Sirac 25 - Cebuano Meaning-Based Bible

Mga Tawo nga Angay Dayegon

1Adunay tulo ka butang nga gikahimut-an ko pag-ayo—mga butang nga maanindot alang sa Ginoo ug alang usab sa tawo:

mga igsoon nga magkasinabot,

mga silingan nga managhigala,

ug magtiayon nga malipayon sa ilang panagtipon.

2Adunay tulo ka matang sa mga tawo nga dili ko maantos, kansang taras makapalagot kaayo:

mga kabos nga mapahitas-on,

mga dato nga bakakon, ug buangon nga mga tigulang nga lalaki nga manapaw.

3Dili gayod ikaw mahimong makinaadmanon inigkatigulang nimo gawas kon magtuon ka kutob sa imong mahimo samtang batan-on ka pa.

4Ang maayong panghukom, ang maayong tambag ug ang puti nga buhok angayan kaayo nga manag-uban.

5Ang kaalam, ang pagpanabot ug ang matarong nga tambag angay sa tigulang ug sa tinahod.

6Ang mga tawo nga tigulang nagsul-ob sa korona sa taas nga kasinatian ug wala silay mas maayo nga ikapasigarbo gawas sa ilang kahadlok sa Ginoo.

7Tug-anan ko ikaw mahitungod sa napulo ka matang sa mga tawo nga gihunahuna ko nga palaran, labinang bulahan ang ikanapulo:

usa ka tawo nga mibatig garbo sa iyang mga anak;

usa ka tawo nga nagpabiling buhi hangtod nga makita niya ang pagkapukan sa iyang mga kaaway;

8usa ka tawo nga may usa ka masinabuton nga asawa;

usa ka magtiayon nga maayong pagkaparis;

usa ka tawo nga dili gayod magpakasala sa pagsulti;

usa ka tawo nga wala mapugos sa pag-alagad sa usa ka tawo nga minos kay kaniya;

9usa ka tawo nga may usa ka matuod nga higala;

usa ka tawo nga malipay ang mga tawo sa pagpamati,

10ug ang tinuod nga dako: usa ka tawo nga maalamon.

Apan ang labing dako sa tanan mao ang tawo nga mahadlokon sa Ginoo.

11Walay sama sa maong tawo tungod kay ang pagkamahadlokon sa Ginoo mao ang labing importante niining kalibotana.Mga Babaye

13Walay samad nga sama kadako sa gugma nga samdan. Walay mga kasamok nga sama kadako sa mga kasamok gumikan sa mga babaye.

14Walay mga alantuson nga ingon kangil-ad sa mga alantuson gumikan sa mga tawo nga nagdumot kanimo. Walay panimalos nga mas daotan pa kay sa panimalos nga gihimo sa usa ka kaaway.

15Walay hilo nga mas makamatay kay sa hilo sa usa ka bitin ug walay kasuko nga mas makamatay kay sa kasuko sa usa ka babaye.

16Mas palabihon ko ang pagpakig-ipon uban sa usa ka liyon o usa ka dragon kay sa pagpakigtipon sa usa ka daotan nga asawa.

17Kon ang usa ka asawa daotag buot, mausab ang iyang panagway hangtod maingon siya sa usa ka napungot nga oso.

18Ang iyang bana mapugos sa paglakaw ug sa pagkaon didto sa mga kasilinganan diin didto niya ipagawas ang iyang mapait nga mga panghupaw.

19Ang bisan unsang kasamok gamay lamang kon itandi sa mga kasamok gumikan sa usa ka babaye. Hinaot unta nga ang maong mga babaye mag-antos sa kapalaran sa mga makasasala!

20Ang usa ka bana nga hilomon nga may asawa nga tagawtawan sama sa usa ka tigulang nga nagtungas sa usa ka bungtod nga balas.

21Ayaw pagpakabuang tungod sa katahom sa usa ka babaye ug ayaw tinguhaa ang usa ka babaye tungod kay siya adunahan.

22Kon ang usa ka lalaki gibuhi sa iyang asawa, moabot gayod ang kasuko, ang garbo ug ang pagpakaulaw.

23Ang usa ka daotang asawa maghimo sa iyang bana nga magul-anon ug subo ug maghatag ug kasakit sa iyang kasingkasing. Pakitai ako ug usa ka hinayon nga lalaki nga dili gayod makaporma sa iyang hunahuna ug pakit-on ko ikaw ug usa ka asawa nga wala gayod maghatag ug kalipay sa iyang bana.

24Ang sala nagsugod sa usa ka babaye ug tungod kaniya mangamatay kitang tanan.

25Ayaw itugot nga ang usa ka daotang asawa magtuman sa iyang gusto sama nga dili ka motugot nga ang tubig magtulo gikan sa imong sudlanan.

26Kon ang imong asawa dili magbuhat sa imong isulti kaniya, bulagi siya.