Judit 14 - Cebuano Meaning-Based Bible

Ang Laraw ni Judit

1Unya miingon si Judit kanila, “Mga kaigsoonan, palihog sunda ang akong tambag. Inigkabuntag kuhaa kining ulo ug ibitay didto sa paril sa lungsod.

2Pagtudlo kamog usa ka pangulo ug inigsubang sa adlaw padad-a ang tanang mga maayog lawas nga mga lalaki sa ilang mga hinagiban ug pagul-a sa lungsod uban kaniya nga mura ug manglugsong ngadto sa walog aron pag-ataki sa puwesto sa mga taga-Asiria.

3Ang mga guwardiya nga taga-Asiria molanit sa ilang mga hinagiban ug managan balik sa kampo aron pagpukaw sa ilang mga opisyal. Ang mga opisyal managan ngadto sa tolda ni Holofernes apan dili na sila makakaplag kaniya ug ang tibuok kasundalohan mangalisang ug manibog samtang kamo modasdas batok kanila.

4Unya kamo ug ang tanang mga Israelita makahimo sa pag-apas ug pagpatay kanila diha sa ilang pagsibog.

5Apan sa dili pa kamo magbuhat niini, ipakuha si Aquior, ang taga-Amon ug dad-a ngari kanako. Buot ako masayod kon nakaila ba siya kang Holofernes, ang tawo nga nanamastamas sa Israel ug nagpadala kang Aquior nganhi kanato sa hunahuna nga mamatay siya uban kanato.”

Ang Pagkakabig ni Aquior

6Busa gitawag nila si Aquior gikan sa balay ni Uzias. Apan sa paghiabot niya ug pagkakita sa ulo ni Holofernes didto sa mga kamot sa usa sa mga lalaki, gikuyapan si Aquior ug natumba sa salog.

7Sa naulian na siya, mihapa si Aquior sa tiilan ni Judit sa pagtahod. Miingon siya, “Ang tanang banay sa yuta sa Juda magdayeg unta kanimo ug hinaot unta nga ang tanang nasod mokurog sa kalisang sa ilang pagkabati sa imong ngalan.

8Palihog tug-ani ako giunsa nimo kini paghimo.”

Samtang nag-alirong ang tanang mga tawo, gitug-anan siya ni Judit sa tanan nga iyang nabuhat sukad sa adlaw nga mibiya siya sa lungsod hangtod niadtong orasa.

9Sa pagkahuman na niya sa iyang sugilanon, ang mga tawo naninggit sa hilabihang kakusog nga ang kagahob sa kasadya milanog sa tibuok lungsod.

10Sa pagkadungog ni Aquior sa tanan nga gihimo sa Dios sa Israel, nahimo siya nga usa ka lig-on nga magtutuo. Gituli siya ug nahimo siyang usa ka sakop sa katilingban sa mga Israelita hangtod karong mga adlawa.

Kaguliyang sa Kampo ni Holofernes

11Sa pagkabuntag gibitay sa mga Israelita ang ulo ni Holofernes didto sa paril sa lungsod. Silang tanan nagdala sa ilang mga hinagiban ug nanggula sa tagsatagsa ka pundok ngadto sa mga walog didto sa atubangan sa lungsod.

12Sa pagkakita sa mga taga-Asiria sa nanghitabo, nagpahibalo sila sa ilang mga opisyal ug kini sila mitaho niini ngadto sa ilang mga labaw.

13Unya kining mga tawhana nangadto sa tolda ni Holofernes ug nag-ingon kang Bagoas, “Pukawa ang heneral! Kining walay hinungdan nga mga Israelita nangahas sa paglugsong gikan sa bukid aron pag-ataki kanato. Nangayo lamang sila sa ilang kalaglagan.”

14Si Bagoas misulod ug nanawag atubangan sa lawak nga katulganan kay naghunahuna man siya nga si Holofernes didto sa higdaanan dulog kang Judit.

15Sa diha nga walay mitubag, iyang giwalis ang kurtina ug misulod siya ug didto hipalgan niya ang lawas nga walay ulo nga nahilukapa ibabaw sa bangko.

16Misinggit si Bagoas. Nagminatay siya, gigisi niya ang iyang mga bisti ug misugod siya pagbakho.

17Misulod siya sa tolda diin mag-abot si Judit apan wala na siya niya hikaplagi. Midagan siya sa gawas ug gisinggitan niya ang mga opisyal sa pag-ingon,

18“Gilansisan kita! Usa ka babayeng Israelita nagpakaulaw sa tibuok gingharian ni Nabucodonosor. Tan-awa ninyo didto! Si Holofernes naghigda nga patay na didto sa yuta ug wala na siyay ulo!”

19Sa pagkadungog niini sa mga opisyal, gigisi nila ang ilang mga bisti tungod sa kaguol ug dihay kaguliyang ug nadungog sa tibuok kampo ang mga hilak ug singgit.