Tobit 7 - Cebuano Meaning-Based Bible

Didto sa Balay ni Raguel

1Sa pag-abot ni Tobias ug sa anghel nga si Rafael sa siyudad sa Ecbatana, miingon si Tobias, “Azarias, higala ko, dad-a dayon ako sa labing madali ngadto kang Raguel.” Ang anghel midala kaniya ngadto sa balay ni Raguel diin ila siyang naabtan nga naglingkod sa ganghaan sa iyang patyo. Si Rafael ug si Tobias nangomusta kaniya pag-una. Unya mitubag siya, “Dayon kamo, mga higala ko. Bukas kining balaya alang kaninyo!”

Gipasulod sila ni Raguel sa iyang balay

2ug miingon siya sa iyang asawa nga si Edna, “Dili ba kining batan-ona sama gayod ug dagway sa akong ig-agaw nga si Tobit?”

3Si Edna nangutana kanila, “Diin man kamo gikan?”

Si Tobias ug si Rafael mitubag, “Kami mga Israelita sa banay ni Neftali apan nagpuyo na kami karon ingon nga mga binihag didto sa siyudad sa Ninibe sa Asiria.”

4Miingon si Edna, “Nakaila ba kamo sa among ig-agaw nga si Tobit?”

Mitubag sila, “Oo, nakaila kami kaniya.”

Nangutana siya, “Komusta man siya?”

5“Buhi siya ug maayog lawas,” mitubag sila.

Unya si Tobias midugang pag-ingon, “Si Tobit mao ang akong amahan.”

6NiiningGen. 33:4; 45:14; Luc. 15:20. tungora mitindog si Raguel ug gihagkan niya si Tobias ug mihilak siya sa kalipay.

7Unya miingon siya, “Panalanginan ka unta sa Dios, anak ko. Ang imong amahan usa ka maayo ug hamili nga tawo. Pagkaanugon nga ang usa ka maligdong ug manggihatagon nga tawo nawad-an sa panan-aw.” Gigakos niya si Tobias ug naghilak sa iyang mga abaga.

8Ang iyang asawa nga si Edna ug ang iyang anak nga babaye nga si Sara mihilak usab tungod kang Tobit.

Giabiabi pag-ayo ni Raguel si Tobias ug si Rafael ug giihawag karnero. Human nakaligo ang mga bisita ug sa hapit na sila manglingkod sa pagpangaon, si Tobias miingon kang Rafael, “Azarias, higala ko, kanus-a man nimo hangyoa si Raguel aron mapangasawa ko si Sara?”

9Apan nakadungog si Raguel sa pangutana ug giingnan niya si Tobias,

10“Kaon ug inom una ug paglipay karong gabhiona. Aduna kay katungod sa pagpangasawa kang Sara ug dili ako makatugot nga adunay lain pa nga mangasawa kaniya tungod kay ikaw ang akong labing suod nga paryenti. Apan tug-anan ko ikaw sa matuod, anak ko.

11Gihatag ko na siya ngadto sa pito ka tawo, silang tanan mga paryenti. Ang matag usa kanila namatay sa gabii sa ilang kasal, diha gayod sa paghisulod nila sa lawak nga higdaanan. Apan karon, anak ko, kaon una ug inom. Ang Ginoo magbantay kaninyong duha.”

Mitubag si Tobias, “Dili ako mokaon o moinom hangtod nga imo akong pasaligan nga maasawa ko si Sara.”

12Miuyon si Raguel ug miingon, “Sa walay duhaduha himoon ko kini. Ihatag ko siya kanimo sumala sa gisugo sa Balaod ni Moises. Ang Dios sa langit maoy naghikay niining kaminyoona busa dawata siya nga imong asawa. Sukad karon, ikaw iyaha na ug siya imoha. Si Sara imoha karong adlawa ug hangtod sa hangtod. Ang Ginoo sa langit magbantay unta kaninyong duha nga walay mahitabo karong gabhiona. Magmaluluy-on unta siya kaninyo.”

Ang Seremonyas sa Kasal

13Unya gitawag ni Raguel ang iyang anak. Sa pagduol na niya, gikuptan niya ang iyang kamot ug gihatag siya ngadto kang Tobias uban sa iyang panalangin. Siya miingon, “Dawata siya nga imong asawa sumala sa mga pagtulon-an sa Balaod ni Moises. Dad-a siya ngadto sa balay sa imong amahan. Ang Dios sa langit maghatag unta kaninyong duha sa usa ka malipayon nga kinabuhi.”

14Nangayo si Raguel sa iyang asawa nga dad-an siya ug usa ka linukot nga walay sulat aron iyang ikasulat ang kasabotan sa kaminyoon. Gidad-an siya ni Edna sa linukot nga sulatanan ug gisulat ni Raguel ang kasabotan nga si Sara gihatag ngadto kang Tobias sumala sa mga pagtulon-an sa Balaod ni Moises.

15Human sa seremonyas misugod sila sa pagpangaon.

16Unya gitawag ni Raguel ang iyang asawa ug giingnan, “Andama ang lawak, asawa ko, ug dad-a si Sara didto.”

17Gihikay ni Edna ang higdaanan sumala sa giingon kaniya ni Raguel. Unya gikuha niya si Sara ug gidala ngadto sa lawak ug si Sara misugod paghilak. Apan gipahiran ni Edna ang iyang mga luha ug giingnan,

18“Ayaw kahadlok, Sara. Siguro ako nga ang Ginoo sa langit maghimo kaninyong malipayon niining higayona ug dili maghatag kaninyog kasubo. Busa, anak ko, paglipay.” Unya mibiya si Edna sa lawak.