niya sa atong nasod. Kanila nga naglaraw batok kanato, usa kini ka pahinumdom sa hulga sa Dios sa ilang kalaglagan.
36 “Sa walay pagpili, ang matag probinsiya ug matag siyudad nga dili motuman niining mga sugoa mahiagom sa akong kasuko. Laglagon sila diha sa gubat ug sunogon hangtod nga maut-ot. Wala nay tawo nga moadto didto pag-usab ug bisan gani ang mga langgam ug mga ihalas nga mga mananap mopahilayo niini hangtod sa hangtod.
Who We AreWhat We EelieveWhat We Do
2025 by iamachristian.org,Inc All rights reserved.
