Sirac 7 - Cebuano Meaning-Based Bible

Nagkalainlaing mga Tambag

1-2Kon dili ka magbuhat ug daotan, walay kadaot nga moabot kanimo.

3Ayaw daroha ang yuta aron tamnan ug mga binhi sa panglupig kay tingali unyag mag-ani ka ug mas dako nga anihon kay sa imong gipaabot.

4Ayaw pangayo sa Ginoo ug dungog ug ayaw pangayo sa hari ug dakong katungdanan.

5Ayaw patuoha ang Ginoo nga ikaw matarong ug ayaw ipasundayag ang imong kaalam atubangan sa hari.

6Ayaw pagtinguha nga mahimo ikaw nga usa ka maghuhukom, gawas kon aduna kay kalig-on sa pagsanta sa pagpanglupig kay basig magpagawong ra ikaw sa usa ka tawo nga anaa sa gahom ug ang imong kaligdong madaot.

7Ayaw pagpakasala batok sa katawhan ug ayaw pagpakaulaw sa imong kaugalingon atubangan sa imong katagilungsod.

8Ayaw himoa ang samang sala sa makaduha. Ang silot nga naangkon nimo sa unang higayon igo na unta.

9Ayaw paghunahuna nga tungod sa kadaghan sa imong gasa, dawaton gayod kini sa Dios nga Labing Halangdon.

10Ayaw gayod kaluya sa pag-ampo ug ayaw pakyasa ang pagtabang sa mga kabos.

11Ayaw kataw-i ang usa ka tawo nga nalukapa. Ang Ginoo mao ang nagpahimutang sa usa ka tawo sa ubos apan ang Ginoo mao usab ang magbayaw kaniya pag-usab.

12Ayaw pagmugna ug mga bakak batok sa imong mga higala.

13Ayaw gayod pagpamakak. Wala gayod kini kaayohan bisan unsa.

14Diha sa usa ka tigom nga opisyal, ayaw pagbarog ug pagsulti sa daghang mga butang nga walay hinungdan. Ug ayaw balikbalika ang imong isulti kon mag-ampo ikaw.

15Ayaw paglikay sa bug-at nga trabaho. Ang Labing Halangdon maoy naghatag kanato niining mga buhata nga iyang ipahimo.

16Ayaw pagtipon sa pundok sa mga makasasala; hinumdomi nga ang Ginoo mosilot gayod.

17Pagmapaubsanon pag-ayo kay ang tanan mamatay ug madunot.Ang Atong Relasyon sa Uban

18Ayaw pagluib sa usa ka higala tungod sa salapi. Ayaw budhii ang usa ka matuod nga higala bisan pa tungod sa tanang mga bulawan sa kalibotan.

19Ayaw palabya ang higayon sa pagpangasawa sa usa ka maalam ug maayo nga babaye. Ang usa ka maayong asawa mas bililhon pa kay sa bulawan.

20Ayaw daugdaoga ang usa ka sulugoon nga nagtuman pag-ayo sa iyang buhat o ang usa ka sinuholan nga naghimo sa labing maayo nga iyang nahimo alang kanimo.

21HigugmaaExo. 21:2; Deut. 15:12-15. ang usa ka maalamon nga sulugoon sama sa imong paghigugma sa imong kaugalingon ug hatagi siya sa iyang kagawasan.

22Atimana pag-ayo ang bisan unsang mga hayop nga imoha. Kon makasapi ka tungod niini, ampingi kini.

23Kon aduna kay mga anak nga lalaki edukaha sila. Tudloi sila pagdisiplina sa ilang kaugalingon samtang bata pa sila.

24Kon aduna kay mga anak nga babaye, ampingi nga magbinuotan sila ug ayaw sila patuyangi sa ilang gusto.

25Kon imong minyoon ang imong anak nga babaye, nakahuman ka na sa usa ka dakong tahas apan ihatag siya ngadto sa usa ka but-an nga lalaki.

26Kon may asawa ka nga buotan, ayaw siyag bulagi apan ayaw itugyan ang imong kaugalingon ngadto kaniya nga wala nimo higugmaa.

27PasidunggiExo. 20:12. ang imong amahan sa tibuok nimong kasingkasing ug ayaw hikalimti ang giantos sa imong inahan sa pagpanganak kanimo.

28Hinumdomi nga utang nimo kanila ang imong kinabuhi. Unsaon man nimo pagbayad kanila sa tanan nga ilang nahimo alang kanimo?

29Kahadloki ang Ginoo sa tibuok nimong kasingkasing ug tahora ang iyang mga pari.

30Higugmaa ang imong Magbubuhat sa tibuok nimong kusog ug tabangi ang iyang mga alagad.

31Pasidunggi ang Ginoo ug tahora ang mga pari. Sangkapi sila sa gisugo kanimo nga ipahatag kanila: ang una nga mga abot, ang halad alang sa sala, ang abaga sa mananap nga hinalad ug ang tanang matang sa mga halad nga gisugo.

32Ihatag ang imong hinabang ngadto sa mga kabos ug ang Ginoo maghatag kanimo sa iyang hingpit nga panalangin.

33Panghatag kanunay sa tanan nga mga buhi ug ayaw hikalimti ang paghandom sa mga nangamatay.

34Duyog kanila nga nagsubo ug nagbangotan.

35Ayaw kalimti pagduaw sa masakiton. Higugmaon ikaw tungod sa mga butang nga sama niini.

36Bisan unsa ang imong buhaton, hinumdomi nga moabot gayod ang adlaw nga mamatay ka; kon buhaton mo kini, dili gayod ikaw makasala.