2 Macabeo 13 - Cebuano Meaning-Based Bible

Si Menelao Gipatay

1Sa tuig 149 nasayran ni Judas Macabeo ug sa iyang mga sumusunod nga si Antioco Eupator nagpaingon na sa Judea uban sa usa ka dakong panon sa kasundalohan

2ug kuyog kaniya si Lisias, ang tigmatuto sa batan-ong hari ug pangulo sa iyang gobyerno. Uban kanila ang kasundalohan nga mga Grego nga gilangkoban sa 110,000 ka sundalong naglakaw, 5,300 ka sundalong nagkabayo, 22 ka elepante ug 300 ka karwahi nga sangkap sa mga mahait nga kutsilyo nga gitaod sa ilang mga ligid.

3Si Menelao nga buot mamintaha niining kahimtanga mibali ngadto kang Antioco ug miawhag kanila sa pagpadayon, dili tungod kay nahingawa siya sa iyang nasod kondili tungod kay naglaom siya nga dasonan ang pagtudlo kaniya sa pagka-Pangulong Pari.

4Apan ang Dios, ang Hari sa tanang hari, naghimo nga maglagot si Antioco kang Menelao. Gimatuod ni Lisias ngadto kang Antioco nga kining kriminal mao ang hinungdan sa tanan niyang kasamok busa misugo si Antioco nga dad-on siya ngadto sa siyudad sa Berea ug nga patyon siya sa paagi nga naandan didto.

5Niadtong siyudara may usa ka tore nga may 22 ka metros ang gitas-on. Puno kini sa abo ug libot sa sulod sa tore may usa ka plataporma nga nagdulhog ngadto sa mga abo.

6Ang mga tawo nga gipasanginlan ug mga sala batok sa mga diosdios o bisan unsang dagko nga mga kalapasan dad-on didto ug itambog ngadto sa ubos aron sila mamatay.

7Si Menelao gipatay niadtong paagiha, sa wala gani pagbaton ug pribilihiyo nga ilubong

8ug kadto mao ang angay kaniya. Sa makadaghan gipanamastamasan niya ang balaan nga mga abo sa kalayo sa altar didto sa Templo ug karon nakasugat siya sa iyang kamatayon diha sa mga abo.

Usa ka Gubat Duol sa Siyudad sa Modin

9Si Hari Antioco mapasigarbohon nga nagpadayon sa iyang minangtas nga pagsulong sa Juda sa tuyo sa pagdaugdaog sa mga Judio labaw pa kay sa nahimo sa iyang amahan.

10Sa pagkasayod ni Judas niini, gimandoan niya ang mga tawo sa pag-ampo ngadto sa Ginoo adlaw ug gabii tungod kay nahimutang sila sa kakuyaw nga mawala ang ilang balaod, ang ilang nasod ug ang ilang balaan nga Templo. Labaw pa kay sa kaniadto, nagkinahanglan sila sa iyang panabang ug panalipod

11aron ang ilang bag-ong nahiuli nga nasod dili unta mahulog ngadto sa mga kamot sa mga dili Judio nga walay Dios.

12Sulod sa tulo ka adlaw ang mga tawo walay laing gibuhat gawas sa paghapa sa yuta. Nagpuasa sila ug nagdanguyngoy, nangamuyo sa kaluoy sa Ginoo aron sila iyang tabangan. Unya gidasig ni Judas ang katawhan ug gimandoan niya sila sa pagpangandam alang sa gubat.

13Human niana, si Judas nakigtagbo sa tago uban sa mga pangulo nga Judio ug mihukom sila sa paggula uban sa panalangin sa Dios aron sa pagpakiggubat batok sa hari, inay magpaabot nga si Antioco mosulong sa Judea ug moataki sa Jerusalem.

14Unya gitugyan nila ang ilang kalamposan sa gubat ngadto sa Magbubuhat sa kalibotan ug gidasig ni Judas ang iyang mga tawo sa pagpakig-away nga maisogon ug sa pagtugyan sa ilang kinabuhi alang sa ilang mga balaod, sa Templo, sa Jerusalem, sa ilang nasod ug sa kaayohan sa tanan. Nagkampo sila duol sa siyudad sa Modin.

15Unya gihatag ni Judas ang singgit sa gubat nga nag-ingon, “Ang kadaogan naggikan sa Dios,” ug niadtong gabhiona uban sa mga pinili sa iyang kasundalohan, sa iyang labing maisog nga mga batan-on, giataki niya ang dapit duol sa tolda sa hari ug gipatay nila ang kapin sa 2,000 ka tawo. Gipanunggab usab nila ang mga nag-una nga elepante lakip ang nagsakay niini hangtod nga nangamatay kini.

16Ang tanan didto sa kampo nangalisang ug nagkaguliyang sa kahadlok sa diha nga si Judas ug ang iyang mga tawo sa kataposan namauli nga madaogon

17sa hapit na ang kaadlawon. Nahitabo kini tungod sa panabang ug panalipod sa Ginoo.

Si Antioco V Nakigsabotsabot sa mga Judio(1 Mac. 6:48-63)

18Si Hari Antioco nakatilaw sa pagkamapangahason sa mga Judio ug igo na kini nga nakapatuo gayod kaniya nga kinahanglang mangita siyag mas maayong paagi sa pagkuha sa mga yuta nga Judio.

19Giataki niya ang Betzur, ang malig-on nga kota sa mga Judio apan sa makadaghan gipasibog siya ug sa kataposan naparot.

20Si Judas nagpadala ug mga kahimanan ngadto sa mga tawo nga nanalipod sa kota,

21apan usa ka sundalo nga Judio nga ginganlag Rodocus mihatag ug pipila ka tinagong kasayoran ngadto sa kaaway. Apan nasakpan siya, gisilotan ug gipatay.

22Ang hari naghimo ug ikaduhang pagsulay sa pagpakigsabot sa katawhan sa Betzur ug sa nakakab-ot na siya ug kasabotan uban kanila, gisibog niya ang iyang kasundalohan. Unya miadto siya aron pagsulong kang Judas apan naparot na usab siya.

23Sa laing bahin, si Felipe nga iyang gibilin didto sa Antioquia aron magdumala sa gobyerno mialsa batok kaniya ug iya kining nahibaloan. Si Antioco wala na mahibalo unsay iyang buhaton busa misugod siya paghimo ug mga sabotsabot sa kalinaw uban sa mga Judio ug miuyon sa ilang mga kondisyon ug misaad nga magminatarong siya sa iyang pagtratar kanila. Aron matuman ang kasabotan, mihalad siya ug usa ka sakripisyo, mihatag ug usa ka dakong gasa aron pagpakita sa iyang pagtahod sa Templo

24ug giayo niya pagdawat si Judas Macabeo. Human niana, ang hari mitudlo kang Hegemonides aron mahimong gobernador gikan sa mga siyudad sa Tolemais ngadto sa Jerar

25ug unya siya mismo miadto sa Tolemais. Ang mga tawo nasuko tungod sa pakigsabot nga iyang gihimo uban sa mga Judio—labihan gayod nilang kasuko ug gusto nilang bakwion ang sabot.

26Apan si Lisias naghimog usa ka pakigpulong sa publiko aron paglaban sa kasabotan kutob sa iyang mahimo. Human niya mabugnaw ang mga tawo ug madani sila pagtuo nga siya husto, mibalik siya ngadto sa Antioquia.

Niining paagiha ang pag-ataki ni Hari Antioco nahimo nga usa ka pagsibog.