Judit 1 - Cebuano Meaning-Based Bible

Ang Gubat Tali ni Nabucodonosor ug ni Arfacsad

1Sa ika-12 nga tuig sa pagmando ni Hari Nabucodonosor sa mga taga-Asiria gikan sa iyang ulohang siyudad nga mao ang Ninibe, si Hari Arfacsad maoy nagmando sa mga taga-Media gikan sa iyang ulohang siyudad sa Ecbatana.

2Libot sa Ecbatana gitukod ni Hari Arfacsad ang usa ka paril nga may 32 ka metros ang gihabugon ug 22 ka metros ang gibag-on nga batong tinagsip. Matag bato may gibag-on nga 1.3 ka metros ug 2.7 ka metros ang gitas-on.

3Sa matag ganghaan gitukod niya ang usa ka lantawan nga adunay 45 ka metros ang gihabugon ug adunay pundasyon nga 27 ka metros ang gibag-on.

4Ang matag ganghaan may 32 ka metros ang gihabugon ug 18 ka metros ang gilapdon nga igong kaagian sa tibuok niyang kasundalohan.

5Sa ika-12 ka tuig sa paghari ni Hari Nabucodonosor, nakiggubat siya kang Hari Arfacsad didto sa halapad nga patag nga naglibot sa siyudad sa Rages.

6Daghang mga nasod ang nakig-abin kang Hari Arfacsad—ang tanang katawhan nga nagpuyo sa kabukiran, ang mga nagpuyo subay sa mga suba sa Tigris, Eufrates ug Hidespes ingon man ang mga nagpuyo sa patag nga gimandoan ni Hari Arioc sa Elam. Daghang mga nasod ang nakig-abin sa mga taga-Chaldea.

7Unya si Hari Nabucodonosor sa Asiria nagpadalag usa ka mensahe ngadto sa taga-Persia ug ngadto sa katawhan sa kasadpan, sa mga dapit sa Cilicia, Damasco, Lebanon, Antilebanon, sa mga nagpuyo sa baybayon

8ug sa mga dapit sa Carmelo, Gilead, sa amihanan sa Galilea ug sa Walog sa Jezreel.

9-10Miabot usab ang mensahe ngadto sa mga tawo nga nagpuyo sa Samaria ug sa kasikbit nga mga lungsod, ngadto sa dapit sa kasadpan sa Suba sa Jordan hangtod sa mga siyudad sa Jerusalem, Betania, Quelus ug Cades ug ngadto sa distrito sa Gosen. Ang mensahe gidala usab ngadto sa mga siyudad sa Ehipto nga mao ang Tapanhes, Rameses, Tanis ug Memfis ug sa distrito ibabaw sa Suba sa Nilo ngadto sa utlanan sa Sudan.

11Apan ang tanan niining dapita wala magtagad sa hangyo ni Hari Nabucodonosor ug mibalibad sila sa pag-apil sa gubat. Naghunahuna sila nga wala siyay dag-anan sa gubat busa wala sila mahadlok kaniya ug gipabalik ang iyang mensahero nga naulawan ug walay dala.

12Tungod niini napungot pag-ayo si Nabucodonosor ug nanumpa siya nga iyang itahan ang tibuok niyang gingharian aron kapanimaslan niya kining tanang katawhan. Nanumpa siya nga pamatyon niya ang tanang katawhan sa Cilicia, Damasco, Siria, Moab, Amon, Juda ug Ehipto—ang tanan nga gikan sa kadagatan sa Mediteraneo ngadto sa Dagat sa Persia.

13Sa ika-17 nga tuig sa iyang pagmando gidala ni Hari Nabucodonosor ang iyang kasundalohan ngadto sa pagpakiggubat batok kang Hari Arfacsad. Gibuntog niya ang tanang kasundalohan ni Arfacsad lakip ang tibuok kasundalohang nagkabayo ug ang tanang nagsakay sa karwahi.

14Unya giilog ni Nabucodonosor ang tanang mga lungsod sa yuta sa Media ug miabante siya ngadto sa siyudad sa Ecbatana. Nailog niya ang mga lantawan sa siyudad, gisakmit niya ang mga tiyanggihan niini ug gigun-ob niya ang matahom nga siyudad.

15Nadakpan niya si Hari Arfacsad didto sa kabukiran nga naglibot sa Rages ug iyang gipatay. Human sa kamatayon ni Arfacsad,

16si Nabucodonosor ug ang tibuok niyang kasundalohan mibalik ngadto sa Ninibe dala ang tanan nga mga sinakmit nga nakuha nila didto sa gubat. Didto mipahulay sila ug nagkombira sulod sa upat ka bulan.