1Si Judas nakadungog mahitungod sa mga Romano ug sa kabantog sa ilang gamhanan nga militar. Nahibalo siya nga gikahinangop nila ang tanan nga makig-abin kanila ug nga ang moduol kanila makasiguro sa pagpakighigala sa Roma.
2Ang mga tawo nagsugilon kaniya mahitungod sa mga pagpakiggubat nga gihimo sa mga Romano ug sa ilang maisugong mga buhat batok sa mga Gaul nga ilang nabuntog ug gipugos pagpabayad ug mga buhis.
3Gisuginlan siya giunsa pag-ilog sa mga Romano ang mga mina sa plata ug bulawan didto sa Espanya.
4Pinaagi sa makuti nga paglaraw ug sa pagkamakanunayon, nabuntog nila ang tibuok nga nasod bisan kon halayo kini sa Roma. Nabuntog nila ang mga hari sa lagyo nga mga yuta nga nakiggubat kanila. Gibuntog nila sila ug tungod niini ang mga nahibilin napugos sa pagbayad ug mga buhis matag tuig.
5Gigubat nila ug gibuntog si Felipe ug si Perseus, mga hari sa Macedonia, ug ang tanan nga miabin niining mga haria batok sa Roma.
6Gibuntog gani nila si Antioco nga Bantogan, ang hari sa Siria nga miataki kanila uban sa 120 ka elepante, mga sundalong nagkabayo, mga karwahi, ug usa ka gamhanan nga kasundalohan.
7Gidakop siya nila nga buhi ug gipugos siya ug ang iyang sumusunod sa pagbayad ug mabug-at nga mga buhis, sa paghatag ug mga patinga nga priso ug sa pagtugyan
8sa India, sa Media, sa Lidia ug sa pipila sa ilang labing maayong mga yuta. Gikuha nila kini ug gihatag ngadto kang Hari Eumenes.
9Sa diha nga ang mga Grego naglaraw sa pag-ataki ug paglaglag kanila,
10nahibaloan sa mga Romano ang mga laraw ug gipadala ang usa ka heneral aron sa pagpakigsangka kanila. Gipatay sa mga Romano ang daghang mga Grego, gibihag ang ilang mga asawa ug mga anak, gisakmit ang ilang mga kabtangan ug giilog ang ilang yuta, giguba ang ilang mga kota ug gihimo sila nga mga ulipon hangtod karong mga adlawa.
11Gilaglag usab nila ug gihimong mga ulipon ang uban nga mga gingharian, ang mga pulo ug ang tanan gayod nga nakiggubat batok kanila.
12Apan giampingan nila ang ilang pagkahigala sa ilang mga kaabin ug sa tanan nga nagsalig kanila nga ilang panalipdan. Gibuntog nila ang mga hari sa duol ug sa layo ug ang tanan nga nakadungog sa ilang kabantog nangahadlok kanila.
13Gitabangan nila ang pipila ka mga tawo aron mahimong mga hari samtang gipukan nila ang uban; nahimo silang gamhanan sa kalibotan.
14Bisan pa niining tanan, walay usa ka Romano nga misulay sa pagpauswag sa iyang kaugalingong katungdanan pinaagi sa pagsul-ob ug usa ka korona ug paggamit ug mga harianon nga bisti.
15Naghimo sila ug usa ka senado ug matag adlaw 320 ka senador ang magtigom aron paghisgot mahitungod sa mga butang nga may kalabotan sa mga tawo ug sa ilang kaayohan.
16Matag tuig, gitugyan nila ngadto sa usa ka tawo ang tulobagon sa pagdumala kanila ug sa pagmando sa tibuok nilang kayutaan. Ang tanan nagtahod niining usa ka tawo ug walay kasina o pangabubho didto kanila.
17Busa2 Mac. 4:11. si Judas mipili kang Eupolemo, ang anak ni Juan ug apo ni Acos, ug kang Jason nga anak ni Eleazar ug gipadala sila ngadto sa Roma aron paghimog usa ka kasabotan sa panaghigalaay ug pagpakig-abin sa mga Romano.
18Gihimo niya kini aron mawagtang ang pagdaugdaog sa Siria kanila kay tataw man kaayo nga gihimo lamang sila nga mga ulipon.
19Human sa usa ka taas ug lisod nga panaw, si Eupolemo ug si Jason miabot sa Roma ug misulod sa lawak sa Senado. Gisultihan nila ang tigom:
20“Si Judas Macabeo, ang iyang mga igsoong lalaki ug ang katawhan sa Judea nagpadala kanamo nganhi aron paghimo ug usa ka kasabotan sa paglinabanay uban kaninyo aron ikabutang kami sa opisyal nga talaan nga inyong mga higala ug mga kaabin.”
21Ang mga Romano midawat sa tanyag
22ug1 Mac. 14:18. ang mosunod mao ang usa ka kopya sa sulat nga gikulit sa mga papan nga bronsi ug gipadala ngadto sa Jerusalem aron magpabilin didto ingon nga usa ka timaan sa kasabotan:
23“Hinaot unta nga magmaayo ang tanan nga mga butang hangtod sa kahangtoran alang sa mga nasod sa Roma ug sa Judio sa yuta ug sa dagat! Hinaot unta nga dili gayod sila makabaton ug mga kaaway ug nga dili gayod sila makiggubat!
24Apan kon ideklarar pag-una ang gubat batok sa Roma o sa bisan kinsa sa iyang mga kaabin sa bisan diin,
25ang nasod nga Judio motabang kaniya sa kinasingkasing gayod sumala sa gikinahanglan sa higayon.
26Ang mga Judio dili mohatag o mosangkap ug mga pagkaon, mga hinagiban, salapi ug mga sakayan ngadto sa mga makiggubat sa Roma sumala sa gikasabotan dinhi sa Roma. Ug ang mga Judio kinahanglan nga magtuman sa ilang mga katungdanan sa walay pagdawat sa bisan unsang balos.
27“Sa samang paagi, kon ideklarar pag-una ang gubat batok sa katawhan nga Judio, ang mga Romano motabang kanila sa kinasingkasing nga pagpaluyo sumala sa gikinahanglan sa higayon.
28Walay ihatag o isangkap nga mga pagkaon, mga hinagiban, salapi ug mga sakayan ngadto sa mga kaaway sa mga Judio sumala sa gikasabotan dinhi sa Roma. Ug ang mga Romano kinahanglan nga magtuman sa ilang mga katungdanan sa walay limbong.
29“Mao kini ang kasabotan nga gihimo sa mga Romano uban sa katawhan nga Judio.
30Apan kon, sa kapulihay, ang duha ka bahin magkasabot sa pagdugang o pagkuha sa bisan unsa, magbuhat sila sumala sa ilang hukom ug bisan unsa ang ilang idugang o kuhaon dawaton nga tinuod.
31“Dugang pa niini, mahitungod sa mga kasaypanan nga gihimo ni Hari Demetrio batok sa mga Judio, nagsulat kami kaniya niining mosunod, ‘Nganong gidinaotan man nimo pagtratar ang among mga higala ug mga kaabin nga Judio?
32Kon mosumbong sila kanamo pag-usab mahitungod kanimo, amo silang paluyohan ug makiggubat kami kanimo sa yuta ug sa dagat.’”
Who We AreWhat We EelieveWhat We Do
2025 by iamachristian.org,Inc All rights reserved.
