Tobit 6 - Cebuano Meaning-Based Bible

Si Tobias Nakadakop ug Isda

1Busa si Tobias ug ang anghel nanglakaw hangtod sa pagsalop sa adlaw, unya mipahulay sila sa tampi sa Suba sa Tigris.

2Si Tobias nanaog aron maligo didto sa suba ug sa kalit lamang usa ka dakong isda ang milukso gikan sa tubig ug misulay pagtukob kaniya. Nakasinggit si Tobias

3ug ang anghel miingon kaniya, “Dakpa kanang isdaa ug ayaw buhii!”

Busa gisignit ni Tobias ang isda ug gibira ngadto sa tampi.

4Giingnan siya sa anghel, “Disdisi ang isda ug kuhaa ang iyang apdo, kasingkasing ug atay. Dad-a kini kay magamit kini nga tambal apan ilabay ang tinai.”

5Gihimo ni Tobias ang gisulti kaniya sa anghel. Unya iyang giluto ang isda, gikaon ang usa ka bahin niini ug gibulad ang ubang bahin aron madala nila.

Ang duha nagpadayon hangtod nahiduol na sila sa Media.

6Unya nangutana si Tobias, “Azarias, higala ko, unsa mang mga sakita ang mamaayo niining apdo, kasingkasing ug atay?”

7Mitubag ang anghel, “Ang kasingkasing ug atay mahimong sunogon ug ang aso niini gamiton aron paasohan ang tawo nga gisakit sa usa ka demonyo o daotang espiritu. Dihadiha mohunong ang pag-ataki ug kadtong tawhana dili na gayod samukon pag-usab.

8Magamit nimo ang apdo sa pagtambal sa usa ka tawo kansang mga mata gitabonan sa usa ka puti nga habolhabol. Ipaghid lang kini sa iyang mga mata ug huypa ang habolhabol ug makakita siya pag-usab.”

Sa Dalan ngadto sa Ecbatana

9Sa pag-abot nila sa Media ug nagkaduol na sila sa siyudad sa Ecbatana,

10si Rafael miingon, “Tobias, higala ko, karong gabii adto kita moabot sa balay sa imong paryenti nga si Raguel. May bugtong siya nga anak nga babaye nga ginganlag Sara

11ug tungod kay ikaw man ang labing suod niyang paryenti aduna kay katungod sa pagpangasawa kaniya. May katungod ka usab pagpanunod sa tanang kabtangan sa iyang amahan.

12Siya usa ka batan-on nga babaye nga buotan, maantigo ug maanyag kaayo ug ang iyang amahan usa ka maayong tawo. Karong gabii makigsulti ako sa iyang amahan ug ipamalaye ko ikaw ug mosugot gayod siya nga ihatag ang iyang anak aron mahimong imong asawa. Unya sa pagbalik na nato sa inyo gikan sa lungsod sa Rages, atong himoon ang kasal. Si Raguel dili makabalibad sa pagpakasal mo kaniya ug dili siya makahimo nga minyoon siya sa laing lalaki. Kon iya kining himoon angay siyang silotan sa kamatayon sumala sa Balaod ni Moises. Nasayod siya nga ikaw lamang ang adunay katungod sa pagpangasawa sa iyang anak ug sa pagdawat sa kabilin busa sunda ang akong tambag. Si Raguel ug ako maghisgot niining butanga karong gabii ug hikayon ang imong kaminyoon kang Sara. Sa pagbalik nato gikan sa siyudad sa Rages, ato siyang dad-on sa inyo.”

13Si Tobias miingon kang Rafael, “Azarias, higala ko, nakadungog na ako mahitungod sa pito ka unang bana ni Sara ug sa ilang kamatayon sa gabii sa ilang kasal sa wala pa gani sila makahigda.

14Sumala sa sugilanon nga akong nadunggan, gipatay sila sa usa ka demonyo nga nahigugma kang Sara. Wala niya unsaa si Sara apan gipatay niya ang matag tawo nga buot moduol kang Sara. Nahadlok ako nianang maong demonyo. Bugtong akong anak ug kon mamatay ako, ang kaguol magdala sa akong mga ginikanan ngadto sa ilang mga lubnganan. Wala gayod silay laing anak nga molubong kanila.”

15Mitubag ang anghel, “Nalimot na ba ikaw sa mga tugon sa imong amahan? Nagtugon siya nga papangasaw-on ka ug usa ka babaye gikan sa imong kaugalingong tribo. Busa pamati pag-ayo sa akong isulti kanimo. Ayaw kabalaka mahitungod sa demonyo. Pangasaw-a si Sara! Nahibalo ako nga karong gabii motugot si Raguel nga mangasawa ka kang Sara.

16Sa pag-adto nimo sa lawak nga higdaanan, dad-a ang kasingkasing ug atay sa isda ug ibutang kini ibabaw sa nag-aso nga insenso

17aron ang baho molukop sa tibuok lawak. Sa pagkabaho niini sa demonyo, molayas siya ug dili na gayod magpaduol kang Sara. Apan sa dili pa ninyo bug-oson ang kaminyoon, kamong duha kinahanglang mobarog ug mag-ampo sa Ginoo sa langit aron maluoy siya kaninyo ug magbantay kaninyo. Ayaw kahadlok. Si Sara gituyo nga maimo sukad pa sa sinugdan sa pagbuhat sa kalibotan. Luwason mo siya gikan sa demonyo ug mouban siya kanimo sa inyo. Ikaw ug si Sara hatagan ug daghang mga anak nga imong higugmaon ug maayo. Busa ayaw kabalaka!”

Si Tobias namati pag-ayo sa gisulti ni Rafael kaniya. Unya nagsugod ang iyang paghigugma kang Sara ug naghinamhinam siya sa pagpakigminyo kaniya.