Sirac 18 - Cebuano Meaning-Based Bible

Ang Pagkagamhanan sa Dios

1Ang Ginoo nga buhi hangtod sa kahangtoran maoy nagbuhat sa tibuok uniberso

2ug siya lamang gayod ang matarong.

4Wala siya maghatag kang bisan kinsa sa igo nga gahom aron pagsaysay unsa ang iyang nabuhat ug walay makasusi niini sa hingpit gayod.

5Kinsay makasukod sa iyang harianong gahom? Kinsay makasaysay sa tibuok nga sugilanon sa iyang maluluy-on nga mga buhat?

6Dili kita makadugang niini; dili kita makakunhod niini. Dili gayod matukib ang kahibulongang mga butang nga nabuhat sa Ginoo.

7Nagtuo kita nga nakaabot na kita sa kataposan apan nagsugod pa lamang diay; sa panahon nga mohunong kita, maglibog kita.

Ang Tawo Walay Hinungdan

8Unsa ba ang tawo? O unsay kapuslanan niya? Ang maayo nga iyang nabuhat—ang daotan nga iyang nahimo—unsa may kahulogan niining tanan?

9Kon ang usa ka tawo makaabot sa edad nga usa ka gatos ka tuig, nakabaton siya ug taas nga kinabuhi labaw sa kasarangan.

10Apan kon itandi kini sa tibuok nga eternidad, kining mga tuiga daw usa lamang ka tulo sa tubig diha sa lawod ug sama sa usa ka lugas nga bunbon.

11Mao kini ang hinungdan ngano nga ang Ginoo hilabihan ka mapailubon kanato, ngano nga dako kaayo ang iyang kaluoy.

12Nagtan-aw siya kanato ug nahibalo siya nga kita silotan sa kamatayon ug mao kini ang hinungdan ngano nga andam gayod siya nga mopasaylo kanato.

13Ang usa ka tawo makapakita ug kaluoy ngadto sa usa nga iyang hiilhan apan ang Ginoo nagpakita ug kaluoy ngadto sa tanang mga tawo. Iya kitang gibadlong; iya kitang gipanton; iya kitang gitudloan. Sama sa usa ka magbalantay sa karnero nga nag-atiman sa iyang mga karnero, iya kitang gidala pagbalik ngadto sa iyang kaugalingon.

14Maluoy siya kanato kon dawaton nato ang iyang paggiya ug kon ikalipay nato ang iyang pagpakita kanato diin kita masayop.

Kaluoy ug Gugma

15Anak, kon tabangan mo ang usa ka tawo, ayaw siya pagkasab-i dungan niini. Sa paghatag nimo ug usa ka gasa, ayaw pagsulti bisan unsa nga makasakit.

16Ang imong mga pulong mas bililhon kay sa imong gihatag sama sa yamog nga maghatag ug diyutay nga kabugnaw sulod sa hulaw.

17Oo, ang maayo nga mga pulong labaw pa ka mabungahon kay sa labing maayo nga mga gasa ug kon tinuod gayod ikaw nga manumbaling, ihatag nimo ang duha.

18Binuang ang pagkawalay kaluoy ug pagpang-insulto. Walay mga mata nga mosidlak tungod sa usa ka gasa nga imong gihatag uban sa bug-at nga buot.

Pag-usisa sa Kaugalingon

19Sa dili ka pa mosulti kinahanglan nga mahibalo ikaw unsa ang imong gihisgotan ug pagmatngon sa imong panglawas sa dili pa ikaw masakit.

20Usisaha ang imong konsensya sa dili ka pa hukman sa Ginoo. Unya kon moabot na kanang panahona, pasayloon ikaw niya.

21Pagpaubos sa imong kaugalingon sa dili pa ikaw silotan ug sakit. Kon makasala ka, paghinulsol.

22Kon maghimo kag usa ka saad ngadto sa Ginoo, tumana kini sa labing madali ug ayaw paghulat hangtod nga hapit ka na mamatay.

23Apan sa dili ka pa mohimo sa maong panaad, pag-andam sa pagtuman niini. Ayaw pagsulayi ang pailob sa Ginoo.

24Hunahunaa! Buot ba ikaw nga masuko siya kanimo sa adlaw sa imong kamatayon? Inig-atubang nimo sa iyang hukmanan, buot ba ikaw nga talikdan niya?

25Kon anaa kanimo ang tanan nga imong gikinahanglan, hunahunaa unsa ang bation sa usa ka tawo nga gigutom, unsa ang pagka kabos.

26Ang mga butang mahimo nga mausab sulod sa usa ka adlaw; ang Ginoo makabuhat sa kalit kaayo.

27Kon makinaadmanon ka, magbantay ka pag-ayo sa tanan nga imong buhaton. Kon gilibotan ka sa mga nagpakasala, pagbantay basig magpakasala ka usab.

28Ang tawong maantigo makaila sa kaalam ug magpasidungog kang bisan kinsa nga nakakaplag niini.

29Kon mahalon mo ang mga maalamong pulong inigkadungog mo niini, mahimo ka usab nga maalamon ug ang imong mga pulong mahimong tinubdan sa kaalam alang sa uban.

Ang Pagpugong sa Kaugalingon

30Ayaw pagpagawong sa imong kailibgon; hinuon pugngi kini.

31Kon tugotan mo ang imong kaugalingon sa pagtagbaw sa tanan nimong kaibog, mahimo kang kataw-anan ngadto sa imong mga kaaway.

32Ayaw pagpatuyang diha sa luhong pagkinabuhi; ang gasto niini makaut-ot kanimo.

33Ayaw himoa ang imong kaugalingon nga usa ka makalilimos tungod sa pagpanghulam aron gastohon sa mga mahalon nga kombira bisan wala kay igo nga salapi.