Baruc 2 - Cebuano Meaning-Based Bible

1“Busa gituman sa Ginoo ang iyang gipasidaan batok kanato ug batok sa atong mga maghuhukom, sa atong mga hari, sa atong mga pangulo ug sa katawhan sa Israel ug sa Juda.

2Walay laing dapit sa kalibotan nga nahitaboan sa maong mga butang nga nahitabo sa Jerusalem sa diha nga gituman sa Ginoo ang mga tunglo nga nahisulat sa Balaod ni Moises.

3Hilabihan kangil-ad ang atong pagkabutang nga gikaon gani nato ang unod sa atong kaugalingong mga anak.

4Gipatibulaag sa Ginoo ang katawhan, gitugyan kita niya ngadto sa pagbuot sa tanang mga nasod nga naglibot kanato ug giyam-iran kita nila ug nangahadlok sila sa nahitabo kanato.

5Nakasala kita batok sa Ginoo nga atong Dios ug midumili kita sa pagtuman kaniya. Busa ang atong nasod nabuntog inay kita unta ang mahimong mga mananaog.

6“Ang Ginoo nga atong Dios matarong kanunay apan kita ug ang atong mga katigulangan nagbaguod hangtod karon sa atong kalapasan.

7Bisan gisilotan kita sa Ginoo sumala sa iyang pasidaan,

8wala gihapon kita modangop kaniya ug wala nato biyai ang atong daotan nga mga hunahuna.

9-10Wala kita motuman kaniya o magkinabuhi subay sa iyang matarong nga mga sugo busa gipahamtang kanato sa Ginoo ang tanan nga mga silot nga iyang giandam alang kanato.

Ang Pag-ampo aron Luwason

11“Ikaw, O Ginoo, mao ang Dios sa Israel nga nagpagula sa imong katawhan gikan sa Ehipto pinaagi sa dakong gahom ug sa mga timailhan, mga milagro ug mga katingalahang butang. Gipakita nimo ang imong dakong gahom ug naimo ang mahimayaong kabantog hangtod karong adlawa.

12O Ginoo nga among Dios, nakasala kami; wala kami magmatinumanon; gilapas namo ang tanan nimong kasugoan.

13Apan ayaw na kasuko kanamo. Dinhi sa kanasoran diin imo kaming gipatibulaag, pipila lamang kanamo ang nahabilin.

14Patalinghogi ang among mga pag-ampo ug mga pangamuyo, Ginoo, ug luwasa kami tungod sa imong kaugalingong dungog. Himoang mahimuot unta kanamo ang mga nagbihag kanamo.

15Unya ang tibuok kalibotan mahibalo nga ikaw mao ang Ginoo nga among Dios ug nga gipili nimo ang nasod sa Israel aron mahimo nga imong kaugalingong katawhan.

16“O Ginoo, sud-onga kami gikan sa langit ug tan-awa ang among kaalaot. Patalinghogi ang among pag-ampo.

17Bukha ang imong mga mata ug tan-awa kami. Kadtong anaa sa kalibotan sa mga patay nga walay nahibilin nga ginhawa diha sa ilang mga lawas dili makahalad ngadto kanimo ug mga pagdayeg o makasangyaw unsa ikaw katarong.

18Ang mga buhi lamang, O Ginoo, maoy makahalad kanimo ug pagdayeg ug moila sa imong katarong bisan kon mag-antos sila pag-ayo ug magbaguod, bisan ug sila mahuyang, gutom ug nagkahalap na ang panan-aw.

19“O Ginoo nga among Dios, nag-ampo kami kanimo nga imo kaming kaluy-an apan dili tungod sa bisan unsang maayong mga butang nga nahimo sa among katigulangan ug sa among mga hari.

20Gitumong nimo ang imong kasuko ug kalagot dinhi kanamo sumala sa imong gipasidaan nga buhaton pinaagi sa imong mga sulugoon nga propeta nga miingon,

21‘YukboiJer. 7:34; 27:10-12. ug alagari ang hari sa Babilonia ug makapabilin kamo diha sa yuta nga akong gihatag ngadto sa inyong katigulangan.

22Apan kon magdumili kamo pagtuman sa akong sugo sa pag-alagad sa hari sa Babilonia,

23taposon ko ang tanang tingog sa kalipay ug kasaulogan diha sa kalungsoran sa Juda ug sa Jerusalem. Bisan ang malipayong mga honi sa mga pangilin sa kasal dili na madungog. Ang tibuok yuta magmingaw ug wala nay magpuyo.’

24“ApanJer. 8:1-2. wala kami motuman sa imong sugo sa pag-alagad sa hari sa Babilonia, busa gituman nimo ang imong gipasidaan pinaagi sa imong mga sulugoong propeta sa diha nga miingon ikaw nga ang mga bukog sa among mga hari ug sa among mga katigulangan kuhaon gikan sa ilang mga lubnganan ug isaliyab.

25Ug karon ania nagbuy-od sila nga nainitan sa adlaw ug nabugnawan sa yamog sa gabii. Nangamatay sila nga nag-antos sa gutom, gubat ug sakit.

26Ug tungod sa sala sa katawhan sa Israel ug sa Juda, gigun-ob nimo ang imong kaugalingong Templo ug hangtod karong adlawa kini gun-ob gihapon.

27“Apan, Ginoo, nagpailob ikaw kanamo ug nagpakita ikaw kanamo ug dakong kaluoy,

28sumalaDeut. 28:58, 62. sa imong gisaad pinaagi sa imong sulugoon nga si Moises niadtong adlaw nga imo siyang gisugo sa pagsulat sa imong Balaod atubangan sa mga Israelita.

29Miingon ikaw, ‘Kon dili kamo motahod kanako, maut-ot kamo ug mahimong diyutay na lamang kaayo diha sa mga nasod diin patibulaagon ko kamo.

30Nasayod ako nga dili kamo motahod kanako tungod kay kamo usa ka katawhan nga gahig ulo. Apan sa dihang mabihag na kamo ngadto sa laing yuta, mabut-an ra kamo.

31Unya makaamgo kamo nga ako mao ang Ginoo nga inyong Dios ug hatagan ko kamo sa usa ka tinguha sa pagpamati ug sa pagtuman.

32Didto sa yuta diin kamo bihagon inyo akong daygon ug inyo akong hinumdoman.

33Mohunong na kamo sa pagkahilabihan kagahi ug ulo ug pagkadaotan kay mahinumdom kamo unsa ang nahitabo sa inyong mga katigulangan tungod sa ilang pagpakasala batok sa Ginoo.

34Unya dad-on ko kamo pagbalik ngadto sa yuta nga akong gisaad sa inyong mga katigulangan nga si Abraham, si Isaac, ug si Jacob ug mainyo kini pag-usab. Akong pasanayon ang gidaghanon sa inyong katawhan ug dili na gayod mokunhod ang inyong gidaghanon.

35HimoonJer. 32:38-40. ko ang usa ka walay kataposan nga kasabotan uban kaninyo; ako mainyong Dios ug kamo maako nga katawhan. Dili na gayod kamo papahawaon pag-usab gikan sa yuta nga akong gihatag kaninyo, katawhan sa Israel.’